1 E zä əzü ə̂në tshə daka pə tə̂ kə mɔ ə mɔ lə əpʉ lɔsu kɔ gâ tə̂ e, ə pä ashera pä gâ pâ aəpʉ ə̂në tshə pa kɔ ne. 2 Ayə səke wusə̂ nə tə̂ lɔsu ye ə pa əne lï ndə kə pa əne zɨ aərə nɔ̂. Ayə, ə̂në tshə mɔ ə mɔ kɔ, zɨ ənə̂ ye kʉtə̂ akako gûsû. 3 Ətshə ə̂në tshə sə kə zɨ aərə nɔ̂ kɔ, tshə në nëke ətshə nə ə̂në tshə zɨ aərə nɔ̂ zɨ ne kɔ ne, â ətshə ə̂në tshə zɨ aərə nɔ̂ zɨ ne kɔ, tshə wä ngbanga wä gâ pâ ətshə nə ə̂në tshə sə kə zɨ aərə nɔ̂ kɔ ne. Mbrə ə̂në Ndjapä zâ ətshə gâ tə̂ ye gâ ye. 4 Əbə, bə sə tə əde, ə̂në bə wa ngbanga gâ pâ əyïkosəra nə̂ ə̈bə̈ əzü kɔ? Kədə tshə ka pə lafɔ wala kədə tshə te, ə wu kʉtə̂ əyïnga nə. Bale, tshə sə kə ka pə lafɔ, mbrə ə̂në Âgbɔ̂ Əyïngerə sə də awlra ndə kə pa tshə gbɔgbɔ ətshə.

5 Ayə səke sə kə wu alabə̈ aəlo kpî tə̂ ə̂dû aəlo nə, â ayə wu aəlo nə nɔ̂ kʉ äwä bale. Əzü bale bale wüsə̂ nə mâ tə̂ lɔsu ye ə pa ərə ə̂në tshə mbrə kɔ sə də äwänə. 6 Əzü nə ə̂në tshə sə kə wu alabə̈ aəlo kpî tə̂ ə̂dû aəlo nə kɔ, tshə mbrə̂ rə mbrə Âgbɔ̂ Əyïngerə. Əzü nə ə̂në tshə sə kə zɨ aərə nɔ̂ kɔ, tshə zɨ̂ mbrə Âgbɔ̂ Əyïngerə, mbrə ə̂në tshə sə kə za mərshe kə Ndjapä mbrə rəgo nə. Â ətshə nə ə̂në tshə zɨ aərə nɔ̂ zɨ ne kɔ, mbrə Âgbɔ̂ Əyïngerə də̂ tshə zɨ̂ zɨ̂ ne kɔ, â tshə sə kə za mərshe kə Ndjapä ndje. 7 Mbrə ə̂në əzü bale lə takpa tə̂ əzə̂ sə sə də sorô mbrə ətshə də ə̂tə̂ ye ne, â əzü bale tshu tshu mbrə ətshə də̂ ə̂tə̂ ye ne. 8 Kədə a sə də sorô, a sə də sorô nə mbrə Âgbɔ̂ Əyïngerə, â kədə a tshu, a tshu mbrə Âgbɔ̂ Əyïngerə nə. Rəkɔ, kədə a sə də sorô wala kədə a tshu, a sə tə ənə̂ Âgbɔ̂ Əyïngerə nə. 9 Mbrə ə̂në Kristə nə tshû â shê gâ ye, ndə kə pa tshə sə tə Âgbɔ̂ Əyïngerə nə̂ akuzu də asorô. 10 Bale əbə, bə wa ngbanga gâ pâ aye zə mbrə yekɔ? Â əbə, bə neke aye zə mbrə yekɔ? Mbrə ə̂në əzə̂ nɔ̂, a na ə ka gâ ətshi ngbanga nə̂ Ndjapä je. 11 Mbrə ə̂në Fraka nə̂ Ndjapä pâ:

«Əyïlingû drâ ama ye ə pa:

"Əmə Əyïlingû tə sorô,

azü nɔ̂ sə kə gbəte də matshikota əndje gâ ətshi əmə,

â azü nɔ̂ sə kə mbe əmə, Ndjapä."»*

12 Rəkɔ, əzü bale bale lə takpa tə̂ əzə̂ ə pa əpʉ də ama də ə̂tə̂ ye kə Ndjapä gâ pâ aərə ə̂në tshə mbrə̂ gâ ye kɔ je.

13 Rəkɔ, a kätə̂ kə wa ngbanga gâ lə kumu angâ əzə̂ lə takpa tə̂ əzə̂ gâ ye. Bale, e lï də̂ tshelə e gâ tə̂ ərə ə̂në e lï ndə kə mbrə nə ndə kə pa e sə sə tə ə̈bə̈ ərə ndə kə pa aye e ə gbətɔ ə̈nü ye tə̂ nə wala ə te ne. 14 Ənə̂ əmə, mə wusə̂ nə ngâ mâ tə̂ lɔsu əmə tə̂ äwä Âgbɔ̂ Əyïngerə Jezu ə pa ə̈bə̈ ərə bale sə sə tə̂ əmbrʉ nə ne, â ə̈bə̈ ərə sə tə əmbrʉ ərə kʉ lə ala əzü nə ə̂në tshə wû tə əmbrʉ nə kɔ. 15 Rəkɔ, kədə aye zə sə də əkɔ tə̂ lɔsu ye mbrə rəgo ə̂në bə zɨ kɔ, bə mbrə tə̂ zə mbrə tə̂ äwä kə yi tə̂ ne. Tə̂ äwä rəgo, mbə̈ mbrə̈ ndə kə pa əzü ə̂në Kristə tshû mbrə ətshə kɔ äwä ye djingli ne. 16 Ərə ə̂në ə sə tə ə̂rɔ̂ nə mbrə e kɔ, ə dö tə̂ ye dö tə ə̈bə̈ ərə ndə kə pa azü pa tə̂ e mbrə nə ne. 17 Mbrə ə̂në Əgɔngerə nə̂ Ndjapä sə sə tə əpʉ kə zɨ ərə də kə ndju ərə ne, bale ə sə tə əpʉ kə mbrə ərə də äwänə də əpʉ blatshe gâ ndə ə̂rû tə̂ äwä Âgbɔ̂ Yîrə̂. 18 Əzü ə̂në tshə sə kə mbrə kosəra kə Kristə nə rə, tshə sə tə əzü ə̂në tshə fʉ lə ala Ndjapä â azü sə kə yində kə mbrə ərə nə̂ ye nə.

19 Bale rəkɔ, a prä äwä ərə ə̂në ə sə kə na də blatshe də ərə ə̂në ə sə kə gerə əzə̂ lə əpʉ lɔsu nə kɔ. 20 Mbrə rəgo, ndɨ̈ äwä kosəra nə̂ Ndjapä ndɨ̈ ne. Tə djatra əpʉ, aərə nɔ̂ sə mvo. Bale, ə sə tə əmbrʉ ərə ndə kə pa əzü zɨ ə̈bə̈ rəgo, rəgo nə do tə̂ ye tə ə̈bə̈ ərə kə yi ə̈bə̈ əzü gâ lə nyaka. 21 Ə sə tə ə̂rɔ̂nə ndə kə pa əzü zɨ dɔ̂ngɔ̂ zɨ ə ndju ə̂pî ndju ne ə ru tshelə ye tə̂ ərə ə̂në ə lï ndə kə pa ə sə tə ə̈bə̈ ərə kə geta aye zə gâ lə nyaka kɔ. 22 Əpʉ ə̂në əbə, bə sə də nə tə̂ lɔsu zə gâ pâ əpʉ səkɔ, bäta mbrə əbə ətshi Ndjapä. Ənə̂ ye tə ə̂rɔ̂nə, əzü ə̂në tshə wä ngbanga wä gâ lə kumu ye də ə̂tə̂ ye lə ərə ə̂në tshə wu tə ə̂rɔ̂ nə ndə kə mbrə kɔ ne. 23 Bale, əzü ə̂në tshə sə də ashera tə̂ lɔsu ye gâ pâ ərə ə̂në tshə sə kə zɨ nə kɔ, əpʉ sə lə kumu ye, mbrə ə̂në tshə mbrə ərə mbrə tə̂ äwä əpʉ lɔsu ye ne. Ərə nɔ̂ ə̂në əzü mbə mbrə tə̂ äwä əpʉ lɔsu ne kɔ, sə tə nyaka.