1 Melikisedek ondɛ wu áli ɔ̃kwɛn wa Salɛm bvool ngaa-a-Nziã-a-Mpuu. Ŋ'éfi Abalayam eta odzwaan y'akwɛn, bvool ábvel bɔ mpɛn, Melikisedek wu áyemwɛɛn ye ndɛ, bvool andɔɔl ndɛ kuɔɔl. 2 Obobɔ, Abalayam áwi ndɛ boo ngemɔ̃ onse ãboo kuun m'eluɔ bvieel bvi ébɔɔ ndɛ ke mvel. Nkuũ a Melikisedek edzii k'eyɛɛn ŋ'ɛ̃kwel ndiri: «Ɔ̃kwɛn wu ãndɔɔ mã dzu». Ndɛ hɛ̃ áli ɔ̃kwɛn wa Salɛm, ŋ'ayɛɛn ndiri: «Ɔ̃kwɛn wu opi». 3 Ndɛ tal pyɛ, ngoo pyɛ, nkiɔɔn hɛ̃ pyɛ, tsoo li áburu ndɛ pyɛ, li ékwi ndɛ hɛ̃ pyɛ. Ndɛ ofɛɛn onge Muaan a Nziã bvool oli Ngaa-a-Nziã wu ɔ̃bu.
4 Emeetal emfa ki éli Melikisedek mbuul wu ɔ̃nɛn! Abalayam wu nkiɔɔn a bia-byɛ áwi ndɛ boo ngelemɔ̃ onse ãboo kuun m'eluɔ bvi ébɔɔ ndɛ ke mvel. 5 Ngel etam baan ba yam li Lebvi, b'ali angaa-a-Nziã, k'awal boo ngelemɔ̃ onse ãboo kuun m'eluɔ e baan-ngoo a bɔ, baal b'Isalayel, onkyam ŋɛn bɔ hɛ̃ ali atiɔɔl b'Abalayam. 6 Kɛn a Melikisedek wɛn k'áli wa yam li Lebvi wɛ, áyɔɔ boo ngelemɔ̃ onse ãboo kuun m'eluɔ bvi Abalayam. Melikisedek bvool ándɔɔl mbuul wu éwi Nziã ãlɔɔ kuɔɔl. 7 Kɛn enkyam pyɛ: Wu onduru wukyɛ wu abendɔɔl wu obvool mbee kuɔɔl. 8 Emeetsam bvool: Angaa-a-Nziã b'abewal boo ngelemɔ̃ onse ãboo kuun m'eluɔ ali kɛn a baal b'akwa. Kɛn a me b'otal Melikisedek, ákel ndiri ndɛ oli mwiĩ. 9 Obobɔ, ekoo k'eyɛɛn wɛn, Lebvi wu abeyɔɔ boo ngelemɔ̃ onse ãboo kuun, ŋ'áwi lɔ hɛ̃ me nkuul a Abalayam. 10 Ke ngwel wɛ, Lebvi áli kɛn onse mwiĩ a nkiɔɔn m'Abalayam, ŋ'éyemwɛɛn Melikisedek ye ndɛ.
11 M'emfa ki etam ngel yi áwi baal b'Isalayel, abesuaal angaa-a-Nziã onse yam e Lebvi m'emfa ki ongaa-o-Nziã b'Alona. K'okɛɛn angaa-a-Nziã ba yam li Lebvi ási ɔ̃sal wu ɔ̃koo, otsɛn omã bvool b'álɔ ongaa-o-Nziã okyam, m'emfa ki Melekisekek, ke m'emfa ki Alona wɛ? 12 Ke ngwel wɛ, okɛɛn aswɛɛl ongaa-o-Nziã, ngel hɛ̃ ebvaan aswɛɛl. 13 Ke ngwel wɛ, ãyɛɛn omɔ̃ ãtal mbuul wa yam ekyam, lɛn mbuul si ngɔmɔ̃ onse lɔ mwɛn-éndɛɛl kɛn asal ke nkiin yi awa Nziã ãkab wɛ. 14 Nzal-a-ŋɛn bia-byɛ eyɛɛ ngesɛ wɛn, Mfam a bia-byɛ oli wa yam li Yuda, yam lɛn Moyize yi áyɛɛn pyɛ me b'otal angaa-a-Nziã.
15 Ndɔɔ yi ebeyɛɛn yi eyii bam kal-a-kal, ŋ'emɔɔn Ngaa-a-Nziã ɔ̃kyam wu ofɛɛn onge Melikisedek. 16 Ndɛ k'ayii Ngaa-a-Nziã me nkuul ãngel m'ãtal esii e baal wɛ, kɛn a me nkuul a waan li elaã lɛn ntɔ pyɛ. 17 Ke ngwel wɛ, ákel me ndɔɔ a ndɛ bubu:
«Yɛ li Ngaa-a-Nziã wu ɔ̃bu,
m'emfa ki Melikisedek.»
18 Obobɔ, Nziã ombaal Ngel yi tsɔɔn, me ndɔɔ yɛn yɔ éli y'okwal bvool k'éli y'otsɛn wɛ. 19 Ke ngwel wɛ, Ngel k'esi kwɛn eluɔ si ngemɔ̃ ekal ɔ̃koo wɛ. Kɛn a bia-byɛ ebɔɔ kaã li enduru obvie, lɛn me nkuul a lɔ bia-byɛ esyal tsotsoo a Nziã.
20 Ási obobɔ m'ɔ̃kyel wu élab Nziã. Kɛn a Nziã k'álab ɔ̃kyel wɛ, ŋ'eyii bakyɛ angaa-a-Nziã. 21 Kɛn a Yeso oyii Ngaa-a-Nziã me ndɔɔ yɛn Nziã álab ɔ̃kyel, ndiri:
«Mfam Nziã olab ɔ̃kyel,
ndɛ k'aswɛɛl ãtsam ã ndɛ wɛ:
"Yɛ li Ngaa-a-Nziã wu ɔ̃bu."»
22 Me ndɔɔ ɔ̃kyel ondɛ, Yeso oyii nsoo a ondoo b'onduru obvie.
23 Ndɔɔ yinkyɛ bvool yɛn angaa-a-Nziã ákekiri ke mboo a bakyɛ bibi, me ndɔɔ yɛn epfu ékekii bɔ k'asa ɔ̃sal a bɔ ɔ̃bu. 24 Kɛn a Yeso oli mwiĩ ɔ̃bu nzal ɔ̃bu, ongaa-o-Nziã o ndɛ oli b'ɔ̃bu nzal ɔ̃bu. 25 Obɔ otsɛn bɛn, ndɛ okoo k'abvuul m'emfa ki ɔ̃koo baal b'asyal tsotsoo a Nziã me nkuul a ndɛ, me ndɔɔ yɛn ndɛ oli mwiĩ ɔ̃bu, me ndɔɔ yi abebuɛɛn Nziã me ndɔɔ a bɔ.
26 Obobɔ, Yeso oli Ngaa-a-Nziã wu ɔ̃nɛn wa m'emfa okyɛ wu obvaan me ndɔɔ a bia-byɛ: Ndɛ oli Ɔ̃nsensal, ɔ̃nkinkyam, wu oywɛn a mbiin, Nziã ákab ndɛ y'anga-ãbi, bvool ándɛɛl ndɛ bam onduru ywel. 27 Onge angaa-a-Nziã b'anɛn bakyɛ, Yeso k'áli ye kɔɔ li awa ãkab tsoo bwɛn a tsoo wɛ, ŋ'ɛ̃kwel kɛn me ndɔɔ ãbi ã ndyam, ke mbee, me ndɔɔ a mã baal. Ndɛ ámaawa kab olɔ sa ngemɔ̃ ɔ̃bu, ŋ'éwi ndɛ elaã e ndɛ me ndyam onge kab. 28 Ke ngwel wɛ, Ngel ebesuul baal onge angaa-a-Nziã b'anɛn baal b'ali y'okwal. Kɛn ɔ̃kyel wu élab Nziã ke mbee a Ngel, ásuul Muaan Ngaa-a-Nziã wu ɔ̃nɛn, wu ésuul ndɛ ɔ̃koo ɔ̃bu.
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)