Zakali 5

Lumoni ya sambanu: Dibuku ya kuzingama

1 Na kati ya lumoni mu talaka dyaka, dibuku mosi vwandaka kwenda na zulu.

2 Mbazi yufulaka munu: «Yinki nge ke na kutala?» Mu vutulaka: «Mu ke na kutala dibuku mosi ke na kukwenda na zulu, yinda ya yawu kele Bakude makumi zole mpe nene ya yawu kele Bakude kumi✝5.2 Mba 6.15.» 3 Na yina, mbazi tubaka: «Ya kele ni nsingulu yina ke na kumwangana na yinsi nyonso, na lweka mosi ya dibuku yango ba sonikaka: Ba ke bingisa bantu nyonso yina ke labaka na yinsi, na lweka ya nkaka mpe ba sonikaka: Ba ke bingisa mpe bantu nyonso yina ke kudyaka bandefi ya luvunu na yinsi. 4 Yave, Nzambi ya Binwani ke fidisa yawu, samu ti yawu kota na yinzo ya konso muyibi mpe na yinzo ya konso muntu yina ke kudyaka bandefi ya luvunu na nkumbu ya yandi. Nsiingulu yango ke kota na kati ya yinzo mpe yawu ke nyengisa bima nyonso, ya vwanda mabaya to matadi.»

Lumoni ya nsambwadi: Kento yina kele na kati ya kipezolo ya Efa

5 Mbazi yina vwandaka zonza na munu tubaka: «Tala na zulu, yinki nge ke na kutala kuna?» 6 Mu yufulaka mbazi: «Ya kele yinki?» Yandi vutulaka: «Ya kele Efa✝5.6 Kbk 16.36 yina ke na kubelama mpe yawu kele ya kufuluka na masumu ya bantu nyonso ya yinsi.»

7 Na mpamukunu, kitapu ya kokote yina vwandaka na zulu ya Efa✝5.7 Kbk 16.36 fungukaka mpe mu talaka kento mosi ya kuvwanda na kati ya Efa yango. 8 Mbazi tubaka na munu: «Kento yayi kele kidimbu ya mambu nyonso ya yimbi.»

Mbazi vutulaka kento yango na kati ya Efa✝5.8 Efa Kbk 16.36, yandi bakaka kitapu ya kokote mpe kangaka Efa yango. 9 Na manima, mu talaka dyaka na zulu, mu talaka bakento zole yina vwandaka belama mpe bawu vwandaka pumbuka. Mupepe vwandaka fula na mapapu ya bawu. Mapapu yango vwandaka mutindu mapapu ya ndeke yina ba ke bokilaka singonye*5.9 Singonye Ya kele ndeke mosi ya nene yina ke bwilaka bambisi ya moyo na maza. Bakento yango nangunaka Efa✝5.9 Kbk 16.36 mpe bawu nataka yawu na kati-kati ya zulu. 10 Na yina, mu yufulaka mbazi: «Wapi kisika bawu ke na kunata Efa✝5.10 Kbk 16.36?» 11 Mbazi vutulaka: «Bawu ke na kunata yawu na Babilone, bawu ke tungila yawu yinzo mpe ni kuna ba ke tula kitunga yango samu ti yawu vwanda kuna.»