1 Yayi ni mambu ya Yave.

Ndinga ya Yave wakanaka katuka

na kizunga ya Adalake yawu kumaka na Damase,

samu ti Yave ke talaka ve kaka

makanda ya Isayeli, kasi yandi

ke talaka mpe bantu nyonso.

2 Ya kumaka mpe na mbanza ya Amate

yina kele pene-pene ya Damase,

Tile mpe Sidone yina kele bambanza

ya bantu yina ke na ndwenga.

3 Bantu ya mbanza Tile

tungaka bibaka ya bawu ya lukengolo.

Bawu kumaka na mbongo mingi

mutindu fundu-fundu ya ntoto,

bawu kumaka mpe na wolo

mingi mutindu munyenge.

4 Kasi Mfumu ke botola bimvwama ya bawu,

yandi ke bwisa bibaka ya bawu

na kati ya mubu, mpe mbanza

ya bawu ke nyenga na tiya.

5 Ntangu bantu ya mbanza

Asekelone ke tala mambu yayi,

bawu ke vwanda na boma.

Mpe bantu ya Ngaza ke tekita mingi.

Ekelone ke tala nsoni samu ti

yandi ke kuzwa dyaka ve lusalusu.

Ntinu ya Ngaza ke kufwa

mpe ata muntu ke zinga dyaka

na mbanza Asekelone.

6 Bana ya yinsi, bayina me butuka

na tata to mama ya nzenza

ke kwiza zinga na Asedode

mpe mu ke bwisa lunangu ya ba-Filisiti.

7 Mu ke sala ti bawu kudya dyaka ve

musuni ya kibulu na menga ya yawu

to yina ba ke pesaka mutindu makabu

na banzambi ya bawu ya biteki.

Na yina, ba-Filiseti yina ke bikana ke

kuma bantu ya Nzambi,

bawu ke kuma mutindu bantu

ya kifumba ya Yuda mpe bantu

ya mbanza Ekelone ke

kuma mutindu ba-Yebuse✝.

8 Mu ke vwanda pene-pene

ya Yinzo ya munu, samu na kukaya-meso

na bambeni yina ke lutaka kuna

konso ntangu.

Ata mbeni mosi ve ke kwamisa dyaka

dikanda ya munu, samu ti na

ntangu yayi, munu mosi

ke na kukengidila yawu.

9 Nge ndumba ya Siyone vwanda

na nsayi mingi, mpe ndumba

ya Yelusalemi, sala milolo ya nsayi,

tala ntinu ya nge ke na kukwiza

na sika ya nge, yandi kele ya

kusungama mpe yandi me nunga.

Yandi kele ya kukuluka, yandi me

yuluka na zulu ya mbuluku,

na zulu ya mwana ya mbuluku,

mwana ya mbuluku ya kento✝.

10 Yandi ke katula bapusu-pusu ya mvita,

na Efalayime mpe na Yelusalemi.

Yandi ke zenga munani ya mvita.

Yandi ke zonza mambu ya kizunu

samu na bayinsi.

Kimfumu ya yandi ke banda na mubu mosi tii

na mubu ya nkaka, mpe katuka nzadi

ya Efalate tii na bandilu ya ntoto.

11 Yave ke na kutuba:

«Na yina me tadila nge, samu na

ngwisani yina mu salaka na nge na

menga, mu ke basisa bankole ya nge

yina kele na kati ya dibulu yina me

kondwa maza.

12 Beno bankole yina kele

na kivuvu mingi,

beno vutuka na mbanza ya beno,

yina kele na bibaka ya ngolo,

bubu yayi mu ke tuba na beno,

mu ke sakumuna beno bambala zole.

13 Na yina, bantu ya dikanda Yuda

ke vwanda mutindu munani ya munu,

mpe bantu ya dikanda ya Efalayime ke vwanda

mutindu dyonga ya munu.

Mu ke fidisa bantu ya mbanza

Siyone samu ti bawu kwenda

nwanisa bantu ya yinsi ya Ngelese

mpe mu ke sala ti, bawu vwanda

mutindu mbele ya muntu yina ke

nwanaka bamvita.»

14 Na manima, Yave ke talana

na bantu ya yandi mpe dyonga

ya yandi ke basika mutindu lusyemo.

Mfumu Nzambi ke sika kulumenta,

mpe ke kwiza na kati-kati ya mupepe ya ngolo

yina me katuka na sude.

15 Yave, Nzambi ya Binwani

ke keba dikanda ya yandi.

Ba ke dyata mpe ke nika

bambeni ya bawu.

Ba ke kunwa mpe ke sala makelele

mutindu bantu me kola malafu,

ba ke fuluka na yawu mutindu

mbungu ya menga ya minkayulu

yina kele na bansongi ya kiyokolo ya minkayulu✝.

16 Na kilumbu yina, Yave Nzambi

ya bawu ke vuukisa bawu

mutindu muvungi ke vuukisaka

mameme ya yandi.

Bawu ke vwanda mutindu matadi ya ntalu,

bawu ke lezima na zulu ya ntoto.

17 Na yina, bantu ke kuma

kitoko mpe ke vwanda

na luzingu ya mbote!

Madya mpe vinu ke pesa ngolo

na bantwenya ya bakento

mpe ya babakala.