Atos 2

Maalo ga Petili

14 Bai, Petili ngayi’ma papipi na balu' atumilwe bi’ngi' ku’mi na yumo, ngatumbwa kwaalya bandu kwa lilobe liku’lu', "Mwaayahudi ayangu' na mwenga mwaboti mwamutama ku Yelusalemu, mutange likowe li’no na munipi’kaniye. 15 Kakape bandu ba banalobyali kati mwamugania, kwa mwanjaa yi’no saa itatu ya kindai' bai. 16 Kakape panga likowe li' nga li’lu' lyalyaabayilwe na nnondoli ywa Nnu’ngu' Yoeli.

17 ‘Mumasu’ba galu' ga kuundi’la abaya Nnu’ngu',

naalu’a kunnyitanikia Loo wangu' panani ya bandu boti.

Bana binu analu’me na alwawa baalu’a londwa,

ansembe binu baalu’a gabona makowe gayambi',

na agoi baalu’a lota maloto.

18 Kakape, ata kwa atumisi bangu' analu’me na alwawa,

naalu’a kwayityanikia Loo wangu',

nabembe, baalu’a londwa.

19 Naalu’a panga mangelongelo kumaunde

na myasu miku’lu' padunia,

kwalu’a ba na myai, mwoto, na lyoi litopau.

20 Lisu’ba lyaalu’a ba mulubi’ndu' na mwei walu’a ba nkele kati myai,

kaliegelya isa lisu’ba liku’lu' lya ngama lya Bwana.

21 Kila mundu ywankema Bwana li’nga yangatiyilwa, aalu’a kosopolelwa.’"

22 "Mwenga mwa Isilaili, mupi’kani mayi’gi’yo ga ganigalongela! Nnu’ngu' aalayite mpu’la bai panga kakape antumike Yesu ywa Nasaleti. Aapangite nyo kwa ndi’la ya mangelongelo na myasu yaapangite pakati yinu, kati mwamumweni mwabene. 23 Nnu’ngu' aatangite no binia bu’ka kwai’mbu' panga Yesu aakamuyilwe mumaboko ginu, na mwenga kummulaga kwa kwalekya bandu alau bammambe munsalaba. 24 Lakini Nnu’ngu' ngannyu’ya bu’ka kuuwi’li, ngaankosopolya bu’ka mulwu’ngu' lwake. Kwa mwanjaa yaawesekineli ywembe kamulwa na makakala ga kuuwi’li. 25 Kwa mwanjaa Daudi aabaite nyinyo kwa ywembe ywo,

‘Naamweni Bwana nnu’ngi' yangu' masu’ba goti,

kwa mwanjaa abi kuluboko lwangu' lwamalyo, li’nga nakane tenandena.

26 Kwa nyo, mwoyo wangu' watenapusika,

kai' nilulutike ilulu yo napusika. Yi’ga yangu' yatama muu’bi’lyo,

27 kwa mwanjaa loo yangu' wailekali kumambi',

wala wannekali ywabile Mpeleteu wako abole.

28 Unilayite ndi’la ya bwu’mi,

wanitwi’li’ya pulaa panaaba papipi nawe.’"

29 "Mwaalongo bangu' ba ku Isilaili, mbala nimmakiange mpu’la gagampatike Daudi, tati' bitu. Ywembe aatiwaa no sikilwa, lisiko lyake libile papanopano mpaka li’no. 30 Lakini kwa mwanjaa aai nnondoli ywa Nnu’ngu', aatangite panga Nnu’ngu' aatikunnagya kwa kilapo panga ammi’ka yumo ywa lubelekwo lwake pakiti’gu' sake sa lenji. 31 Daudi aatumbwi wi’ti' kugabona makowe gagaalu’a pangilwa na Nnu’ngu' na nyo ngabaya kwa uyu’ki wa Kilisitu nsimu waabaite, ‘Analekelwali kumambi', wala yi’ga yake inabolali.’

32 "Nnu’ngu' annyu’yite Yesu na twenga twaboti nga twaakong’ondeli ba likowe lyo. 33 Nnu’ngu' amwu’bwiye Yesu na kummi’ka pandu pake pakummalyo, apoki bu’ka kwa Tati' li’lu' lilagano lya Loo Mpeleteu, naywembe aayitanikiye si’lu' samukibona nambi’yambi' na kukiyu’wa. 34 Kwa mwanjaa Daudi aai anau’bu’kali kunani, lakini aatibaya,

‘Bwana Nnu’ngu' aammakiye Bwana wangu',

Utame kummalyo gangu',

35 mpaka panaalu’a kwabi’ka andumu bako pai' ya magu’lu' gako.’

36 "Kwa nyo Isilaili yoti mutange kakape panga, yu’lu' Yesu ywamummambike munsalaba, Nnu’ngu' ampangite panga Bwana na Kilisitu!"

37 Bai, pabaagayu’wine mayi’gi’yo go, gaatikwalumiya mumyoyo yabe. Ngabaalaluya Petili na balu' atumilwe bi’ngi', "Mwaalongo bitu, tupange buli?"

38 Petili ngaayangwa, "Munng’alambuki Nnu’ngu' na kila yumo ywinu abatisilwe kwa lina lya Yesu Kilisitu, li’nga mupate samilwa masambi ginu no pokya yi’lu' upo ya Loo Mpeleteu. 39 Kwa mwanjaa lilagano li’no lyaai kwinu mwenga, bana binu, kwa balu' boti babatama kuutalu, na kwa kila mundu ywaalu’a kemelwa na Bwana Nnu’ngu' witu."

40 Petili aatikwakwi’li’ka kwa mayi’gi’yo gi’ngi' gambone na kwakong’ondelya, "Mwikosopoli bu’ka mulu’no lubelekwo lwakau." 41 Bai, baingi baatikugayi’ki’tya mayi’gi’yo gake Petili, ngababatisilwa. Na lisu’ba lyo bandu bateyongekeya ika kati mitumbi elupu itatu.