Mateus 26

Ndi’la ya kummulaga Yesu

1 Yesu paayomwi longela ago goti, ngaabakia banamasi' bake, 2 "Mutangite panga bu’ka pa masu’ba gabi’li' kwaalu’a baa na si’li’ku’si’li’ku' ya Pasika. Lisu’ba lyo Mwana wa Mundu alu’a songelwa li’nga abambilwe."

3 Nsimu wo, api’ndo ba dini na api’ndo ba bandu baatikwembana pamope munyumba ya mpi’ndo nku’lu' wa dini ywakemelwa Kayafa. 4 Ngabasikisana ndi’la ya kummoywa Yesu kwa kinunu na kummulaga. 5 Lakini ngababaya, "Likowe li' kanelipangike lisu’ba lya si’li’ku’si’li’ku', kwa akane pitya puyo kwa bandu."

Yesu apakayilwa mauta ku Betania

6 Yesu paabile Betania munyumba ya Simoni, mwene matana. 7 Pabaabile nnyumba kabalya ayingi nnwawa yumo, abile na supa ya liwe yene mauta ga bei ngu’lu'. Ngagamiminia muntwe wa Yesu. 8 Banamasi' bake pabagabweni go ngabausika, ngababaya, "Kwa mwanjaa namani anyamaniye mali kati yi'? 9 Mauta ga gakapi’mi’yi’lwa kwa bei ngu’lu', na mbanje ye kwapeya aki’ba."

10 Yesu paakwipwi gabaganiyage, ngaabakia, "Kwa mwanjaa namani mumwauya mau' yu'? Ywembe anipangile likowe linannoga. 11 Aki’ba mubile nabo masu’ba goti, lakini nenga naabali na mwenga masu’ba goti. 12 Ayu' mau' animimini mauta ganannungya muyi’ga yangu' li’nga kwibi’ka wiso yi’ga yangu' kwo sikilwa. 13 Kakape nimmakianga, pandu popoti palu' mudunia yi’no kwayaalilwa Abali Inannoga yi', likowe li' lyalipangite mau' yu' lyalu’a tambulwa kwa kunku’mbu’kya ywembe."

Yuda amwa kunsongya Yesu

14 Bu’kapo Yuda Isikalioti, yumo ywa balu' banamasi' ku’mi na abi’li', ngayenda kwa api’ndo ba dini 15 na kwalaluya, "Mulu’a nipeya ki’li' mana nimmi’i Yesu mumaboko ginu?" Ngabammalangya ipande salasini ya mbanje. 16 Bu’ka lisu’ba lyo, Yuda aabile kapala lipala lya kunsongya Yesu.

Bi’ka wiso kalamu ya Pasika

17 Lisu’ba lyo tumbulya si’li’ku’si’li’ku' ya Makati Gangalu’la, banamasi' bannyendeli Yesu, ngabannaluya, "Kilyo sa Pasika upala tukakubi’ki wiso kwaku'?" 18 Ywembe ngayangwa, "Muyende kukilambo kwa mundu nsi’si', mukammakiye, ‘Mwalimu abaya, Lisu’ba lyangu' liegelile, nenga na banamasi' bangu' tupala panga ngu’mbu’ku’mbu' ya Pasika munyumba yako.’" 19 Kwa nyo, banamasi' ngabapanga kati mwababakiyilwe na Yesu, ngabaibi’ka wiso Pasika.

20 Pakupilile, Yesu ngatama pamesa pamope na banamasi' bake ku’mi na abi’li'. 21 Pabaabile kabalya, Yesu ngabaya, "Kakape nimmakianga, yumo mukipi’nga sinu alu’a nisongya." 22 Banamasi' baatiusunika muno, ngabatumbwa kunnaluya yumo yumo, "Bwana, nenga, au lili?" 23 Yesu ngaabakia, "Ywasuyite likati pamope nanenga mukibakuli, ngaywaalu’a nisongya. 24 Mwana wa Mundu ayenda kati mu’lu' Maandiko Mapeleteu mwagabaya, lakini akibona yu’lu' mundu ywaalu’a kunsongya! Ilu’e panga nantali mundu ywo akakotoka belekwa."

25 Yuda yu’lu' ywaapalage kunsongya Yesu ngalaluya, "Mwalimu! Nenga, au lili?" Yesu ngannyangwa, "Wenga wamwene ngawaubaya."

Kalamu ya Bwana

26 Pabaabile kabalya, Yesu ngatola likati, ngasukulu Nnu’ngu', ngalimetwana na kwapeya banamasi' bake kabaya, "Mutole mulye, yi’no nga yi’ga yangu'." 27 Bu’kapo ngatola nnobo wa divai no sukulu kabaya, "Munywelyange mwaboti munnobo wu’no. 28 Kwa mwanjaa yi’no nga myai yangu' yaikangamaya lilagano, iyitanika kwa kitumbu sa bandu baingi li’nga kwabu’ki’ya sambi.