1 Na kilumbu ya yiya ya ngonda ya yivwa, ngonda yina ba ke bokilaka Kisilewu, na mvula ya yiya ya kintinu ya Dalyuse, Yave zabisaka mambu ya yandi na sika ya mumbikudi Zakali. 2 Bantu ya Betele fidisaka Salesele mpe Lengweme-Meleke na bantu ya yandi samu ti, bawu kwenda bondila Yave, 3 mpe na kuyufula banganga-Nzambi yina kele kuna na Yinzo ya Yave, Nzambi ya Binwani, mpe na mimbikudi kyuvu yayi: «Tii wapi ntangu beto ke tatamana na kudila mpe kumina nsoki na ngonda ya tanu, mutindu beto ke salaka yawu katuka ntama?» 4 Na yina, mambu ya Yave, Nzambi ya Binwani, kuminaka munu mutindu yayi: 5 Zabisa na bantu nyonso ya yinsi mpe na banganga-Nzambi ti:

«Ya me kuma bamvula makumi nsambwadi,

katuka ntangu yina beno bakaka lukanu

ya kumina nsoki

na kati ya bidilu kubanda na konso ngonda ya tanu

mpe na ngonda ya nsambwadi.

Beno minaka nsoki samu na munu?»

6 «Na ntangu beno ke kudyaka

mpe ke kunwaka, beno ke

salaka yawu ve samu na beno mosi?»

7 Ni mambu yayi ve, Yave zabisaka na mimbikudi ya ntete, ntangu yina mbanza Yelusalemi mpe bambanza yina kele pene-pene vwandaka na kati ya kizunu? Mpe bantu mingi vwandaka zinga na Nengeve mpe na Sefela.

8 Yave tubaka na Zakali mutindu yayi: 9 Yave, Nzambi ya Binwani ke na kutuba:

«Beno sala lufundusu ya kudedama,

beno salasana bumbote

mpe beno fwila bampangi kyadi.

10 Beno nyokola ve mifwidi

ya bakento, bansaana,

bantu ya nzenza mpe bamputu.

Beno vwanda ve na mabanza

ya kusalasana yimbi.»

11 «Kasi bawu mangaka na kuwa mpe bawu pesaka munu manima, bawu kangaka makutu ya bawu samu ti bawu kuwa ve. 12 Bantima ya bawu kumaka ngolo mutindu ditadi ya ntalu yina ba ke bokilaka dyamane*, samu na kuwa ve Musiku mpe mambu yina Yave, Nzambi ya Binwani, tubaka na mimbikudi ya ntete na nzila ya Mpeve ya yandi. Na yina, Yave, Nzambi ya Binwani, kumaka na nkele ya kulutila.» 13 Mutindu bawu kuwaka munu

ve ntangu yina mu bokilaka bawu,

munu mpe ke kuwa bawu ve ntangu yina

bawu ke bokila munu.

Ni Yave, Nzambi ya Binwani,

me tuba yawu.

14 Mu mwangisaka bawu

na bayinsi nyonso yina bawu

vwandaka zaba ve.

Na manima ya bawu,

yinsi ya bawu mpe mwanganaka,

ata muntu vwandaka tula dikulu kuna.

Yinsi yina vwandaka ya kitoko,

bawu kitulaka yawu yinsi ya kyadi.