1 Adamu nongnǝ māmí Hawawu, pǝlǝa muna kpa a bum māmí, sǝ ɓǝl Kayinu. Pǝlǝa Hawawu bang ama, <<Nǝ ɓwamuru mala Mǝtalabangŋo ka, ǝn ɓǝlǝna muna-ɓwabura.>> 2 Nǝnzǝ́mò ka yi ɓǝl mǝ’eambi, tsǝki wi lullǝu ama Habila.

Habila twal túró yál agirkusǝu, sǝ Kayinu twal túró rya. 3 Lang kún pwan gir-ɓaban karna ka, Kayinu yinǝì Mǝtalabangŋo ɓoro mala aɓǝla agir-ɓaban.*4:3 Ɓalli gbal aɓa: Pur 23:19; 34:26; Nehe 10:35. 4 Sǝ Habila ka yinǝ ɓoro male mala agirkusǝu, atà amǝ’nyange mǝnana à ɓǝlia a dǝmba a domwan male ka. Mǝtalabangŋo earnǝ Habila andǝ ɓoro male.*4:4 Ɓalli gbal aɓa: Pur 13:12; Ɓal 18:17; Pas 3:9; Ib 11:4. 5 Sǝ mala Kayinu andǝ ɓoro male ka, Mǝtalabangŋo earnǝia ɗàng. Mǝnia ka tsǝk Kayinu bumi lul kǝ̀rkǝ́r, kara rǝmsǝ dǝmbì.

6 Pǝlǝa Mǝtalabangŋo ɗì Kayinu ama, <<Palang sǝ bumo lúllô? Palang sǝ a rǝmsǝ dǝmbò? 7 Ɓǝ̀ a pak gìr mǝnana mǝɓoarne na ka, à pà nǝ̀ eo re? Sǝ ɓǝ̀ a pàk mǝɓane ka, cauɓikea na kùmsǝó a kunɓala kǝ alte nǝ̀ parǒ aɓate ka, sǝama dumǝna púp wu limurǝm amurí.>>

8 Ɓè kǝ pwari ka Kayinu ne mǝ’eambi Habila ama, <<Tsǝktam a ɓabondo.>> Lang à nda ɓabondo ka, Kayinu kara lo bwal mǝ’eambi Habila wali wú.*4:8 Ɓalli gbal aɓa: Mat 23:35; Luk 11:51; 1Yoh 3:12-15; Yahu 11.

9 Mǝtalabangŋo ɗì Kayinu ama, <<Mǝ’eambo, Habila ka, nda kǝshe?>> Kara pǝlǝì Mǝtalabangŋo ama, <<Ən súrǝ̀ banì ɗàng. Nggeari ka, mǝ nda mǝ’yál mǝ’eambam le?>>

10 Mǝtalabangŋo ne wi ama, <<Mana man a pak ka? Kwakikiro! Nkila mǝ’kyauweo ka ndya kǝ ɓua abanam a nzali ka!*4:10 Ɓalli gbal aɓa: Ɓal 35:33; Nggur 21:1-9; Ib 12:24; Sǝn 6:9-10. 11 Adyan ngga, súban na amuro, sǝ à pǝrǝno a nzali mǝnana mǝn kúni kǝ nu nkila mǝ’eambo mǝnana a sukki ka.

12 <<Ɓǝ̀ a rik mǝnia yì nzali ka, pà nǝ̀ pusǝo kǝ girlina mǝɓoarne ɗàng. A dumǝna mǝgya-kusǝu, mǝnana pà nǝ̀ do aban mǝ mwashati a ɓanza raka.>> 13 Pǝlǝa Kayinu ne Mǝtalabangŋo ama, <<Tanni mala cauɓikea mem man kútì rǝcandǝa mem.*4:13 Tanni mala cauɓikea mem man kútì rǝcandǝa mem. Ko <<Gìrkwanban man kútì mana mǝ nǝ gandǝ twaltwale ka.>> 14 Yalung ngga a ndarǝ pǝram mǝ purî nzali mǝnia ka mǝ nying ɓadǝmbo; mǝ nǝ duk mǝgya-kusǝu a ɓanza, ban-usǝlǝo pa kàm a buam ɗàng, sǝ ɓwa mǝnana kat kumam ngga nǝ̀ wal-luem.>>

15 Sǝ Mǝtalabangŋo banggi wi ama, <<Pà nǝ̀ pa anggo ɗàng; ɓǝ̀ kǝ ɓwa wal-luio ka, mǝ nǝ wal atà aɓwana male tongno-nong-ɓari.>> Pǝlǝa Mǝtalabangŋo tsǝki Kayinu nyoulǝa ace mǝnana ɓǝ̀ kǝ ɓwa kumi ka, ɓǝ̀ kǝa wal-luí raka. 16 Nda Kayinu nying ɓadǝm Mǝtalabangŋo o kya do a nzali Nod, nǝ njar-takuli mala Iden ngga.

17 Kayinu nong nǝ māmí, sǝ muna kpa a bumi sǝ ɓǝl Inok. Kayinu ka nda aban ɓak nggea-là, sǝ lě ka tunǝi nǝ lullǝ muna-ɓwabura male Inok. 18 Inok ɓǝl muna-ɓwabura à tunǝi ama Irad. Irad yi ɓǝl muna-ɓwabura lùllǝì ama Mehujayel. Mehujayel yi duk tár Metushayel, sǝ Metushayel ka nda tár Lamek. 19 Lamek al amamǝna ɓari; māmí mǝdǝmbe ka nda Ada, sǝ ɓaria nda Zila. 20 Ada ɓǝl Jabal, mǝnana nda tár amǝ’do aɓalǝ agumli andǝ amǝ’yál agir ka. 21 Lullǝ mǝ’eambi nda Jubal, mǝnana nda tár amǝ’wal zangŋan andǝ amǝ’twang ntetu ka. 22 Zila gbal ka ɓǝl muna à tunǝi ama Tubal-Kayinu, mǝnana yi pǝlǝ mǝ’ntùl kǝ tulki ambalang agirtúró nǝ bolo-bángŋá andǝ bolo-candǝa ka. Mǝ’kyauwa Tubal-Kayinu muna-ɓwama nda Naama.

23 Lamek banggi amāmí ama,

<<Ada andǝ Zila, wu kwakikir wun arǝàm;

wun amālá Lamek, wu ok cau mem.

Ən walna-lú acemǝnana ɓwe tsǝkam penye ka,

Lagga ɓwa na ǝn wal-luí

acemǝnana tùlam ngga.

24 Ɓǝ̀ ayilǝmu tongno-nong-ɓari na à nǝ̀ ɗwanyi

ace wal-lú Kayinu ka,

ayilǝmu lumi-tongno-nong-ɓari

bwamdǝ tongno-nong-ɓari (77) na

à nǝ̀ ɗwanyi ace wal-luem ngga.>>

25 Adamu nyare nongnǝ māmí, pǝlǝa ɓǝlî wi ɓè muna-ɓwabura ɗǝm. Māmí tsǝki muna lullǝu ama Set. Ne ɓamúrì ama, <<Ɓakuli panam muna-ɓwabura a kun Habila mana Kayinu wal-luí ka.>>*4:25 Set nǝ kún Ibǝru ka ɓālǝi nda Pana. 26 Set gbal ka ɓǝl muna-ɓwabura, pǝlǝa tsǝki wi lullǝu ama Enosh.

A kǝ nzê mǝno ka sǝ aɓwapǝndǝa tita tunǝ lullǝ Mǝtalabangŋo aɓa peri.*4:26 Ɓalli gbal aɓa: Tite 12:8; 26:25; 1Amur 18:24; Ang 116:17; Jol 2:32; Zaf 3:9; 1Kor 1:2.