LUKA 1

Mwambo wa Zakalia

67 Zakalia tati' bake mwana, ngabatwi’li’yi’lwa na Loo Mpeleteu, no piya kilondwo si'.

68 "Akwi’yi’lwe Bwana Nnu’ngu' wa Isilaili!

Mwanjaa aatikwaisilya na kwakombwa bandu bake.

69 Atupei nkomboli wa kutukombwa,

mmelekwa kwa lukolo lwa Daudi, ntumisi wa Nnu’ngu'.

70 Mu’mu’lu’mu’lu' mwalongei bu’ka kwai’mbu',

kwa ndi’la ya alondoli bake apeleteu,

71 panga alu’a kutukombwa mmoko ga andumu bitu,

no bu’ka mumaboko ga boti babatusukwa.

72 Aabaite alu’a kwabi’kya kiya api’ndo bitu,

no ku’mbu’kya lilagano lyake lipeleteu.

73 Aalapi au’ku' bitu Bulaimu,

panga aalu’a tuyalya twenga.

74 Panga aatulagi kutukosopolya bu’ka mmoko ga andumu bitu,

tupate tumika pangali yogopa.

75 Kanetulemale myoyo na tubonekane twapeleteu nnu’ngi' yake,

masu’ba goti ga bwu’mi witu.

76 Nawenga wa mwana wangu' walu’a kemelwa wa nnondoli wa Nnu’ngu' nku’lu',

waalu’a kunnongolya Bwana, kumpetulya ndi’la yake,

77 Wabakiye bandu bake panga alu’a kwakosopolya,

kwo bu’yi’lwa masambi gabe.

78 Kwa kiya kiku’lu' sa Nnu’ngu' witu,

Atuumukulya bweya bu’ka kunani.

79 Na kwamulikya boti babatama mulubi’ndu' na kiwili sa kiwo,

alongoye nganjo yitu mundi’la ya amani."