1 Ki ebvaan obɛɛl o ntwel? Oyɔ ndɔɔ yi ngwel! Kɛn a yɔɔl kwɛn mɛ̃ ngyɛɛn byɛ me ndɔɔ emwɛn bvi esuo Mfam y’ãndɔɔ m’eyɛɛl ndɛ mɛ̃. 2 Mɛ̃ ngyɛɛ mbuul ngɔmɔ̃ wu ɔ̃yio a Mãsia. Emeesa mvel kuun ye nã, Nziã ándɛɛl ndɛ ke ywel tiil ke mboo yi eli ndɛ. Ndɔɔ oyɔ ébwel me nzuru a ndɛ yi ombuul wuo onse emwɛn? Mɛ̃ ke ngyɛɛ wɛ! Nziã ndyam oyɛɛ. 3 Mɛ̃ ngyɛɛ kwɛn Nziã ándɛɛl mbuul ondɛ tiil ke paladi. Ándɛɛl ndɛ me nzuru a ndɛ yi ombuul wuo onse emwɛn? Mɛ̃ ke ngyɛɛ wɛ, Nziã ndyam oyɛɛ. 4 Ándɛɛl ndɛ tiil ke paladi, bvool ndɛ áyoo ãndoo m’ɛ̃kam, mɛn k’awi mbuul nkuul yi ayɛɛn mɔ̃ wɛ. 5 Mbuul wu obobɔ, wu èbɛɛl mɛ̃ ntwel me ndɛ. Kɛn a me b’otal myam, mɛ̃ k’ebɛɛl ntwel me ndɔɔ nkyam wɛ, mɛ̃ èbɛɛl ntwel kɛn a m’okwal o mɛ̃. 6 Okɛɛn mɛ̃ edzii k’ebɛɛl ntwel, mɛ̃ k’ekeekal nga-laa wɛ, ke ngwel wɛ mɛ̃ ekeeyɛɛn kɛn otaa-taa. Kɛn a mɛ̃ k’esa obobɔ wɛ, kwɛn baal abee mɛ̃ lweel owa li enduru m’emwɛn bɔ ye m’eyoo bɔ m’ãfa ola mɛ̃.

7 Kɛn a me ndɔɔ yɛn mɛ̃ mbee okal y’ondɛɛl o nzuru me ndɔɔ emwɛn bvi ɛ̃kam obvɛ, awi mɛ̃ fool lɛn onge nsiɛɛn yi apio onse nzuru, onge ãnzwel m’eyuɔɔl Satana, me ndɔɔ yi atuaal mɛ̃ mpal, kwɛn mɛ̃ mbee y’ondɛɛl o nzuru okal. 8 Nsa tyel, mɛ̃ mbuɛɛn Mfam, kwɛn ndɛ ambaal mɛ̃ nsiɛɛn oyɔ. 9 Kɛn a ndɛ obveel mɛ̃ bubu: «Nyiĩ a mɛ̃ eluɔ ki ekoo me yɛ, ke ngwel wɛ, waan e mɛ̃ ebemɔɔn ŋ’eli yɛ onse okwal.» Obobɔ, mɛ̃ èbɛɛl ntwel a mɛ̃ ɔ̃kwal ngɔmɔ̃ onse okwal o mɛ̃, kwɛn waan e Mãsia emɔɔn onse mɛ̃. 10 M’emfa okyɛ, mɛ̃ esia mpaa onse okwal, onse ɛ̃tswɛ, onse otuaal o mpal, onse ãwua, me ndɔɔ a Mãsia. Ngwanyã, ŋendi mɛ̃ onse okwal, ŋendi mɛ̃ ye mpɛn.

11 Byɛ eywɛɛn mɛ̃ k’ekal nga-laa. B’akaalweel mɛ̃ mpii byɛ! Ke ngwel wɛ, mɛ̃ ke ndi ye ndɔɔ yi mvool mɛ̃ mbee a bɛn ndiri antam b’anɛn wɛ, onkyam ŋɛn mɛ̃ ke ndi y’otsɛn wɛ. 12 Eliĩ bvi esuo kwɛn mɛ̃ ndi ntam ola byɛ bvɛ bvi: Osɛ-mwiĩ o mɛ̃ bo bibi onse ɛ̃mbio, emvieel, y’emwã bvi emfa bwɛn emfa. 13 Eluɔ emã ki ebɔɔ byɛ ki ebvool mbee a ki ebɔɔ ãbvɔɔn mãkyɛ? Ndɔɔ kɛn a yɛn mɛ̃ k’eli pfuũ me ndɔɔ a byɛ wɛ. Oŋɔ̃ edzeel mɛ̃ me ndɔɔ a ndɔɔ yi mbi oyɔ!

14 Mɛ̃ emeewal ɔ̃yɛɛl wu eyetal byɛ li nsa tyel, bvool mɛ̃ hɛ̃ k’èkal mfuũ me ndɔɔ a byɛ wɛ. Ke ngwel wɛ, ki ebii mɛ̃ k’opfel o byɛ wɛ, eli byam. Ke yam, baan k’abvool opfel me ndɔɔ aburu wɛ, aburu baal b’abvool opfel me ndɔɔ a baan. 15 Me b’otal mɛ̃, mɛ̃ èwa eluɔ e mɛ̃ bvieel ɔ̃kwal ngɔmɔ̃, bvool èwa onkyam omwiĩ o mɛ̃ me ndɔɔ a byɛ. Okɛɛn mɛ̃ nzii byɛ bibi m’emfa okyɛ, byɛ ol’edzii mɛ̃ etsi-etsiri?

16 Okɛɛn mɛ̃ k’eli pfuũ me ndɔɔ a byɛ wɛ, bakyɛ áketsam ndiri mɛ̃ ndi y’ãyal m’ãbi-ãbi, mɛ̃ éywiin byɛ bɛɛ. 17 Onse baal b’eyuɔɔl mɛ̃ byɛ, eli ye ngɔmɔ̃ wɛn me nkuul a ndɛ mɛ̃ ntwel bvel e byɛ? 18 Mɛ̃ esɔɔ Tite k’ayi ola byɛ. Mɛ̃ hɛ̃ eyuɔɔl ndoo ngɔmɔ̃ wa dzii ye ndɛ. Tite opfel o byɛ awel m’ãyal m’ãbi-ãbi? Bia-ndɛ k’eli ãtsam ngãmɔ̃ wɛ? Ndɛ k’aluɛɛn nkuul mɛ̃ wɛ?

19 Etel-nziil, byɛ ebetsam wɛn, bee ebebii ɛ̃dzoo ke nkwel a byɛ. Hɛɛ̃-hɛ̃, bee ebeyɛɛn ke nkwel a Nziã, onse bvoo a bee ye Mãsia. Andoo, bee esa ãndɔɔ omɔ̃ mbueel me ndɔɔ yɛn byɛ ekwel onse okiool. 20 Ke ngwel wɛ, ŋ’èyeya mɛ̃, mɛ̃ ndi ye buɔ owɛɛl mɛ̃ ke yembɔɔ byɛ m’emfa ki nzii mɛ̃ wɛ, wuo byɛ emwɛn mɛ̃ m’emfa kyɛn byɛ k’edzii wɛ. Mɛ̃ eli ye buɔ owɛɛl mɛ̃ yemwɛn ãndɔɔ mã onse byɛ: Obel, ɔ̃kwal-nsɔɔ, mpuru, ombɔɔ, kwee, ɛ̃tswɛ, ondɛɛl o nzuru y’ɛ̃tsab. 21 Ŋ’èya mɛ̃ ola byɛ bvool, mɛ̃ ndi ye buɔ kwɛn Nziã awa mɛ̃ opfuru bvool onse byɛ, bvool kwɛn mɛ̃ mbee olel bibi me ndɔɔ a b’ási obi ŋ’ɛ̃kwel. Bɔ k’ayɔɔl m’ékesa bɔ mã wɛ: Ãndɔɔ mã mbiin, obvool o ntal ye mbuul wɛn byɛ kɛn ebaal bakyɛ wɛ y’ãndɔɔ m’esio ãkyam.