1 Əzə̂ ə̂në a gbɔ ə gbɔ lə əpʉ lɔsu kɔ, a lï ndə kə pa a ru tshelə əzə̂ tə̂ kə mɔ azü ə̂në əndje gbɔ gbɔ ne kɔ, a pä prä äwä ərə ə̂në ə fʉ kʉ tə̂ əzə̂ də ə̂tə̂ əzə̂ kɔ ne. 2 Əzü bale bale lə takpa tə̂ əzə̂ prä äwä ə̂rɔ̂ ərə mbrə bəngâ nə, ə̂në ə fʉ ə fʉ tə̂ ye kɔ, ndə kə pa ə gerə ətshə lə əpʉ lɔsu nə. 3 Mbrə ə̂në Kristə nə pâ prâ äwä ərə ə̂në ə fʉ tə̂ ye də ə̂tə̂ ye kɔ ne, bale Fraka nə̂ Ndjapä pâ: «Aə̂gû ə̂në azü ə gu tə̂ zə kɔ gû gâ pâ əmə.»* 4 Kandää, əpʉ nɔ̂ ə̂në əndje tâ gâ lə Fraka nə̂ Ndjapä leme-e kɔ, əndje tâ ndə kə pa ə yisə̂ ərə kə əzə̂, kanika a sə də ərə ə̂në a za lɔsu əzə̂ gâ pâ nə, tə̂ äwä kə ru tshelə əzə̂ də kə gbɔgbɔ lɔsu əzə̂ ə̂në Əpʉ Ndjapä nə ə na də nə kɔ. 5 Ndjapä nə, ə̂në tshə mbrə̂ â əzü ə ru tshelə ye kɔ, ə̂në tshə gbɔgbɔ əzü kɔ, tshə zä äwä kə e ndə kə pa aəpʉ lɔsu e sə kʉ bale lə takpa tə̂ e ə lï də əpʉ ə̂në Jezu Kristə yîsə̂ nə gâ ye kɔ. 6 Rə də̂ e-e nɔ̂ mvrɔ, də ama kʉ bale, e sə kə mbe Ndjapä, tə Abä Âgbɔ̂ Əyïngerə nə̂ əzə̂ Jezu Kristə nə. 7 Rəkɔ, e kö angâ e gâ tə̂ e lə takpa tə̂ e, mata ə̂në Kristə nə kô e gâ tə̂ ye gâ ye, mbrə kə mbe Ndjapä kɔ. 8 Ngâ, mə pa Kristə nə sə tə əyïkosəra mbrə Ajuwufu, ndə kə pa tshə yisə̂ nə gashu ə pa Ndjapä sə kə mbrə ndəma ye alɔnɔ̂ â mbrə̂ ndəma əpʉ ə̂në tshə zâ ama də nə leme-e kə alätä əndje gâ ye kɔ gâ ye. 9 Kristə nə mbrə ndje ndə kə pa azü ə̂në əndje sə sə tə Ajuwufu ne kɔ, əndje mbe Ndjapä nə mbrə ə̂rɔ̂tə̂ ye, ə lï də əpʉ ə̂në Fraka nə̂ Ndjapä pâ:

«Âdârə ə̂në mə sə kə tɔlɔ əbə lə takpa tə̂ amarä kpî,

â mə sə kə vi ətshi ə mbe əɨrɨ zə kɔ kə sə̂.»*

10 Fraka nə̂ Ndjapä nə pâ kwatə̂ye ə pa:

«E-e, amarä kpî, e də azü nə̂ Ndjapä nə, e dü ə̂rû!»*

11 Ə pâ kwatə̂ye ə pa:

«E tɔ̈lɔ Âgbɔ̂ Əyïngerə, e-e amarä nɔ̂,

e mbë ətshə, e-e azü aəgɔ nɔ̂!»*

12 Ezayi pâ ndje ə pa:

«Ə̈bə̈ angwa ə wutu lə Jese je,

ə̂në tshə afɔ je ndə kə pa tshə mbrə ngerə gâ pâ amarä kpî kɔ,

â amarä nə ə za lɔsu əndje gâ pâ ye je.»*

13 Ndjapä nə, ə̂në əzü sə kə za lɔsu ye gâ pâ əpʉ ə̂në tshə pa kɔ, sü lɔsu e trɔ̂ də ə̂rû nɔ̂ də blatshe nɔ̂, tə̂ äwä lɔsu e ə̂në e zâ kə ətshə kɔ, ndə kə pa əpʉ lɔsu e nə ə̂në e zâ gâ pâ əpʉ ama Ndjapä nə kɔ ro pâ nə, tə̂ äwä awlra nə̂ Âgbɔ̂ Yîrə̂!

14 Alaye əmə, mə wusə̂ nə mâ tə̂ lɔsu əmə də ə̂tə̂ əmə ə pa əgo kə mbrə ə̂rɔ̂ ərə rô pâ e gâ ye â kə wusə̂ ərə rô pâ e gâ ye â e lï ndə kə pa e mʉ əpʉ kə angâ e lə takpa tə̂ e. 15 Bale, mə tâ fraka kə e gâ pâ alabə̈ aəpʉ ə̂në mə pa pa də gana ne, ndə kə pa e li tshelə e gâ pâ alabə̈ aəpʉ ə̂në e wûsə̂ nə gâ ye kɔ, mbrə ə̂rɔ̂tə̂ Ndjapä ə̂në tshə mbrə̂ kə əmə gâ ye kɔ, 16 ndə kə pa mə sə tə əyïkosəra nə̂ Jezu Kristə nə lə takpa tə̂ azü ə̂në əndje sə sə tə Ajuwufu ne kɔ. Mə sə kə mbrə kosəra kə mʉ Ə̂rɔ̂ Əpʉ nə̂ Ndjapä nə, kanika azü ə̂në əndje sə sə tə Ajuwufu nə ne kɔ, əndje sə tə əkrɔ ə̂në əndje tô kə Ndjapä, ə̂në ə fʉ ə fʉ lə ala ye, ə̂në ə sə kpî mbrə ətshə tə̂ äwä Âgbɔ̂ Yîrə̂ kɔ. 17 Rəkɔ, mə sə kə da əkro əmə lə Jezu Kristə nə mbrə kosəra Ndjapä nə ə̂në mə mbrə kɔ. 18 Mbrə ə̂në kədə mə ma əgo kə pa ndə nə, mə sə kə pa kʉ ndə ərə ə̂në Kristə nə mbrə̂ gâ ye tə̂ äwä əmə ndə kə pa azü ə̂në əndje sə sə tə Ajuwufu ne kɔ dji əpʉ ama Ndjapä. Tshə mbrə̂ tə̂ äwä əpʉ ə̂në mə pa də aərə ə̂në mə mbrə kɔ, 19 tə̂ äwä awlra nə̂ ye ə̂në tshə yîsə̂ nə gashu lə aərə ə̈lü də aərə kə ro pâ kumu azü, ə̂në awlra Yîrə̂ Ndjapä mbrə̂ gâ ye kɔ. Â ə vɔ̂tə̂ nə mâ Jeruzalamə ʉrrr ndjɔ mâ lə ashɔ Iliri, mə mʉ̂ Ə̂rɔ̂ Əpʉ nə̂ Kristə nə tə̂ aətshe nə na na ye nɔ̂. 20 Â mə wu lə ala əmə tə âgbɔ̂ ərə ndə kə pa mə mʉ Ə̂rɔ̂ Əpʉ nə tə̂ ətshe ə̂në əndje tê tê pa ə dji əɨrɨ Kristə nə tə̂ nə ne kɔ, kanika mə mbrə kosəra nə̂ əmə nə mbrə gâ pâ ama kosəra ə̂në ə̈bə̈ əzü vɔ̂tə̂ nə gâ ye kɔ ne. 21 Mə mbrə rə ə lï də əpʉ ə̂në Fraka nə̂ Ndjapä pâ:

«Azü ə̂në əndje pâ ndə ye pâ kə əndje ne kɔ

ə wu ətshə je,

â əndje ə̂në əndje djî ndə ye djî ne kɔ

ə wusə̂ âdâ nə je.»*

22 Ərə nə ə̂në ə gbɔ tə̂ äwä tə̂ əmə alɔnɔ̂ ndə kə pa mə na gâ tə̂ e kɔ kə sə̂. 23 Bale, ə̂në a lə ye, mə sə sə kwatə̂mə də ə̈bə̈ kosəra kə mbrə nə bale lə ashɔ aəgɔ səkɔ ne, â lə aə̂ngû ngbatshe də̂ mə ma əgo ndə kə pa mə na gâ tə̂ e kɔ. 24 Mə ma əgo kə wu e alɔ ə̂në mə sə kə ro ə na mâ lə ashɔ əgɔ Esəpanyə. Mə ma əgo ndə kə pa, mə â na mâ ndə e je â əzə̂ də a-e sə teashe gâ ye, e ko alabə̈ aərə kə əmə ndə kə pa ə za äwä kə əmə mə na na ye mâ je. 25 Bale, ə̂në a lə ye, mə sə kə na mâ Jeruzalamə ndə kə pa mə mbrə kə azü nə̂ Ndjapä. 26 Mbrə ə̂në azü Alaglizə ashɔ aəgɔ Masedwanə də Akayi zâ ama ndə kə pa əndje ko aərə mbrə alayïəyo ə̂në əndje sə lə takpa tə̂ azü nə̂ Ndjapä mâ Jeruzalamə nə kɔ. 27 Əndje kə yîndə kə mbrə rə kɔ, â sə tə ərə ə̂në əndje lï ndə kə pa əndje mbrə, mbrə əndje. Mbrə ə̂në kədə azü ə̂në əndje sə sə tə Ajuwufu ne kɔ kə sɔ̂tə̂ aə̂rɔ̂ aərə nə̂ Ndjapä tə̂ äwä azü nə̂ Ndjapä mâ Jeruzalamə, əndje lï ndje ndə kə pa əndje ko aərə nə̂ əndje ə ko kə azü nə̂ Ndjapä nə lə əyo ə̂në əndje sə lə nə kɔ. 28 Alɔ ə̂në mə â mbrə kosəra səkɔ â nglɔ gâ ye â mə ko ngendja səkɔ kə azü nə gâ ye, mə sə kə na mâ lə ashɔ əgɔ Esəpanyə je â mə sə kə ro djoko ndə e je. 29 Mə wusə̂ nə ə pa mə â sə kə na mâ ndə e je, mə sə kə na də kə to ngwarə nə̂ Kristə nə nɔ̂ kə e.

30 Alaye, mə kɨ kə e də əɨrɨ Âgbɔ̂ Əyïngerə nə̂ əzə̂ də Jezu Kristə nə, ndje tə̂ äwä kə yi tə̂ ə̂në Âgbɔ̂ Yîrə̂ ə za kɔ, ndə kə pa e te gâ ndə əmə lə awlra tə̂ äwä kə yu Ndjapä mbrə əmə, 31 kanika Ndjapä nə djɔ əmə lə kəna azü ə̂në əndje wə̂ra tə̂ əndje tə̂ Əpʉ Ndjapä lə ashɔ əgɔ Jude kɔ, ka azü nə̂ Ndjapä nə yində aərə aâkrâ nə ə̂në mə na də nə mâ Jeruzalamə nə kɔ. 32 Rə də̂ mə sə kə yi kumu əmə mâ ndə e je də ə̂rû, kədə Ndjapä kə yində nə, ka mə wu tə̂ əmə lə takpa tə̂ e teashe. 33 Ndjapä nə, ə̂në tshə za blatshe kɔ, sə̈ də e nɔ̂! Asərəmə!