1 Anzǝm mǝnia ka, Mǝtalabangŋo nacau nǝ Ibǝram aɓa sǝna ama:

<<Ɓangciu ɓǝ̀ kǝa pakko ɗàng,

Ibǝram,

Mǝ nda ntongŋo mò,

nggea tangnakusǝo mǝgule.>>*15:1 Ɓalli gbal aɓa: Nggur 33:29; 2Sam 22:3,31; Ang 3:3; 7:10.

2 Sǝ Ibǝram na ama, <<Mǝtalabangŋo Ɓakuli, mana nda ɓoaro mala tangnakusǝu mò abanam, yì mǝnana ǝn panǝ muna raka, kǝ muna-ɓala mem Eliyeza, ɓwa Damaska na nǝ̀ liɓala mem ngga?>> 3 Ibǝram na ɗǝm ama, <<A pam amuna ɗang; acemani ka, mǝtúró-ɓala mǝnana à ɓǝli a ɓala mem ngga nda nǝ̀ liɓala mem ngga ra.>>

4 Pǝlǝa cau mala Ɓakuli yiu a baní ama, <<Mǝnia yì ɓwa ka pà nǝ̀ liɓala mò ɗàng. Muna-ɓwabura mô mǝnana awu nǝ bǝl ka nda nǝ̀ liɓala mò ka.>> 5 Mǝtalabangŋo pǝlǝa pusǝì a nza, sǝ ne wi ama, <<Loasǝ mǝsǝo a kùli pé, sǝ ɓal anlero ɓǝ̀ a nǝ gandǝì ka.>> Sǝ ne wi ama, <<Mǝno ka nda làkkì mala amunio andǝ amǝ’keò.>>*15:5 Ɓalli gbal aɓa: Tite 22:17; 26:4; Pur 32:13; Nggur 1:10; 10:22; 1Acau 27:23; Rom 4:18; Ib 11:12.

6 Ibǝram earnǝ Mǝtalabangŋo, sǝ Mǝtalabangŋo twali yì ka mǝɓealɓoarna na.*15:6 Ɓalli gbal aɓa: Rom 4:3,9,22; Gal 3:6.

7 Nyar ɗǝm Mǝtalabangŋo ne wi ama, <<Mǝ nda Yahweh, mana pusǝo a purì ɓá nggea-là Ur a nzali mala amǝ’Chaldi ace po mǝnia yì nzali ɓǝ̀ duk girkuma mò ka.>>*15:7 Ɓalli gbal aɓa: Tite 12:1; Nehe 9:7-8; Atúró 7:2-4.

8 Sǝ Ibǝram ɗì ama, <<Mǝtalabangŋo, Ɓakuli, lang sǝ mǝ nǝ sǝlǝ ama mǝnia yì nzali ka nǝ̀ duk girkuma mem?>>

9 Mǝtalabangŋo nyesǝi wi ama, <<Yinǝàm nǝ muna-ndá, andǝ muna-mbul, andǝ muna-gam, komǝye ka mbule tàrú, atārǝia andǝ kutugangyi andǝ muna-kutumurǝm.>>

10 Ibǝram yinǝ agir mǝnia kat a baní, pǝlǝa komǝye ateà ka zanzǝi aɓalǝu ɓari, sǝ nongsǝ abare man a nkanggari arǝia. Sǝ mala anyal ka zanzǝia ɗàng. 11 Adǝkǝlaki yiu à yi sulǝo amur alúgir mǝnia à nǝ̀ lia sǝ Ibǝram pǝria. 12 Lang pwari na rǝ kpa ka, Ibǝram ko a nggea ntulo mǝlime, pǝlǝa ɓe pǝndǝa cikcik mǝpà ɓangciunì yi gir múrí. 13 Pǝlǝa Mǝtalabangŋo ne Ibǝram ama, <<Sǝlǝ fa ama amǝ’keò nǝ̀ nggá duk abǝri a ɓè nzali mǝnana malea na raka. Amǝ nzali mǝno nǝ̀ tsǝia à nǝ̀ duk aguro, à nǝ̀ paria aɓata tanni arǝ pǝlǝa gbǝman-ine (400).*15:13 Ɓalli gbal aɓa: Pur 12:40; Gal 3:17. 14 Sǝama mǝ nǝ lǝmdǝ ɓashi mem amur mǝno yì nzali nǝ̀ nggá dumsǝ aɓwana mô a guro ka. Nǝnzǝ́mò ka aɓwana mô nǝ̀ purî ɓá nzali mǝno, à nǝ̀ pur nǝ agirkuma mǝ’làkke a buia.*15:14 Ɓalli gbal aɓa: Pur 6:6; 7:4; 12:12. 15 Sǝ we ka, ɓǝ̀ a ena ě mǝɓoarne mala akapana ka, sǝ a wúnǝ́ wu aɓa rǝpwala. À nǝ̀ tsǝkbaniò atà akeô.*15:15 Ɓalli gbal aɓa: Tite 25:8. 16 A inea nza mala do ɓanza mala amunio andǝ amǝ’keò ka, à nǝ̀ nyare à nǝ̀ yiu a nzali mǝnia ɗǝm. Mǝno ka pà nǝ̀ pa adyan ɗang acemǝnana cauɓikea mala amǝ’Amor*15:16 cauɓikea mala amǝ’Amor Ɓalli aɓa: 1Amur 21:26; Amo 2:9 . malaká bik ban mǝnana nǝ̀ tsǝa mǝ nǝ tasǝ ɓashi mem amúrià ado ka ɗàng.>>

17 Lang pwari kpana sǝ ban bwalna ka, muna nkenye mana nǝ nkalang-bǝsa aɓalǝi kǝ loasǝ yele, andǝ ɓukan mana kǝ earki bǝsa ka, à yi puro sǝ à kùtí a nre ka anyama mǝnia à sangia ka.*15:17 Mǝnia ka nda lǝmdǝ ama Ɓakuli pana eare male arǝ kùrcau male mana pè nǝ Ibǝrayim ngga. A nza mǝno ka ɓǝ̀ ɓwa kùrcau ka, nǝ̀ lǝmdǝ ama mǝsǝcau na nakiyi ka nǝ pak gìr ani: nǝ̀ pwan-myal girkusǝu, nǝ̀ ɓwe sǝ nǝ̀ nongsǝ abare ɗàngɗáng. Nǝ̀ gya nǝ̀ kùtí a nre ka bare man sǝ nǝ̀ nggǝ bangcau ama, <<Mǝnia yì gìr ɓǝ̀ kumam ɓǝ̀n bwal kùrcau mǝnia raka.>> 18 A pwari mǝno ka Mǝtalabangŋo kùrcau nǝ Ibǝram ama, <<Mǝ nǝ pè amunio andǝ amǝ’keò nzali mǝnia, twal a kún myalmúr mala amǝ Masar aban ká kún nggeasala mǝgule, yi Yiufǝretis;*15:18 Ɓalli gbal aɓa: Tite 12:7; 13:15; 17:8; 24:7; 26:4; Ɓal 34:2; Pur 23:31; Ɓal 34:1-15; Nggur 1:7-8; 34:4; Jes 21:43; 2Amur 24:7; Nehe 9:8; Atúró 7:5. 19 kat andǝ nzali mala amǝ’Ken, andǝ amǝ’Keniz, andǝ amǝ’Kadǝmon, 20 andǝ amǝ’Hitti, andǝ amǝ’Periz, andǝ amǝ’Refa, 21 andǝ amǝ’Amor, andǝ amǝ’Kan’ana, andǝ amǝ’Girgash, sǝ amǝ’Jebus.>>