Mateus 2

Anga-ãyal ayetal Yeso

1 Áburu Yeso ke Betelehem, ke nsie yi Yude, me lio li éli Elode ɔ̃kwɛn. Ke mbee a ŋ’aburu ndɛ, anga-ãyal afi etswi ki epal tal, ayi Yelusalem. 2 Bɔ afuul ndiri: «Ɔ̃kwɛn a Ayuda wu aburu, kwɛn ali? Bee emwɛn ngam-a-ngam a ndɛ opal k’etswi ki epal tal, bee bu eyelweel ndɛ.» 3 Ŋ’eyoo ɔ̃kwɛn Elode nsia oyɔ, ndɛ ebɔɔ e nsie edziɔɔn, ye baal bueel ba Yelusalem. 4 Ndɛ otam k’abvool amfam b’angaa-a-Nziã y’ayiool b’ãngel bam bueel ba yam, me ndɔɔ yi afuul bɔ bubu: «Mboo mã yi aburu Mãsia?» 5 Bɔ abveel ndɛ ndiri: «Ke Betelehem, ke nsie yi Yude. Ke ngwel wɛ, ɔ̃liaal-ɛ̃kiɛɛn a Nzian ákel bubu:

6 "Yɛ wu Betelehem, ke nsie a Yude,

yɛ ke bvool mbee onse ãbviil m’ãnɛn mã nsie a Yude wɛ.

Ke ngwel wɛ, mfam wu akieel abiri Isalayel yam e mɛ̃ akieel afa ola yɛ✝2.6 Mis 5.1".»

7 Obobɔ, Elode otam anga-ãyal mbel ota m’edziɔɔn. Ndɛ ofuul bɔ bubu: «Lio emã li epal ngam-a-ngam ondɛ?» 8 Ke mbee oŋɔ̃, ndɛ oyuɔɔl bɔ Betelehem, y’ãyɛɛn m’ɔ̃nywã ndiri: «Eyi eyebii nsia a muaan wu ɔbwee ngesɛ-ngesɛ. Obobɔ, ŋ' emwɛn byɛ ndɛ, eya eyeyɛɛn mɛ̃, kwɛn mɛ̃ hɛ̃ ngyi ndɛ olweel.»

9 Ke mbee a ŋ’eyoo anga-ãyal m’eyɛɛn ɔ̃kwɛn, bɔ ayɛn. Obobɔ, bɔ amwɛn ngam-a-ngam wu émwɛn bɔ k’etswi ki epal tal, ndɛ ákeyi ke nkwel a bɔ. Ndɛ atɔ ke ywel a nzɔ yi eli muaan, ndɛ otɛɛn. 10 Ŋ’emwɛn bɔ kwɛn ngam-a-ngam otɛɛn oŋɔ̃, bɔ aluul m’esɛ ki enduru. 11 Bɔ asam onse nzɔ, amwɛn muaan ye ngoo a ndɛ Mali. Bɔ abvi ãbuo ke nkwel a muaan, bu alweel ndɛ. Bɔ adzweel ãkab ã bɔ, bu awi ndɛ ãkab m’eluɔ bvi: Ɔɔl, y’ãnasi ye mbaal mã nswel yi mvɛ mã miil. 12 Ke mbee oŋɔ̃, Nziã owi bɔ ãnkunkwa me nduaal kwɛn bɔ abee ol’Elode okɔɔl. Bɔ bu abvool ɔ̃kiri a bɔ me nkuul nkyam.