1 Beno lomba na Yave, yandi nokisa

mvula ya ndolo, ni Yave ke

nokisaka bamvula yina ke

vwandaka na mipepe ya ngolo,

banzasi mpe balusyemo.

Mpe yandi ke sala ti matiti

kumena bisika nyonso.

2 Biteki yina beno ke sambilaka

ke pesaka beno bamvutu ya luvunu,

banganga ya beno ke zabisaka beno

mambu ya luvunu, mpe bandosi yina

bawu ke zabisaka beno

ke na ndandu ve mpe

bankindusulu ya bawu kele ya mpamba,

ni yawu yina bantu ke na kudyengila mutindu,

nkonga ya mameme yina ke na kyadi

mpe me kondwa muvungi.

3 Yave ke na kutuba:

«Mu kele na nkele ya kulutila

samu na mivungi.

Mu ke pesa kitumbu na bankombo.

Samu ti, Yave Nzambi ya Binwani

me kwiza sadisa mameme ya yandi,

dikanda ya Yuda mpe yandi ke sala ti

bawu kuma mutindu mpunda

yina me nunga bamvita.

4 Bamfumu ya mutindu na mutindu

ke kwiza basika na kati ya dikanda

ya Yuda samu na kutwadisa yawu.

Yuda ke vwanda mutindu ditadi ya lufulu,

yandi ke vwanda mutindu

dikunzi ya yinzo, yandi ke vwanda

mpe mutindu munani ya mvita.

5 Mpe bawu ke vwanda mutindu binwani ya ngolo,

samu na kudyata bambeni ya bawu

mutindu fundu-fundu ya babala-bala.

Bawu ke nwana mutindu yina samu

ti Yave ke vwanda na bawu kintwadi

mpe bambeni ya bawu yina

ke nataka bampunda ke kufwa nsoni.

6 Mu ke kindisa dikanda ya Yuda,

mpe mu ke vuukisa dikanda ya Yosefi.

Mu ke vutula bawu na yinsi ya bawu

samu ti mu lakisa dyaka bawu luzolo

ya munu mutindu mu salaka

yawu ntete mu manga bawu.

Samu ti ni munu Yave, Nzambi ya bawu.

Mu ke pesa bawu mvutu

na balusambu ya bawu.

7 Dikanda ya Efalayime ke vwanda

mutindu muntu me nunga bamvita.

Bawu ke vwanda na nsayi mingi

mutindu bantu me kunwa vinu.

Ntangu bana ya bawu ke tala mutindu yina,

bawu ke yangalala mpe ke vwanda

na kyese mingi samu na Yave.

8 Na yina, mu ke bokila bantu ya munu

mpe mu ke vukisa bawu kisika mosi,

samu ti mu me kuula bawu mpe

bawu ke kuma mingi mutindu

bawu vwandaka ntete.

9 Mu me sala ti bawu

mwangana na bayinsi

mpe ata ti bawu vwanda ntama,

bawu ke bambukila munu moyo na lusambulu.

Bawu ke buta bana ya

babakala mpe bawu ke vutuka awa.

10 Mu ke basisa bawu na Ngipiti

mpe na Asili samu na kuvukisa

bawu kisika mosi.

Mu ke kotisa bawu na Ngalaade

mpe na Libane, kasi kisika

yango ke vwanda fyoti samu na bawu.

11 Na yina, mu ke lutisa bawu

na bantangu ya mpasi

mpe mu ke dingimisa mubu

mu ke yumisa nzadi ya Nile.

Lunangu ya bantu ya Asili

ke suka mpe bamfumu ya Ngipiti

ke vwanda dyaka ve na lutumu✝.

12 Mu ke kindisa bantu ya munu,

mpe bawu ke tambula

na nkumbu ya munu.

Ni munu Yave me tuba yawu.»