1 Mɛ̃ wu Pool, mɛ̃ ndi ɔ̃sal a Yeso Mãsia. Nziã áti mɛ̃ mbel me ndɔɔ yi ekal ntam, bvool ásueel mɛ̃ m’otsal o Nsia a ndɛ yi Ngesɛ. 2 Nsia yi Ngesɛ oyɔ, yɛn tsɔɔn Nziã áwi lɔɔ m’ɛ̃nywã mi aliaal-ɛ̃kiɛɛn a ndɛ, onse Ɛ̃nkaan mi ngel. 3 Nsia oyɔ etal Muaan a ndɛ, wu opal onse yam e David, m’emfa ki ombuul. 4 Ɔ̃fel wu Ɔ̃nsensal osuul ndɛ Muaan a Nziã ye waan lueel, m’oseel b’éseel ndɛ ndɛ onse b’ákwi-ákwi. Ndɛ ondɛ Yeso Mãsia wu Mfam a bia-byɛ. 5 Me nkuul a ndɛ, Nziã osio mɛ̃ nyiĩ yi ekal ntam, m’osa kwɛn, me nkuũ a ndɛ, baal b’ɛ̃kiri mvieel akiool ndɛ bvool alweel ndɛ. 6 Ɔ̃kiri a byɛ hɛ̃ oli onse ɛ̃kiri omyɛ̃, byɛ b’éti Yeso Mãsia mbel. 7 Byɛ bueel b’ekal ke bviil li Lom, bɛn Nziã ádzii byɛ bvool áti byɛ mbel k’ekal ba ngel, mɛ̃ nswɛn byɛ. Yɔɔl kwɛn Nziã wu Tal a bia-byɛ ye Yeso Mãsia wu Mfam a bia-byɛ asio byɛ nyiĩ, awa byɛ opi!

8 Ŋ’ɛ̃kwel, mɛ̃ mveel Nziã a mɛ̃ ãtuɛɛn me nkuul a Yeso Mãsia me ndɔɔ a byɛ bueel, ke ngwel wɛ abeyɛɛn me ndɔɔ okiool o byɛ m’ɔ̃kiri wueel. 9 Mɛ̃ ebelɔ byɛ kɛn olɔ onse ãbuɛɛn ã mɛ̃. Nziã wɛn mɛ̃ ebesa ɔ̃sal a ndɛ ɔ̃kwal ngɔmɔ̃, ŋ’ebetsal mɛ̃ Nsia yi Ngesɛ yi etal Muaan a ndɛ, oyɛɛ kwɛn mɛ̃ eyɛɛn otaa-taa. 10 Ãlio mbueel onse ãbuɛɛn ã mɛ̃, mɛ̃ ebesɔɔ ola Nziã kwɛn, okɛɛn ndɛ odzii, mɛ̃ mbɔɔ mpwee yi eyetal byɛ. 11 Ke ngwel wɛ, mɛ̃ ndi y’efua kyam ki emwɛn byɛ, kwɛn byɛ ebɔɔ kab li nyiĩ a Nziã, li efa ol’Ɔ̃fel, kwɛn byɛ ewam, 12 bvool kwɛn ŋ’ètɔ mɛ̃ ola byɛ, bia-byɛ bueel ekal ye mpɛn: Mɛ̃ nkal ye mpɛn m’okiool o byɛ, byɛ hɛ̃ ekal ye mpɛn m’okiool o mɛ̃. 13 Andoo, mɛ̃ nzii kwɛn byɛ ebee ndɔɔ yi odzɛɛn: Nsa bibi mɛ̃ ebekuru k’eya ola byɛ, me ndɔɔ yi ebɔɔ nsia ke kwɛ ola byɛ, onge be mbɔɔ yɔ onse ɛ̃kiri ɛ̃kyam. Kɛn a tiil meba, abekii mɛ̃ k’eya. 14 Mɛ̃ ndi y’ebiin ki Agelek, ye ki bɛn k’Agelek wɛ, ye ki anga-ãyal, ye ki ewool. 15 Obɔ otsɛn bɛn, mɛ̃ nzii bam hɛ̃ k’etsal Nsia yi Ngesɛ ola byɛ, byɛ b’eli ke Lom.

16 Ke ngwel wɛ, mɛ̃ ke ndi y’opfuru o Nsia yi Ngesɛ wɛ: Yɔ eli waan e Nziã lɛn me lɔ, ndɛ abvuul mbuul wueel wu akiool, ŋ’ɛ̃kwel Ɔ̃yuda, ke mbee wɛn k’Ɔ̃yuda wɛ. 17 Ke ngwel wɛ, Nsia yi Ngesɛ esuo emfa ki esuul Nziã baal dzu ke nkwel a ndɛ: Eli me nkuul a okiool, eluɔ ekyam pyɛ, kɛn m’okiool, onge b’ákel ndiri: «Mbuul wu akal dzu m’okiool akal y’elaã.»

18 Ke ngwel wɛ, fa ywel, mpuru a Nziã, ebemɔɔn nkal a baal b’aywɛn onziã, bvool nkal a baal bɛn k’ali dzu wɛ. Ke ngwel wɛ, m’ɛ̃sal ɛ̃ bɔ mi ɛ̃bi-ɛ̃bi, bɔ abefoo otaa-taa. 19 Ŋ’esa oŋɔ̃, ndɔɔ yɛn ekoo m’oyɛɛ me b’otal Nziã, eli kal-a-kal ola bɔ, ke ngwel wɛ, Nziã ndyam wu osuo bɔ yɔ. 20 Ke ngwel wɛ, mwɛn ébuo Nziã ɔ̃kiri, emfa e ndɛ wu Nziã, bvɛn k’ebemɔɔn me mviil wɛ, eli bvi: waan e ndɛ li ɔ̃bu nkal ɔ̃bu y’onziã o ndɛ. Bvɛ ebemɔɔn kal-a-kal ŋɛn mbuul abwɛɛl eluɔ bvi ébuo ndɛ ngesɛ-ngesɛ. Obobɔ, bɔ k’abɔɔ odzeel bam wɛ. 21 Ke ngwel wɛ, onkyam ŋɛn bɔ ayɛɛ Nziã, bɔ k’alweel ndɛ onge Nziã wɛ, bɔ hɛ̃ k’abveel ndɛ ãtuɛɛn wɛ. Kɛn a bɔ amaadziɔɔn onse ãtsam mɛn otsɛn pyɛ, ɛ̃kwal ɛ̃ bɔ hɛ̃ mi ɛ̃ywɛn ãyal ɛ̃li onse empeel. 22 Bɔ abetsam ndiri bɔ ali anga-ãyal, kwɛn ŋɛn bɔ anga-laa. 23 Ke ngwel wɛ, ke mboo yi alweel Nziã wɛn k’akwa wɛ bvool wu oluul me dzuun, bɔ alweel etiɔ bvi m’emfa e mbuul wu akwa, bvi m’emfa bvi anywɛn, bvi m’emfa bvi anyam b’ɛ̃mpal ɛ̃nã, ye b’adzuu me bal. 24 Obɔ otsɛn bɛn, Nziã oyiri bɔ onse ãndɔɔ mã mbiin, bvool onse efua bvi ebi-ebi bvi ɛ̃kwal ɛ̃ bɔ, kwɛn bɔ awa ãnzuru ã bam opfuru bam-a-bam, 25 bɔ b’aswɛɛl otaa-taa o Nziã me mfya, alweel eluɔ bvi ébuo Nziã, m’obuɛɛn o bvɛ, ke mboo yi ekeelweel bɔ Nziã wu ábuo ɔ̃kiri, ndɛ wu obvaan me lweel ɔ̃bu nkal a ɔ̃bu! Amɛn!

26 Obɔ otsɛn bɛn Nziã oyiri bɔ onse efua bvi opfuru. Obobɔ, akal a bɔ hɛ̃ aswɛɛl emfa ki obvool o ntal, bu ayii abvool yɔ y’anga-buru b’akaal. 27 Emfa kiki, abɔɔl hɛ̃ ayiri emfa ki ngesɛ ki obvool o ntal, aluul m’efua onse bam-a-bam, bu abvi ãndɔɔ m’opfuru osa onse bam-a-bam abɔɔl. M’emfa okyɛ, bɔ abɔɔ furu li ekoo m’odziɔɔn o bɔ.

28 Onge bɛn bɔ amwɛn kwɛn oyɛɛ o Nziã k’oli y’otsɛn wɛ, Nziã oyiri bɔ onse owool-a-wool o bɔ, kwɛn bɔ asa ãndɔɔ mɛn k’ãli me nkuul wɛ. 29 Bɔ aluul m’ɛ̃sal mvieel myɛn k’ɛ̃li dzu wɛ, m’ãndɔɔ m’ãbi-ãbi, me pfuul o nzi, bɔ asa bakyɛ obi, aluul m’ɔ̃tam, m’ãtsam m’obam o baal, m’obel ye pfuru. Bɔ asa ãndɔɔ mã ngwel-a-ngwel, bɔ ali anga-kwee. 30 Bɔ abeyɛɛn obi. Bɔ ali ataal a Nziã, bɔ bvɛɛ o mbuul pyɛ, bɔ ali y’ondɛɛl o nzuru, bɔ abeŋaã, bɔ ali y’ãyal mbueel m’asa obi, bɔ lweel li aburu a bɔ pyɛ. 31 Bɔ ãyal pyɛ, bɔ ayɛɛn ndɔɔ k’asa yɔ wɛ, bɔ y’ɛ̃kwal mpɛn, bɔ nyiĩ a mbuul pyɛ. 32 Bɔ ayɛɛ emfa ki dzu ki etsiil Nziã ãndɔɔ ã baal, kyɛn b’asa ãndɔɔ omɔ̃, ebvaan akwa. Okyam ŋ’eyɛɛ bɔ obobɔ, bɔ k’ayɔɔl k’asa ãndɔɔ omɔ̃ wɛ, bvool asia-mpaa ye bakyɛ hɛ̃ b’abesa mɔ̃.