1 Obɔbɔ, bia-byɛ eyɔɔl endɔ-ndɔɔ bvi etsi-etsi bvi ɛ̃kwel bvi etal Endɔɔ e Mãsia, enɔɔn ãtee m’ãbvaan me baal b’amaayal onse okiool. Bia-byɛ ebee obvool k’ãtee m’obɛɛn m’ãtal okaal b’ɛ̃kwal, m’ãtal oyɔɔl b’ãndɔɔ m’ãbiri k’epfu, m’ãtal okiool o Nziã, 2 m’ãtal ãtee m’opongo, m’ãtal ondɔɔl o baal mviɔɔl, m’ãtal osiool o b’ákwi-ákwi bvool m’ãtal otsiil b’ãndɔɔ ã baal ɔ̃bu. 3 Omɔ̃ ãndɔɔ m’ekieel esa bia-byɛ, okɛɛn Nziã owi bia-byɛ mpwee.
4 Me b’otal baal b’émeeyɛɛl Nziã, b’ámaambio ãkab ã Nziã, b’ámaayɔɔ Ɔ̃fel wu Ɔ̃nsensal, 5 b’ámaayoo esɛ ki Endɔɔ e Nziã li ebvɛ-ebvɛ, ye waan li ɔ̃kiri wu àya, 6 ŋɛn bɔ abvi, k’akoo bam bvool k’abiri bɔ k’okaal b’ɔ̃kwal wɛ. Ke ngwel wɛ, bɔ bvool ŋ’abebɛɛl Muaan a Nziã m’enkulusu, me ndɔɔ a bam, bvool abewa ndɛ opfuru ke mviil ã baal bueel.
7 Ŋɛn nsie yi ébueel ébueel amvel eburu ɛ̃ti mi ɛ̃bvɛ-ɛ̃bvɛ me ndɔɔ a bɛn asal yɔ me ndɔɔ a bɔ, Nziã abendɔɔl yɔ kuɔɔl. 8 Kɛn a ŋɛn yɔ epaal ãngɔ-ngɔɔ̃ y’ɛ̃ti mi ãnsiɛɛn mikyɛ, yɔ k’ebekal y’otsɛn wɛ. Oyiil wɛ, Nziã àbwel yɔ enkɛɛ, ntɔ a yɔ kɛn odzio o mbaa6.8 Obɛ 3.17-18.
9 Andoo a dzii, onkyam ŋɛn bee eyɛɛn obobɔ, bee ekiool bam wɛn, eluɔ ki enduru obvie ebekiaal byɛ, eluɔ okyɛ obvuul. 10 Ke ngwel wɛ, Nziã k’akwɛɛn k’akal dzu wɛ, ndɛ k’adzɛɛn ɔ̃sal a byɛ wɛ, k’adzɛɛn hɛ̃ dzii li esuo byɛ me ndɔɔ a nkuũ a ndɛ wɛ, y’emfa ki éwueel a byɛ bvool ki ebewuaal a byɛ baal a Nziã kɛn onge owuaal wɛ. 11 Bee edzii kwɛn mbuul bwɛn a mbuul onse byɛ asuo ɔ̃kwal mbaa awuwu tiil ntɔ, kwɛn oŋɔ̃ ãndɔɔ m’ebeta byɛ kaã ãkal ɔ̃koo, 12 me ndɔɔ yɛn, byɛ ebee y’obwal okal, kɛn a byɛ ekal b’anɔɔn a kuul e baal bɛn m’okiool y’osɛ-mwiĩ, abɔɔ ɔ̃swal wu éwi Nziã lɔɔ.
Ãndɔɔ m’élieel Nziã ndiri asa k’ãswɛɛl emfa
13 Ŋ’éwi Nziã Abalayam lɔɔ, Nziã álab ɔ̃nkyel me nkuũ a ndyam, ke ngwel wɛ, k’eli ye mbuul wu onduru Nziã wɛ, kwɛn Nziã alab ɔ̃kyel me nkuũ ã ndɛ. 14 Ndɛ áyɛɛn bubu:
«Mɛ̃ ekieel endɔɔl yɛ kuɔɔl ngamfɛn, bvool mɛ̃ ekieel ewa yɛ ãyam boo-boo6.14 Obɛ 22.16-17.»
15 Obɔ otsɛn bɛn Abalayam áli y’osɛ-mwiĩ, bu abɔɔ eluɔ ki éwi Nziã ndɛ lɔɔ. 16 Ke ngwel wɛ, baal abelab ɔ̃kyel me nkuũ a mbuul wu onduru bɔ. Ɔ̃kyel wu asuo kwɛn ndɔɔ yi ayɛɛn eli taa-taa, enkyam k’ebekal wɛ. 17 Emfa kiki, Nziã ádzii k’ásuo kal-a-kal kwɛn ndɛ k’akoo k’aswɛɛl ndɔɔ yi éwɛɛ ndɛ bam wɛ. Obɔ otsɛn b’élab ndɛ ɔ̃kyel, kwɛn enkyam ebee okal ola baal b’abɔɔ eluɔ ki éwi Nziã bɔ lɔɔ. 18 Obobɔ, eli y’ãndɔɔ mbuaal mɛn k’akoo k’aswɛɛl wɛ. Me mɔ̃ Nziã k’akoo k’apfuru bam wɛ. M’emfa okyɛ, bia-byɛ b’emeedziɔɔn onse ndɛ, emeebɔɔ mpɛn yi bibi, yi esiin y’ɔ̃tɛɛ̃ wueel kaã li élieel ndɛ ndiri bia-byɛ eta me ndɛ. 19 Me ndɔɔ a bia-byɛ, kaã olɔ eli onge longo li omwiĩ o bia-byɛ. Lɔ k’ekoo k’ebii wɛ bvool eli mpɛn-mpɛn. Lɔ ebwel ongwel ekɔ ki enɛn ki onse Nzɔ a Nziã yi ke ywel, tiil ke mboo a Nziã yi enduru ɔ̃nsensal6.19 Lev 16.2. 20 Yeso ámaatsɔɔn nkwel a bia-byɛ okɔ bvool ásam okɔ me ndɔɔ a bia-byɛ. Ke ngwel wɛ, ndɛ oyii Ngaa-a-Nziã wu ɔ̃nɛn wu ɔ̃bu m’ɔ̃luo wa Melikisedek.
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)