1 Bale, Pilatə nə zâ ama â əndje nâ də Jezu nə ə dâ ətshə də djakwa. 2 Atrugu djô ə̈bə̈ kpɔtɔ ngerə də ayana ayɔ aəshi, ə zâ gâ tə̂ kumu ye, ə yî ndje ə̈bə̈ ə̂drô əgerə ləba gâ tə̂ ye, 3 ə nâ trö də ətshə ə pa: «Wanda, əyïngerə nə̂ Ajuwufu!» Â əndje dâ ngâlâ ye.

4 Pilatə nə wûtu kwatə̂ye gashu ə pâ kə Ajuwufu nə ə pa: «E wü-a, mə sə kə wutu də Jezu kə e gashu, ndə kə pa e wusə̂ nə ə pa mə sɔtə̂ ə̈bə̈ əpʉ sɔ lə kumu ye ə̂në ə lï də ngbanga ne.» 5 Rəkɔ, Jezu nə wûtu gashu nə də kpɔtɔ aəshi nə tə̂ kumu ye gâ ndə ə̂drô əgerə ləba nə tə̂ ye. Bale, Pilatə nə pâ kə əndje ə pa: «Koshe nə kə səye!»

6 Alɔ ə̂në aâgbɔ̂ azü nə̂ aawotokrɔ nə gâ ndə aawobata Anda Ndjapä nə wû ətshə kɔ, əndje tâ râwâ ə pa: «Kü ətshə gâ ala masheyɔ! Kü ətshə gâ ala masheyɔ!» Pilatə nə pâ kə əndje ə pa: «E zä ətshə də ə̂tə̂ e ə kü ətshə gâ ala masheyɔ nə; mbrə ə̂në əmə, mə sɔtə̂ ə̈bə̈ əpʉ sɔ lə kumu ye ə̂në ə lï də ngbanga kɔ ne.» 7 Ajuwufu nə kîrə əpʉ kə ətshə ə pa: «Ä-ä, ä sə də ə̈bə̈ âgbɔ̂ əpʉ, â Lïndə̂ âgbɔ̂ əpʉ səkɔ, tshə lï ndə kə tshu nə, mbrə ə̂në tshə pâ əne sə tə Ɨrɨ Ndjapä.»

8 Alɔ ə̂në Pilatə nə djî əpʉ səkɔ, awa zâ ətshə rô pâ nə. 9 Tshə lî kwatə̂ye gâ lə anda nə ə yû Jezu ə pa: «Əbə, bə sə tə əzü tshe kotâ a?» Bale, Jezu nə â ama ye â kə ətshə bale ne. 10 Bale, Pilatə nə pâ kə ətshə ə pa: «Bə wusə̂ nə wu ə pa mə sə də awlra ndə kə pa mə katə̂ zə, ndje ndə kə pa mə ku əbə gâ ala masheyɔ ne a?» 11 Jezu kîrə əpʉ ə pa: «Bə sə sə də ə̈bə̈ awlra bale gâ pâ əmə ne, kədə əndje zâ zâ kə əbə mâ lafɔ ne. Âdârə ə̂në əzü ə̂në tshə zâ əmə gâ lə kəna zə kɔ, âgbɔ̂ nyaka sə lə kumu ye ə rô ənə̂ zə gâ ye.»

12 Kʉ pə tə̂ alɔ nə səkɔ, Pilatə nə vɔ̂tə̂ kə pra äwä ndə kə katə̂ Jezu nə. Bale Ajuwufu nə tâ râwâ kwatəndje ə pa: «Kədə bə katə̂ ye, bə sə sə tə gbɔbəngâ âgbɔ̂ əyïngerə əgɔ Rɔmə ne. Əzü nɔ̂ ə̂në tshə dô tə̂ ye tə əyïngerə gâ ye kɔ, tshə dô tə̂ ye də əpʉ gâ tə̂ âgbɔ̂ əyïngerə əgɔ Rɔmə nə.» 13 Alɔ ə̂në Pilatə nə djî aəpʉ səkɔ, tshə zâ ama â əndje wûtu də Jezu nə gashu, â Pilatə nə sə̂ gâ tʉ gâ pâ mbata kə wa ngbanga nə̂ ye tə̂ ətshe ə̂në əndje ê ə pa «Pave»*19.13 Pave: Pave nə sə tə ə̈bə̈ ətshe ə̂në əndje kô aəkpʉ gâ tə̂ nə ndə kə pa azü na pâ nə kɔ. kɔ, ə̂në əndje ê də ama ebrʉ ə pa «Gabata» kɔ.

14 Tə̂ əlo kə gamba aərə mbrə sandaga Pakə kə sə̂, gu ndə əkpî alɔ. Tshə pâ kə Ajuwufu ə pa: «Əyïngerə nə̂ e nə kə səye!» 15 Bale, əndje tâ râwâ ə pa: «Wö ətshə! Wö ətshə! Kü ətshə gâ ala masheyɔ!» Pilatə nə pâ kə əndje ə pa: «Mə wo əyïngerə nə̂ e nə gâ ala masheyɔ nə a?» Aâgbɔ̂ azü nə̂ aawotokrɔ kîrə əpʉ ə pa: «Ä sə sə də ə̈bə̈ əyïngerə kpî tə̂ âgbɔ̂ əyïngerə əgɔ Rɔmə ne.» 16 Bale, tshə zâ Jezu nə kə əndje ndə kə pa əndje wo ətshə gâ ala masheyɔ nə.

Rəkɔ, əndje zâ Jezu nə [ə rô də ətshə].*19.16 Əpʉ səke sə sə lə aga aangbrɔ afraka Ndjapä də ama grakə ne. 17 Jezu nə wûtu lə gala nə də masheyɔ nə̂ ye nə pâ əgʉ ye də ə̂tə̂ ye, ndə kə na mâ tə̂ ətshe ə̂në əndje djî əɨrɨ nə ə pa: «Gbɔkrɔ» kɔ, ə̂në əndje ê də ama ebrʉ ə pa «Gɔlgɔta» kɔ. 18 Kôto də̂ atrugu nə kû ətshə gâ ala masheyɔ nə, ətshə gâ ndə alabə̈ azü bishi, əzü bale djoko mbage, əzü bale djoko mbage, â Jezu nə sə̂ gâ ə̂grû nə.

19 Pilatə nə zâ ndje ama â əndje tâ ə̈bə̈ fraka ə zâ gâ lafɔ tə̂ kumu Jezu gâ ala masheyɔ nə. Fraka nə pâ: «Jezu əzü əgɔ Nazaratə, əyïngerə nə̂ Ajuwufu.» 20 Ajuwufu ngbatshe dɨ̂ fraka səkɔ, mbrə ə̂në ətshe ə̂në əndje kû Jezu nə tə̂ nə gâ ala masheyɔ nə kɔ sə̂ trö tə̂ tshelə gala nə. Əndje tâ fraka nə də ama ebrʉ, də ama lata ndje də ama grakə. 21 Aâgbɔ̂ azü nə̂ aawotokrɔ nə̂ Ajuwufu nə pâ kə Pilatə nə ə pa: «Tä tä ə pa: "Əyïngerə nə̂ Ajuwufu" ne; bale, tä ə pa: "Koshe səke pa: Mə sə tə əyïngerə nə̂ Ajuwufu."» 22 Pilatə nə kîrə əpʉ ə pa: «Ərə ə̂në mə tâ gâ ye, mə tâ gâ ye.»

23 Mandânə ə̂në atrugu nə kû Jezu nə gâ ala masheyɔ nə gâ ye kɔ, əndje kô aləba nə̂ ye, ə krû tshelə nə vəna, əzü bale bale də ənə̂ ye. Əndje zâ ndje əkro ləba nə̂ ye ə̂në əndje sû sû ə sû ne kɔ, ə̂në ə sə kʉ yerogbodo nə mâ tə̂ kumu nə ʉrrr ndjɔ mâ tə̂ budu nə kɔ. 24 Əndje pâ lə takpa tə̂ əndje ə pa: «A sü süru tshelə nə ne, bale a tɔ̈ kədi ndə kə wu əzü ə̂në tshə sə kə sɔtə̂ nə kɔ.» Ə sə rə ndə kə pa əpʉ ə̂në Fraka nə̂ Ndjapä pâ gâ ye kɔ, ndəma nə mbrə, ə̂në ə pa:

«Əndje krû tshelə aləba nə̂ əmə tə̂ əndje.

 əndje zâ əgerə ləba nə̂ əmə ə tɔ̂ də kədi.»*19.24 Wu Ətsh 22.19.

Ərə ə̂në atrugu nə mbrə̂ kɔ kə sə̂.

25 Trö tə̂ masheyɔ nə ə̂në əndje kû Jezu nə gâ ala nə kɔ, əyï nə gâ ndə aye əyï nə, Marə̂, əwɔ Klɔpasə gâ ndə Marə̂ tshe Magədala sə̂ je, əndje kâ kôto. 26 Ə̂në Jezu nə wû əyï nə gâ ndə trawaya ə̂në tshə yîndə ye kɔ, trö də əyï nə nə kɔ, tshə pâ kə əyï nə ə pa: «Anə̂, ɨrɨ zə kə səye.» 27 Mandânə, tshə pâ kə trawaya nə ə pa: «Əyï zə kə səye.» Bale, kʉ pə tə̂ alɔ nə səkɔ, trawaya nə zâ əyï Jezu nə mâ ndə ye-e.

28 Mandâ ərə səkɔ, Jezu wûsə̂ nə ə pa kpəsəye ərə nɔ̂ nglɔ̂ gâ ye kɔ, â ndə kə pa ndəma əpʉ ə̂në Fraka nə̂ Ndjapä pâ kɔ mbrə, tshə pâ: «Əgo ə̂ngû mi əmə.»*19.28 Wu Ətsh 22.16; 69.22. 29 Ə̈bə̈ ləsû sə̂ kôto ə̂në duva ə̂në ə kpi ə kpi kɔ sə̂ lə nə. Atrugu nə zâ ə̈bə̈ ndɔkɔrɔ, ə ndrû lə duva nə ə̂në ə kpi ə kpi kɔ ə î gâ tə̂ ə̈bə̈ ama ayɔ izɔpə ə nâ də nə trö gâ tə̂ ama Jezu nə. 30 Alɔ ə̂në Jezu nə trâ duva nə ə̂në ə kpi ə kpi kɔ, tshə pâ əpʉ ə pa: «Ərə nɔ̂ nglɔ̂ gâ ye.» Â tshə têrə kumu ye gâ tʉ ə tshû.

31 Tə̂ əlo kə gamba tə̂ mbrə əlo saaba kə sə̂, â amakɔndji nə̂ Ajuwufu nə yîndə nə yî ə pa aəko azü nə daka pə la masheyɔ nə tə̂ əlo saaba nə ne. Kandää, əlo saaba ənə̂ səkɔ sə̂ tə ə̈bə̈ əlo ə̂në ə sə̂ tə âgbɔ̂ əlo ngbatshe. Rəkɔ, amakɔndji nə̂ Ajuwufu nə nâ ə yû Pilatə ndə kə pa tshə za ama əndje ngɔ tshelə aə̈nü azü nə ə̂në əndje kû əndje gâ ala masheyɔ nə kɔ ə djɔ aəko əndje nə la masheyɔ nə. 32 Rəkɔ, atrugu nə nâ ə ngɔ̂ tshelə ə̈nü əlî əzü nə, mandânə ə ngɔ̂ tshelə ə̈nü bishi əzü nə ə̂në əndje kû əndje də Jezu nə gâ ala masheyɔ nə kɔ. 33 Alɔ ə̂në əndje wûtu gâ tə̂ Jezu nə kɔ, əndje wû ə pa tshə tshû gâ ye, â əndje ngɔ̂ tshelə aə̈nü ye ne ngɔ̂ ne, 34 bale, ə̈bə̈ trugu nə sû əkro ye də ə̈dü, â trale, ə̈ndjï də ə̂ngû vɔ̂tə̂ kə wutu nə. 35 Ətshə ə̂në tshə wû ərə nə də ala ye kɔ, ətshə kə sə̂ â pâ ndə əpʉ nə kɔ, â əpʉ nə ə̂në tshə pâ kɔ sə tə djatra əpʉ. Tshə wusə̂ nə ə pa djatra əpʉ də̂ əne pa kɔ, kanika e-e ndje, e za lɔsu e kə Ndjapä. 36 Ərə səkɔ mbrə̂ rə ndə kə pa əpʉ ə̂në Fraka nə̂ Ndjapä pâ kɔ, ndəma nə mbrə, ə̂në ə pâ: «Tshelə ə̈bə̈ gbabi ye bale sə sə kə ngɔ nə ne.»*19.36 Wu Wutu 12.46; Kumu 9.12; Ətsh 34.21. 37 Ə̈bə̈ ata əpʉ nə lə Fraka nə̂ Ndjapä nə pâ kwatə̂ye ə pa: «Əndje ko ala əndje tɔ tə̂ ətshə ə̂në əndje trɔ̂ ətshə krû kɔ je.»*19.37 Wu Zaka 12.10.

38 Mandâ ərə səkɔ, Jozafu, əzü əgɔ Arimate, ə̂në tshə sə̂ tə trawaya nə̂ Jezu, bale lə angbanə, mbrə awa aâgbɔ̂ azü nə̂ Ajuwufu kɔ, nâ ə yû Pilatə nə ndə kə pa tshə za äwä kə əne, əne za əko Jezu nə. Bale, Pilatə nə yîndə nə kə ətshə. Rəkɔ, Jozafu nə nâ ə djɔ̂ əkɔ Jezu nə la masheyɔ nə. 39 Nikɔdamə nâ ndje, ətshə ə̂në tshə nâ ətshinə leme-e ə tê Jezu də tsheləbu kɔ. Tshə zâ ə̈bə̈ yombo ə̂në əndje mâ də mirə gâ ndə alowasə kɔ â nâ də nə; yombo nə lʉ̂ kelɔ mata zazü bale də morofo. 40 Rəkɔ, əndje bishi nə zâ əko Jezu nə ə wôle ətshə də aama ləba ə sɨ̂ yombo nə gâ tə̂ nə, mata ə̂në Ajuwufu ə shi akuzu tə mandʉnə kɔ. 41 Kandää, ə̈bə̈ kəndɨ aayɔ sə̂ je tə̂ ətshe nə ə̂në əndje kû Jezu nə tə̂ nə gâ ala masheyɔ nə kɔ, â lə kəndɨ aayɔ səkɔ, ə̈bə̈ tafa ə̂dû sə̂ mâ je ə̂në əndje tê tê pa ə shi kuzu gâ lə nə ne kɔ. 42 Əndje shî Jezu nə kôto, mbrə ə̂në ətshe nə dɨ̂ dɨ̂ ne â əlo nə sə̂ tə əlo ə̂në Ajuwufu sə̂ kə gamba tə̂ əndje mbrə əlo saaba.