1 Rəkɔ, ə̂rɔ̂ ərə mandâ kə sə tə Juwufu nə kə də̂ yea? Wala kə wa gandja nə sə tə ə̂rɔ̂ ərə tə̂ yea? 2 Ə̂rɔ̂ ərə sə je ngbatshe lə aərə nɔ̂. Angbʉlînə, Ajuwufu də̂ Ndjapä pâ aəpʉ nə̂ ye kə əndje kɔ. 3 Tə banda əpʉ, alabə̈ əndje nə bâta aəpʉ nə bâta ne. Bale Ndjapä nə ə katə̂ äwä kə bata aəpʉ ama ye gâ ye mbrə ə̂në əndje bâta aəpʉ nə bâta ne kɔ a? 4 Bale ne! Ə lï ndə kə pa azü wusə̂ nə ə pa Ndjapä sə kə pa djatra əpʉ â azü nɔ̂ sə tə alayïəterə, mata ə̂në Fraka nə̂ Ndjapä pâ:

«Ə lï ndə kə pa azü wusə̂ nə ə pa

aəpʉ nə̂ zə sə də äwänə,

â bə sə kə ro pâ azü

kədə əndje za əbə gâ lə ngbanga.»*

5 Bale, kədə əmbrʉ ərə ə̂në əzə̂ mbrə kɔ kə yisə̂ nə gashu ə pa Ndjapä mbrə ərə nə̂ ye də äwänə, a sə kə pa atâ a? Ndjapä nə mbrə ərə mbrə də äwänə ne mbrə ə̂në tshə mbrə əkɔ gâ tə̂ əzə̂ kɔ a? Mə pa əpʉ tə ənə̂ əzü â pa kɔ. 6 Bale ne! Mbrə ə̂në kədə Ndjapä kə mbrə ərə mbrə də äwänə ne, tshə lï ndə kə pa tshə wa ngbanga tshepashɔ atâ a?

7 Bale kədə tə̂ äwä əpʉ əterə nə̂ əmə, djatra əpʉ nə̂ Ndjapä kə wutu ngbʉ̂ gashu, ndə kə pa azü wu ə̂yî ye, rəkɔ mbrə yea də̂ əmə, ngbanga daka pə lə akrɔ əmə tə əyïnyaka? 8 Â mbrə yea də̂ a pa pa, mata alabə̈ azü ə̂në əndje sə kə pa tə̂ əzə̂ ə pa ä pa: «A mbrə̈ əmbrʉ ərə kanika ə̂rɔ̂ ərə wutu lə nə!» Azü səkɔ lï ndə kə pa əndje wa ngbanga gâ lə kumu əndje.

9 Rəkɔ yekɔ? Əzə̂ də̂ Ajuwufu, a rô ə̂dû azü a? Bale ne! Mə yîsə̂ nə gashu gâ ye ə pa əzə̂ nɔ̂, Ajuwufu də azü ə̂në əndje sə sə tə Ajuwufu ne kɔ, nyaka rô pâ əzə̂ gâ ye. 10 Fraka nə̂ Ndjapä pâ:

«Ə̈bə̈ əzü bale kə mbrə ərə də äwänə sə sə je ne,

amba bale guta gu ne,

11 ə̈bə̈ əzü bale ə̂në tshə wusə̂ ərə kɔ sə sə je ne,

ə̈bə̈ əzü bale kə pra Ndjapä guta gu ne.

12 Azü nə nɔ̂ tshî ə̂rɔ̂ äwä tʉ gâ ye,

əndje djîngli äwä mvrɔ gâ ye.

Ə̈bə̈ əzü bale kə mbrə ə̂rɔ̂ ərə guta gu ne,

amba bale sə sə je ne.»*

13 «Tshelə angrɔ əndje

sə mata ama ə̂dû huu,

ama əndje sə ndə kə pa əndje frɔ də azü,

gîəsü əkrɔ kə wutu lə ama əndje.»*

14 «Kʉtə̂ aəpʉ kə dra ətshe

də aəpʉ kə shu lɔsu azü kə sə lə ama əndje.»*

15 «Aə̈nü əndje wora ndə kə na ə wo azü,

16 kə ndɨ ərə də ərə əyo

sə tə̂ äwä ə̂në əndje sə kə na tə̂ nə kɔ,

17 əndje wusə̂ äwä blatshe wû alɔ bale ne.»*

18 «Əndje kpe rawa Ndjapä kpe bale ne.»*

19 Ä wusə̂ nə ə pa aəpʉ nɔ̂ ə̂në âgbɔ̂ əpʉ nə ə pa kɔ, ə pa mbrə azü ə̂në əndje lï ndə kə mbrə aərə Lïndə̂ âgbɔ̂ əpʉ nə kɔ, ndə kə pa ə̈bə̈ əzü bale a ama ye a ndə kə pa ə̈bə̈ əpʉ ne â tshepashɔ nɔ̂ sə də əpʉ lə kumu ye lə ala Ndjapä. 20 Mbrə ə̂në ə̈bə̈ əzü bale sə sə kə sə tə ə̂rɔ̂ əzü lə ala Ndjapä mbrə ə̂në tshə mbrə̂ aərə nɔ̂ Lïndə̂ âgbɔ̂ əpʉ nə kɔ ne. Âgbɔ̂ əpʉ nə za äwä tshî ndə kə pa əzü wusə̂ əpʉ nyaka.

21 Bale kpəsəye, Ndjapä yîsə̂ äwä ə̂në tshə mbrə̂ əzə̂ tə aə̂rɔ̂ azü lə ala ye tə̂ nə kɔ kə əzə̂ gâ ye â tshə mbə̂ mbrə̂ tə̂ äwä âgbɔ̂ əpʉ ne. Afraka âgbɔ̂ əpʉ nə̂ Mayïzə də ənə̂ aawopandəma Ndjapä pâ ndə nə ətshinə gâ ye. 22 Ndjapä mbrə azü tə aə̂rɔ̂ azü lə ala ye tə̂ äwä kə za lɔsu əndje kə Jezu Kristə. Tshə ma rə mbrə azü nɔ̂ ə̂në əndje za lɔsu əndje nə kə Kristə nə kɔ, mbrə ə̂në azü nə sə sə kpî tə̂ alabə̈ angâ əndje nə ne: 23 əndje nɔ̂, əndje mbrə̂ nyaka gâ ye â äwä ə̂yî Ndjapä kânga tə̂ əndje gâ ye. 24 Bale, Ndjapä, lə ə̂rɔ̂tə̂ ye, mbrə̂ əndje tə aə̂rɔ̂ azü lə ala ye tə ambanə, tə̂ äwä Jezu Kristə nə ə̂në tshə djɔ əndje lə nyaka nə kɔ. 25 Ətshə Kristə nə də̂ Ndjapä nə gâmba ətshə ndə kə sə tə äwä kə gba tshelə nyaka tə̂ äwä ə̈ndjï ye, tə̂ äwä kə za lɔsu kə ətshə. Tshə mâ rə ndə kə yisə̂ əpʉ kə mbrə ərə nə̂ ye də äwänə gashu, mbrə ə̂në tshə wâ ngbanga wâ gâ pâ anyaka tshe leme-e ne, 26 tə̂ tshekɨ ə̂në tshə rû tshelə ye ə kâ ə kâ kɔ. Rəkɔ kpəsəye, tshə yisə̂ äwä kə wa ngbanga nə̂ ye gashu, ndə kə pa tshə yisə̂ nə ə pa əne mbrə ərə də äwänə â mbrə azü ə̂në əndje za lɔsu əndje kə Jezu kɔ tə aə̂rɔ̂ azü lə ala əne.

27 Rəkɔ, ərə kə da əkro tə̂ nə sə kotâ a? Ə sə sə je bale ne. Mbrə yekɔ? Mbrə ə̂në, ə də̂ kə mbrə ərə Lïndə̂ âgbɔ̂ əpʉ nə mandânə səye kə sə̂ tə âgbɔ̂ ərə nə ne, bale âgbɔ̂ ərə nə kə də̂ kə za lɔsu kə Jezu. 28 Mbrə ə̂në a wusə̂ nə ə pa Ndjapä mbrə əzü tə ə̂rɔ̂ əzü lə ala ye mbrə ə̂në əzü nə za lɔsu ye kə Jezu kɔ â də̂ lə kumu kə mbrə ərə nɔ̂ Lïndə̂ âgbɔ̂ əpʉ nə də̂ ne. 29 Wala Ndjapä nə ə sə kəmə kʉ tə Ndjapä nə̂ Ajuwufu a? Tshə sə sə ndje tə Ndjapä nə̂ ə̂dû amarä ne a? Ayî, tshə sə ndje tə Ndjapä nə̂ ə̂dû amarä, 30 mbrə ə̂në Ndjapä nə sə kʉ kpiabale. Tshə sə kə mbrə Ajuwufu tə aə̂rɔ̂ azü lə ala ye tə̂ äwä əpʉ lɔsu əndje â mbrə ndje azü ə̂në əndje sə sə tə Ajuwufu ne kɔ tə aə̂rɔ̂ azü lə ala ye tə̂ äwä əpʉ lɔsu əndje nə. 31 Rəkɔ, tə̂ äwä əpʉ lɔsu nə, a sə kə do âgbɔ̂ əpʉ nə tə amba ərə a? Bale ne! Bale rə, a sə kə mbrə ndəma âgbɔ̂ əpʉ nə.