1 Obobɔ, onge bɛn Nziã áwi bia-byɛ lɔɔ li esam onse owuun b'éyɛɛl ndɛ, yɔɔl kwɛn mbuul si ngɔmɔ̃ onse byɛ abee mpwee yi asam onse bɔ oywɛn. 2 Ke ngwel wɛ, átee bia-byɛ Endɔɔ e Nziã, emfa kiki hɛ̃ átee bɔ lɔ. Kɛn Endɔɔ li éyoo bɔ k'ési bɔ ndɔɔ si ngamɔ̃ wɛ, me ndɔɔ yɛn bɔ k'áyɔɔɔ lɔ y'okiool wɛ. 3 Taa-taa, bia-byɛ b'ekiool, esam onse owuun b'éyɛɛl Nziã, ŋ'élieel ndɛ ndiri:

«Onse mpuru a mɛ̃,

mɛ̃ ndab ɔ̃kyel wɛn:

"Bɔ bam kieel k'asam onse owuun b'éyɛɛl mɛ̃ wɛ!"✝»

Kwɛn ŋɛn, Nziã áman ɛ̃sal ɛ̃ ndɛ fa ŋ'ési ndɛ ɔ̃kiri. 4 Ke ngwel wɛ, ke mboo ngamɔ̃ áyɛɛn me ndɔɔ a tsoo li nsiaan bubu: «Me tsoo li nsiaan, Nziã owuun m'ɛ̃sal ɛ̃ ndɛ mvieel✝.» 5 Bvool ke mboo yiyi, álieel bubu: «Bɔ bam kieel k'asam onse owuun b'éyɛɛl mɛ̃ wɛ.» 6 Obobɔ, b'áyoo Endɔɔ e Nziã ɛ̃kwel k'ásam onse owuun b'éyɛɛl Nziã wɛ, me ndɔɔ yɛn bɔ ábee k'álweel Nziã. Ŋɛn eli ye b'ali ye mpwee yi asam onse bɔ. 7 Nziã bvool osuul tsoo ngelemɔ̃, li eti ndɛ me «nonɔ̃». Ke mbee ãlio bibi, ndɛ áyɛɛn me ndɔɔ a tsoo olɔ m'ɔ̃nywã a David, onge b'ayɛɛn ãyu-ywel ndiri:

«Okɛɛn nonɔ̃, byɛ eyoo nkii a ndɛ,

ebee y'ɔ̃tswɛ mpɛn okal!✝»

8 Ke ngwel wɛ, okɛɛn Dzodzue ábiri bɔ k'owuun b'éyɛɛl Nziã, ke mbee oŋɔ̃, Nziã kɛn k'ákaayɛɛn me ndɔɔ a tsoo ekyam li owuun wɛ. 9 Obobɔ, eli y'owuun bo saba b'eyɛɛl Nziã me ndɔɔ a yam a ndɛ. 10 Ke ngwel wɛ, mbuul wu osam onse owuun o Nziã, owuun hɛ̃ m'ɛ̃sal ɛ̃ ndɛ, onge b'éwuun Nziã m'ɛ̃sal mi ndɛ. 11 Obobɔ, bia-byɛ esa mpɛn yi esam onse owuun obɔ, kwɛn mbuul si ngɔmɔ̃ abee obva emfa kiki onge ábee olweel.

12 Ke ngwel wɛ, Endɔɔ e Nziã eli y'omwiĩ, bvool ebesal. Lɔ eli y'otɔ enduru epwel. Lɔ ebesam onse mbuul tiil k'ekab lɔ ɔ̃kwal y'ɔ̃fel, ekab amboo m'emwɛɛn ɛ̃ywee ye nsɔɔl. Lɔ ebebwɛɛl efua y'ãtsam. 13 K'eli y'eluɔ si ngemɔ̃ ki ési Nziã ki eli m'odziɔɔn ke nkwel a ndɛ wɛ: Bvieel eli odzuũ bvool eli kal-a-kal ke nkwel a ndɛ wɛn ola ndɛ ebvaan bia-byɛ eyeliaal ãbuu.

14 Obobɔ, onge bɛn bia-byɛ eli ye Ngaa-a-Nziã wu ɔ̃nɛn, wu oyɛn bam tiil ke mboo yi eli Nziã, ndɛ wu Yeso wu Muaan a Nziã, yɔɔl kwɛn bia-byɛ esɛn ãnã onse okiool b'ebeyɛɛn bia-byɛ me bɔ ke nkwel a baal bueel. 15 Ke ngwel wɛ, bia-byɛ eli ye Ngaa-a-Nziã wu ɔ̃nɛn wu okoo k'amwɛn mpal bvoo ye bia-byɛ onse okwal o bia-byɛ. Ámbio ndɛ m'emfa bvieel onge bia-byɛ, kɛn a ndɛ k'ási obi wɛ. 16 Obobɔ, esyal tsotsoo a kiri li okwɛn y'aŋã mbueel, kwɛn Nziã àyoo bia-byɛ ãwua, àsio bia-byɛ nyiĩ, bvool àwuaal a bia-byɛ me lio li ngesɛ.