1 Mambu ya Yave, Nzambi ya Binwani,

kuminaka munu mutindu yayi:

2 «Yave, Nzambi ya Binwani, ke na kutuba:

Mu ke na kimbanda ya kulutila samu

na Siyone, mu ke na nkele ya kulutila

mpe mu zola yandi mingi.

3 Yave ke na kutuba, mu ke vutuka

na Siyone mpe mu ke zinga

na kati-kati ya Yelusalemi.

Ba ke bokila Yelusalemi

"Mbanza ya kukwikama"

mpe mongo ya Yave, Nzambi

ya Binwani, ba ke bokila yawu

"Mongo ya longo."

4 Yave, Nzambi ya Binwani, ke na kutuba:

Biboba mingi ya bakento

mpe ya babakala,

konso muntu na yinti ya yandi na diboko,

bawu ke banda na kuvwandaka

dyaka na bisika yina bantu ke bakaka

mupepe na Yelusalemi.

5 Bisika yango ke fuluka dyaka

na bantwenya ya bakento

mpe ya babakala,

bawu ke banda na kwendaka sakana kuna.

6 Yave, Nzambi ya Binwani,

ke na kutuba ti,

kana bantu ya Isayeli, bayina

katukaka na yinsi ya nzenza

ke na kubanza ti mambu yayi

lenda kusalama ve na ntangu ya bawu,

munu mpe Yave, Nzambi ya Binwani, mu ke ndima ti

yawu lenda kusalama ve?

Ni munu Yave, Nzambi ya

Binwani, me tuba yawu.

7 Ni yawu yina, Yave, Nzambi ya

Binwani, ke na kutuba:

Ya tsyelika, mu ke kuula bantu

ya munu bayina kwendaka zinga

na bayinsi ya nzenza yina

kele na esete mpe na wesete.

8 Mu ke katula bawu kuna

mpe bawu ke kwiza zinga na Yelusalemi,

bawu ke vwanda bantu ya munu mpe mu

ke vwanda Nzambi ya bawu,

na kati ya kukwikama mpe ludedomo.»

9 Yave, Nzambi ya Binwani ke na kutuba:

«Beno vwanda na kibakala!

Beno bayina ke na kuwa mambu

yina mimbikudi tubaka, na

ntangu yina bantu vwandaka tunga lufulu,

samu na kutunga dyaka,

Yinzo ya Yave, Nzambi ya Binwani.

10 Na ntangu ya ntama, bantu vwandaka

kuzwa ve difuta ya bisalu ya bawu

mpe bibulu vwandaka na ndandu ve,

ata muntu vwandaka lenda na

kutambula na kimpwanza samu na bambeni,

mu salaka ti bantu kuwisana dyaka ve.

11 Kasi ntangu yayi, mu ke tala beno

mutindu mosi ve na bayina

katukaka na yinsi ya nzenza,

ni Yave, Nzambi ya Binwani, me tuba yawu.

12 Mu ke tula kizunu na kati-kati ya beno:

Bilanga ya bayinti ya vinu ke buta bambuma,

ntoto ke pesa madya mingi,

bamvula ke noka mingi mpe mu

ke pesa bima nyonso yayi

mutindu kimvwama

na sika ya bantu yayi, yina me bikana.

13 Beno bantu ya Yuda mpe ya Isayeli,

na ntangu yina beno vwandaka

na kati-kati ya bayinsi ya nkaka,

beno vwandaka mutindu bantu yina ke na nsingulu.

Kasi ntangu yayi, mu ke vuukisa beno

mpe mu ke sakumuna beno, beno tala

boma ve, beno vwanda na kibakala!»

14 Yave, Nzambi ya Binwani, ke na kutuba:

«Mu bakaka lukanu ya kupesa beno

kitumbu samu ti bankooko

ya beno pesaka munu nkele,

mpe mu sobaka ve lukanu ya munu.

15 Kasi, na ntangu yayi mu me soba lukanu ya munu,

mu me baka lukanu ya kusala beno mambu ya mbote.

Dikanda ya Yuda mpe ya Yelusalemi,

beno tala boma ve.

16 Beno ke sala mutindu yayi:

Beno sadila butsyelika na kati ya beno,

na bisika yina beno ke fundisaka bantu,

beno sala lufundusu ya kudedama,

yina ke pesaka kizunu.

17 Beno ke vwanda ve na dibanza

ya kusala yimbi na bampangi ya beno,

beno ke kudya ve bandefi ya luvunu,

samu ti mambu nyonso yayi,

mu ke yinaka yawu.

Ni Yave me tuba yawu.»

18 Mambu ya Yave, Nzambi ya Binwani, kuminaka munu mutindu yayi: 19 «Yave, Nzambi ya Binwani, ke na kutuba: Kumina nsoki ya ngonda ya yiya, ya ngonda ya tanu, ya ngonda ya nsambwadi mpe na ngonda ya kumi, yawu ke kituka bilumbu ya kyese, ya kilengi mpe ya mikembo samu na bantu ya Yuda.»

«Beno zola butsyelika mpe kizunu!»

20 Yave, Nzambi ya Binwani, ke na kutuba:

«Bantu mingi ke kwiza awa

mpe bambanza mingi ke butuka.

21 Na yina, bantu ya mbanza

mosi ke tuba na bantu ya mbanza

ya nkaka ti: "Beto kwenda

sambila mpe kusosa

kizizi ya Yave, Nzambi ya Binwani",

bantu ya nkaka ke vutula:

"Ee, beto ke kwenda kintwadi na beno."

22 Ya tsyelika, bantu mingi

mpe bantu ya bayinsi yina ke na lulendo,

ke kwiza awa na Yelusalemi,

samu na kusosa mpe samu na kubondila,

Yave, Nzambi ya Binwani.

23 Yave, Nzambi ya Binwani,

ke na kutuba, na bilumbu yina,

bantu kumi bayina ke zonzaka ve

ndinga mosi, ke simba Zwife mosi

na nsongi ya kinkuti ya yandi

mpe bawu ke tuba:

"Beto ke kwenda kintwadi na beno

samu ti beto kuwaka ti

Nzambi kele na beno." »