Hebreus 10

1 Ngel eli kɛn a edzel-a-dzel bvi eluɔ bvi ekieel eya, ke mɔ̃-a-mɔ̃ wɛ. Obɔ otsɛn bɛn, yɔ k'ekoo bam k'esuul baal b'asyal tsotsoo a Nziã akal ɔ̃koo wɛ, onkyam ŋɛn mvel bwɛn a mvel ákewa ãmpɔɔ m'emfa kiki ãlio mbueel. 2 Okɛɛn Ngel al'ekoo k'esuul baal ɔ̃koo, kɛn etel-nziil, baal b'abewa ãmpɔɔ omɔ̃ ámaayɔɔl mɔ̃ owa, me ndɔɔ yɛn bɔ ol'áyii tsɛtsɛ sa ngelemɔ ɔ̃bu, bvool k'abekal y'ãtsam m'ãbi ã bɔ wɛ. 3 Ke yam, ãmpɔɔ mã mvel bwɛn a mvel omɔ̃, ákeyeel bɔ ãbi ã bɔ. 4 Ke ngwel wɛ, ãkel m'alam b'angwɛmbɛ ye m'alam b'antab k'ãkoo bam k'ãmbaal ãbi wɛ.

5 Obɔ otsɛn bɛn, ŋ'eyi Mãsia m'ɔ̃kiri wu, ndɛ olieel Nziã ndiri:

«Ãmpɔɔ y'ãkab,

yɛ k'ádzii mɔ̃ wɛ!

Ke mboo a mɔ̃,

yɛ buo mɛ̃ nzuru!

6 Onkyam ãmpɔɔ m'ãbedziool mam mbueel y'ãmpɔɔ m'odzeel b'ãbi,

yɛ hɛ̃ k'ásia mpaa me mɔ̃ wɛ!

7 Obobɔ, mɛ̃ ndieel wɛn:

"Ee Nziã, mɛ̃ bu, mɛ̃ ngyii,

mɛ̃ ngyii me ndɔɔ yi esa ãndɔɔ m'edzii yɛ,

m'emfa ki ákel me ndɔɔ a mɛ̃,

onse Ɔ̃nkaan wa ngel."»

8 Ŋ'ɛ̃kwel kɛn ndɛ olieel ndiri: «Yɛ ke dzii bvool ke sia mpaa m'ãmpɔɔ y'ãkab wɛ, m'ãmpɔɔ m'ãbedziool mam mbueel wɛ, m'ãmpɔɔ m'odzeel b'ãbi wɛ.» Kwɛn ŋɛn ákewa mɔ̃ m'emfa ki etam Ngel. 9 Ndɛ bvool olweel ndiri: «Mɛ̃ bu, mɛ̃ ngyi me ndɔɔ yi esa b'edzii yɛ». Ŋɛn ndɛ ombaal emfa ki ɛ̃kwel ki obuɛɛn, bu akiil ki bviaal ke mboo a kyɛ. 10 Yeso Mãsia osi b'edzii Nziã: Ndɛ owi nzuru a ndɛ me ndyam sa ngemɔ̃ ɔ̃bu. M'emfa okyɛ, bia-byɛ eyii ba ngel.

Okal ɔ̃koo me bvoo ye Mãsia

11 Ngaa-a-Nziã wueel áketɛɛn tsoo bwɛn a tsoo me ndɔɔ yi asa ɔ̃sal a ndɛ. Ndɛ ákewa ãmpɔɔ mamã nsa bibi, mɛn k'ãkoo bam k'ãmbaal ãbi wɛ. 12 Kɛn a Mãsia, ke mbee a ŋ'éwi ndɛ mpɔɔ sa ngemɔ̃ ɔ̃bu me ndɔɔ ãbi, ndɛ ábvi nsɛn me kuɔɔl e Nziã ki elam. 13 Oŋɔ̃, ndɛ abekiaal tiil tsoo li èsuul Nziã ataal a ndɛ ke nsɛn a ntaã e ndɛ. 14 Ke ngwel wɛ, me mpɔɔ kɛn a ngamɔ̃, Mãsia ámaasuul baal ɔ̃koo ɔ̃bu nzal ɔ̃bu, baal obɔ b'émeesuul ndɛ áyii ba ngel.

15 Ɔ̃fel wu Ɔ̃nsensal hɛ̃ atsweel bia-byɛ yɔ. Ke ngwel wɛ, ndɛ ŋ'ɛ̃kwel álieel ndiri: 16 Mɛ̃ wu Mfam ndieel bubu: «Tal Ondoo b'ekieel etɛn mɛ̃ ye bɔ ke mbee ãtsoo omɔ̃. Mɛ̃ ekieel elɔ ãngel ã mɛ̃ onse ɛ̃kwal ɛ̃ bɔ, mɛ̃ hɛ̃ ekieel epuul mɔ̃ onse ãtsam ã bɔ. 17 Mɛ̃ bvool kieel k'ebeyeel ãbi ã bɔ y'elyal e bɔ wɛ.» 18 Onge bɛn Nziã odzeel ãbi ã baal ɔ̃bu, otsɛn bvool b'awa ãmpɔɔ me ndɔɔ a ãbi k'obekal wɛ.

Okal y'osɛ-mwiĩ

19 Obobɔ, andoo a dzii, bia-byɛ eli y'ãŋã m'esam ɔ̃kwɛɛl pyɛ onse mboo yi enduru ɔ̃nsensal me nkuul a ãkel ã Yeso. 20 Ndɛ ámaadzweel bia-byɛ nkuul yi enyiɔɔn bvool yi ebiri k'elaã. Ndyam ábwel me yɔ, me nkuul a lido li onse mboo yi enduru ɔ̃nsensal, ŋ'ayɛɛn ndiri nzuru a ndyam. 21 Bia-byɛ bvool eli ye Ngaa-a-Nziã wu ɔ̃nɛn wu ásuul Mfam a Nzɔ a Nziã. 22 Obobɔ, esyal tsotsoo a Nziã ɔ̃kwal kal, y'okiool b'ɔ̃koo, y'ɔ̃kwal wa amaasuɔɔl m'ãtsam mbueel m'ãbi-ãbi, ye nzuru yi amaasuɔɔl m'ãdza mã tsɛtsɛ. 23 Enɔɔn k'eta kaã e bia-byɛ ke nkwel a Nziã, owɔɔl wɛ, ke ngwel wɛ, Nziã wu áwi bia-byɛ lɔɔ, oli wu obvaan m'okiool. 24 Bia-byɛ ewuaal a bakyɛ, ewa bakyɛ mpɛn k'ekal onse dzii bvool k'esa ɛ̃sal mi ngesɛ. 25 Ebee ãbvɔɔn ã bia-byɛ obal, onge b'emeenam bakyɛ obesa. Kɛn bia-byɛ ewɛɛl bakyɛ, onge b'emwɛn byɛ kwɛn tsoo e Mfam eyii tsotsoo.

26 Ke ngwel wɛ, ke mbee a ŋ'emeeyɛɛ bia-byɛ otaa-taa, okɛɛn bia-byɛ ebesa obi kɛn osa me nkoo, mpɔɔ nkyam bvool k'ebekal wɛ yi embaal ãbi. 27 Esiil kɛn a k'ekiaal y'ongɛɛ bueel otsiil b'ekieel etsiil Nziã ãndɔɔ ã baal ye mbaa yi kɔɔ-kɔɔ yi ekieel edziool baal b'abee k'alweel ndɛ. 28 Okɛɛn mbuul ofel Ngel a Moyize, abebam ndɛ nyiĩ pyɛ, ŋɛn amwɛn buaal wuo atyel atsweel ndiri ndɛ osi obi. 29 Oŋɔ̃ etumbu ol'ekal bwɛn ki akieel awa mbuul wu omwɛn Muaan a Nziã ngwel, wu opfiɔɔl ãkel m'ondoo m'ã́mbaal ãbi ã ndɛ, bvool wu otoo Ɔ̃fel wu áyi a ndɛ nyiĩ a Nziã? 30 Ke ngwel wɛ, bia-byɛ eyɛɛ wu álieel ndiri:

«Mɛ̃ wu ebveel obi m'obi, mɛ̃ wu èwa furu e ndɔɔ yueel», bvool ndiri:

«Mfam akieel atsiil ãndɔɔ ã baal a ndɛ.»

31 Eli ndɔɔ yi ongɛɛ bibi k'abva me mviɔɔl ɛ̃ Nziã wa mwiĩ.

32 Emeetsam m'ãtsoo m'obɛɛn, mɛn ŋ'édzw eel Nziã byɛ mviil, byɛ ékuru ɛ̃kwal onse ãmpal bibi m'édzwaan a byɛ. 33 Ke ngwel wɛ, lio likyɛ, áketoo bvool áketuaal byɛ mpal ke mviil ã baal. Lio likyɛ hɛ̃, byɛ ékemwɛn fool bvoo ye baal bakyɛ bɛn áketuaal bɔ mpal yi emfa kiki. 34 Ke ngwel wɛ, byɛ émwɛn fool bvoo ye baal a bwal, bvool byɛ ékiool kwɛn awɛɛl eluɔ e byɛ y'esɛ kieel, me ndɔɔ yɛn byɛ eyɛɛ wɛn byɛ eli y'opfel b'onduru obvɛn bvool b'ɔ̃bu. 35 Obobɔ, ebee ãŋã e byɛ oyɔɔl, ke ngwel wɛ furu li enɛn ekuru nzuru me mɔ̃. 36 Ke ngwel wɛ, ebvaan byɛ ekal y'osɛ-mwiĩ, kwɛn ke mbee a ŋ'esi byɛ b'edzii Nziã, byɛ ebɔɔ ki éwi ndɛ lɔɔ. 37 Ke ngwel wɛ, ákel bubu:

«Esiil kɛn etsi-tsiri, kyam kɛn etsi-tsiri,

mbuul wɛn ebvaan aya, àya,

ndɛ kieel k'ayiil wɛ.

38 Kɛn a mbuul a mɛ̃ wa dzu akieel akal y'elaã m'okiool.

Kɛn a ndɛ abvool mbee, mɛ̃ k'èbesia mpaa me ndɛ wɛ.»

39 Bia-byɛ, bia-byɛ k'eli m'ɔ̃luo a baal b'abvool mbee kwɛn edziɔɔn wɛ. Kɛn a bia-byɛ eli m'ɔ̃luo a baal b'ali y'okiool, me ndɔɔ yi ebvuul omwiĩ o bia-byɛ.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?