Yeso oli Ngaa-a-Nziã a bia-byɛ wu ɔ̃nɛn
1 Ngo-ngoo a ndɔɔ onse ãyɛɛn m’ebeyɛɛn bee ndɛ bu: Bia-byɛ eli ye Ngaa-a-Nziã wu ɔ̃nɛn wa m’emfa okyɛ. Ndɛ ábvi nsɛn ke ywel me kuɔɔl ki elam ki kiri li Okwɛn e Nziã, waan li enɛn8.1 Ãnz 110.1. 2 Okɔ, ndɛ abesa ɔ̃sal onse mboo yi enduru ɔ̃nsensal, ŋ’ayɛɛn ndiri onse sɛɛ wa taa-taa, wu étuu Mfam, ke baal wɛ.
3 Ke ngwel wɛ, ngaa-a-Nziã wu ɔ̃nɛn wueel, abesuul ndɛ onse ɔ̃sal a Nziã me ndɔɔ yi abewa Nziã ãkab ye mpɔɔ. Obobɔ, ebvaan hɛ̃ Yeso akal y’eluɔ ki awa Nziã ãkab. 4 Okɛɛn ndɛ áli me nsie, kɛn ndɛ k’ákaakal si ekal Ngaa-a-Nziã wɛ. Ke ngwel wɛ, me nsie ŋã angaa-a-Nziã ali, b’abewa Nziã ãkab m’emfa ki etam Ngel. 5 Ɔ̃sal wu ebesa bɔ oli edzel-a-dzel bvool oli emfa ki ãndɔɔ m’ãli ke ywel. Obɔ otsɛn bɛn, ŋ’éketuu Moyize sɛɛ, Nziã áwi ndɛ ãnkunkwa ndiri: «Tal ngesɛ, bvool sa ɔ̃sal wueel, luɛɛn emfa ki nsuo mɛ̃ yɛ ke ywel a nkio8.5 Opa 25.40.»
6 Kɛn a meba, Yeso oli y’ɔ̃sal wu onduru ɔ̃bvɛn. Ke ngwel wɛ, ndɛ oli mbuul wu abveel ondoo onse Ondoo b’onduru obvie, Ondoo b’átuu ke ywel ãlɔɔ m’ãnduru obvie.
7 Ke ngwel wɛ, okɛɛn Ondoo b’ɛ̃kwel óywɛn elyal, kɛn Nziã k’ákaaswɛɛl bɔ me bo buaal wɛ. 8 Ke ngwel wɛ, Nziã áyɛɛn ye baal a ndɛ m’emfa ki owa o mbyel, ŋ’élieel ndɛ ndiri:
«Mfam olieel ndiri: M’ãtsoo m’ãya,
mɛ̃ ekieel etɛn Ondoo b’alili
ye baal b’Isalayel ye ba Yuda.
9 Bɔ k’òkal onge ondoo b’étɛn mɛ̃ y’ankiɔɔn a bɔ wɛ,
ŋ’ésiin mɛ̃ bɔ me kuɔɔl me ndɔɔ yi epaal bɔ k’Edzipito,
me ndɔɔ yɛn bam k’ákuru nzuru m’ondoo o mɛ̃ wɛ,
mɛ̃ hɛ̃ bu ngiri bɔ, wu ayɛɛn mɛ̃ wu Mfam.
10 Tal Ondoo b’ekieel etɛn mɛ̃ ye baal b’Isalayel,
ke mbee ãtsoo omɔ̃, wu ayɛɛn mɛ̃ wu Mfam:
mɛ̃ ekieel elɔ ãngel ã mɛ̃ onse ãtsam ã bɔ,
mɛ̃ ekieel epuul mɔ̃ onse ɛ̃kwal ɛ̃ bɔ.
Mɛ̃ ekieel ekal Nziã a bɔ,
bvool bɔ akieel akal baal a mɛ̃.
11 Mbuul si ngɔmɔ̃ bvool kieel k’abetee wumɔ̃ wu ɔ̃kiri a ndɛ wɛ,
wuo mbuul si ngɔmɔ̃ kieel k’abetee muaan-ngoo a ndɛ wɛ ndiri: "Yio k’ayɛɛ Mfam!"
Ke ngwel wɛ, bɔ bueel akieel ayɛɛ mɛ̃,
bɛɛn me wu onduru obwee tiil wu onduru oyal.
12 Me ndɔɔ yɛn mɛ̃ ekieel edzeel elyal e bɔ, mɛ̃ bvool kieel k’ebeyeel ãbi ã bɔ wɛ8.12 Dze 31.31-34.»
13 Ŋ’eyɛɛn Nziã me ndɔɔ Ondoo ba m’Ondoo b'«alili», ŋɛn b’ɛ̃kwel oyii bo tsɔɔn. Eluɔ ki eyii ki tsɔɔn bvool ki emeeyal, ŋ’eyii eyi k’odziɔɔn.