LUK 20

Ndɔɔ yi etal okwɛn o Yeso

1 Tsoo ngelemɔ̃ onse ãtsoo omɔ̃, Yeso áketee onse Nzɔ a Nziã, bvool ákeliaal baal Nsia yi Ngesɛ. Amfam b’angaa-a-Nziã, y’ayiool b’ãngel, y’akuul-kuul apal oŋɔ̃. 2 Bɔ bu afuul ndɛ bubu: «Me liaal bee bam: Okwɛn b’ebesa yɛ ãndɔɔ mã, bo nã, wuo wu owi yɛ okwɛn obɔ nã?»

3 Yeso obveel bɔ bubu: «Mɛ̃ hɛ̃ mveel byɛ ɔ̃mfuul wu, emeebveel mɛ̃ ndɛ: 4 Wu áyuɔɔl Dzaã me ndɔɔ yi awa baal opongo nã: Nziã wuo baal?» 5 Kɛn a bɔ abvi otsuun bam-a-bam ndiri: «Bia-byɛ ebveel ndɛ wɛn: "Wu áyuɔɔl ndɛ Nziã", ndɛ mpii ol’ofuul bia-byɛ ndiri: "Ke ki ébee byɛ Dzaã okiool emã?" 6 Kɛn a ŋɛn bia-byɛ ebveel ndɛ wɛn: "Wu áyuɔɔl ndɛ baal", baal bam bueel ol’abam bia-byɛ m’ãnkɔɔn. Ke ngwel wɛ, bɔ bueel abekiool ndiri Dzaã áli ɔ̃liaal-ɛ̃kiɛɛn a Nziã.»

7 Obobɔ, bɔ abveel kɛn a Yeso ndiri: «Bee k’eyɛɛ mbuul wu áyuɔɔl Dzaã, me ndɔɔ yi awa baal opongo wɛ.» 8 Yeso bu abveel bɔ ndiri: «Mɛ̃ hɛ̃ k’èyɛɛn byɛ okwɛn b’ebesa mɛ̃ ãndɔɔ mã wɛ.»

Mboo yi asal a bvine b’abi

9 Ke mbee oŋɔ̃, Yeso oti baal mboo yi: «Mbuul ngɔmɔ̃ ákwɛn nguun a bvine*20.9 Ol’aliaal-ɛ̃kiɛɛn a Nziã bibi, nguun a bvine eli yam li Isalayel. Etal onse Edz 5.1-7.. Ndɛ obuun yɔ m’asal, bu ayɛn odzuu b’ayiil. 10 Lio eyekoo li aka nsia, ndɛ oyuɔɔl ɔ̃nkyal ngɔmɔ̃ ol’asal ba ke nguun a bvine, kwɛn bɔ awa boo e bvine li ndɛ. Kɛn asal obɔ abɛɛl ɔ̃nkyal ondɛ, bu abveel ndɛ ãkɛɛ-ãkɛɛ. 11 Nga-nguun oyuɔɔl bɔ ɔ̃nkyal wa buaal. Ondɛ hɛ̃ bɔ abɛɛl, atoo ɛ̃tswɛ bvool abveel ndɛ ãkɛɛ-ãkɛɛ. 12 Ndɛ bvool oyuɔɔl ɔ̃nkyal wu atyel. Ondɛ obɔ, bɔ atɛn, bu atswɛɛl ndɛ.»

13 «Nga-nguun a bvine bu ayɛɛn ndyam-a-ndyam ndiri: "Mɛ̃ oŋɔ̃ bwɛn-a-bwɛn èsa? Sa mɛ̃ ngyuɔɔl bɔ kɛn a muaan a myam wu ɔ̃tio, owɛɛl bɔ awel ndɛ ye bvɛɛ." 14 Kɛn a ŋ’etaal asal obɔ muaan ondɛ ayeya, bɔ abvi oyɛɛn bam-a-bam ndiri: "Etal wu akieel awal ɔ̃swal a tal oyii aya! Ebam kɛn a ndɛ, kwɛn oŋɔ̃ ɔ̃swal a nguun akal wa bia-byam!" 15 Obobɔ, bɔ apaal ndɛ onse nguun a bvine, bu abam ndɛ.»

Yeso bu afuul ndiri: «Nga-nguun ol’osi baal obɔ emã? 16 Ndɛ àya ndyam, àtam k’abam asal obɔ, bvool àwa nguun a ndɛ a bvine okiaal me baal akyam.»

Ŋ’eyoo baal ãndɔɔ omɔ̃, bɔ ayɛɛn ndiri: «Ndɔɔ yi bubu ebee yam ola bee obwel!» 17 Obobɔ, Yeso otal bɔ pii, bu ayɛɛn ndiri: «Otsɛn omã b’ákel onse ɔ̃nkaan ndiri:

"Nkɔɔn yi éti atuu pfɛɛ,

eyii nkɔɔn yi nkiin yi nzɔ*20.17 Etal onse Ãnzii 118.22."?

18 Mbuul ndyam wueel wu àbva nkal a nkɔɔn oyɔ, àtsɔɔn. Yɔ ebva nkal a mbuul, yɔ èkyɛɛl ndɛ.»

Ofuru o mpal yi ɔ̃kwɛn

19 Ayiool b’ãngel y’amfam b’angaa-a-Nziã abɔɔ otsɛn kwɛn Yeso oti mboo oyɔ me bɔ. Obobɔ, bɔ ayii abii k’asiin ndɛ kɛn aŋã-ŋã oŋɔ̃. Kɛn a bɔ ayoo buɔ o baal. 20 Bɔ bu abvi Yeso oliɔɔl, bvool bu ayuɔɔl ndɛ baal b’asa empa ki akal dzu. Bɔ ayii abii Yeso m’elyal onse ãyɛɛn ã ndɛ, kwɛn bɔ abɔɔ ãyal m’àyefɛn ndɛ ola mfam wu áli dziil li ɔ̃kwɛn wa Lom ke nsie a bɔ. 21 Baal obɔ alieel Yeso bubu: «Ɔ̃tee, bee eyɛɛ kwɛn yɛ abeyɛɛn otaa-taa, bvool yɛ abetee ãndɔɔ m’ãli dzu. Yɛ ke li y’ɔ̃bɛɛ wɛ, yɛ abetee baal nkuul a Nziã onse otaa-taa. 22 Oŋɔ̃ meyɛɛn bee, bee efuru mpaa yi ɔ̃kwɛn a Lom, wuo ebee yɔ ofuru?»

23 Yeso oyɛɛ ndiri ondɛ bɛɛ aywiin ndɛ. Ndɛ bu abveel bɔ bubu: 24 «Esuo mɛ̃ nzi ngamɔ̃ yi ãbvieel! Nkal a nzi oyɔ eli y’osu o mbuul ye nkuũ a ndɛ. Ke mbuul ondɛ nã?» Bɔ abveel ndiri: «Mbuul ondɛ eli Sedzaal.*20.24 Sedzaal nkuũ a okwɛn bo Lom.» 25 Yeso bu ayɛɛn ndiri: «Eluɔ bvi Sedzaal, ewa ola Sedzaal, bvi Nziã, ewa ola Nziã.» 26 Kɛn a bɔ k’abɔɔ elyal onse ãndɔɔ m’ékeyɛɛn ndɛ ke nkwel a baal wɛ. Esi bɔ ɛ̃kam bibi m’emfa ki ébveel ndɛ ɔ̃mfuul ondɛ, bɔ bu awuun kɛn a pi.

Ɔ̃mfuul me ndɔɔ osiool o b’ákwi-ákwi

27 Asaduseyɛ̃ ke kwɛ ayi tsotsoo a Yeso. Bɔ baal bɛn k’abekiool kwɛn b’ákwi akieel asiool wɛ. Bɔ afuul Yeso bubu: 28 «Ɔ̃tee, Moyize ákel bee onse ngel ndiri: "Ŋɛn bɔɔl okwi osiil ɔ̃kal wɛn ndɛ k’abɔɔ muaan ye ndɛ wɛ, mvɔɔl a ndɛ àwal ɔ̃pfiil ondɛ kwɛn bɔ abuo esii e baal me nkuũ a Ɔ̃pfu✝20.28 Det 25.5-6."»

29 «Ŋ’esa oŋɔ̃, éli ye yam ngelemɔ̃ li baan b’abɔɔl nsiaan. Muaan wu ɛ̃kwel obaal ɔ̃kal, kɛn a ndɛ k’abɔɔ muaan y’ɔ̃kaal ondɛ wɛ, ndyam bu akwi. 30 Muaan wa buaal obaal ɔ̃pfiil, okwi hɛ̃. 31 Muaan wu atyel tiil wa nsiaan asi kɛn obobɔ. Bɔ bueel akwi wu osiil muaan ye ndɛ pyɛ. 32 Ke mbee oŋɔ̃, ɔ̃kaal ondɛ hɛ̃ okwi. 33 Obobɔ, bee edzii K’eyɛɛ bubu: Ŋ’ekieel esiool b’ákwi-ákwi, ndɛ àkal ɔ̃kal nã onse baan-ngoo ange-nsiaan? Ke ngwel wɛ, bɔ bueel ange-nsiaan ábaal ndɛ!»

34 Yeso obveel bɔ ndiri: «Onse ɔ̃kiri wu, akaal y’abɔɔl abebaal bakyɛ. 35 Baal b’emwɛn Nziã kwɛn bɔ akieel asiool onse b’ákwi, àyekal onse ɔ̃kiri wu àya. Kɛn okɔ, bɔ k’àbebaal bakyɛ bvool wɛ. 36 Bɔ hɛ̃ k’àkoo k’abekwa bvool wɛ, me ndɔɔ yɛn bɔ àkal onge ãnzwel. Bɔ bvool àkal baan a Nziã, ke ngwel wɛ Nziã oseel bɔ onse b’ákwi-ákwi. 37 Moyize ásuo kal-a-kal ndiri, baal b’ákwi-ákwi akieel asiool. Ndɛ ásuo obobɔ ke mboo yi eyɛɛn me muaan-ɔ̃ti wu ákekaan mbaa k’adzio wɛ. Taa-taa bam, ndɛ áti Mfam Nziã ndiri "Nziã a Abalayam, Nziã a Isak, Nziã a Dzakab."*20.37 Me lio li ékeyɛɛn Moyize, Abalayam, y’Isak ye Dzakab, b’ákpi tsɔɔn-tsɔɔn.» 38 Yeso olweel bubu: «Nziã oli Nziã a baal b’amwiĩ-mwiĩ, onkyam b’eyɛɛn baal ndiri bɔ ámaakwa, ke ngwel wɛ ke mviil ã Nziã, baal bueel ali mwiĩ.»

39 Oŋɔ̃ obɔ, ayiool b’ãngel ke kwɛ alieel Yeso ndiri: «Ɔ̃tee, yɛ yɛɛn ngesɛ!» 40 Bɔ bvool k’abekie k’afuul ndɛ ɛ̃mfuul ɛ̃kyam wɛ.

Mãsia ye David

41 Ke mbee oŋɔ̃, Yeso oyɛɛn bɔ bubu: «Baal abeyɛɛn ndiri: "Mãsia oli muaan a David." Ki ebeyɛɛn bɔ obobɔ m’emã? 42 Ke David ndyam mpii oyɛɛn onse ɔ̃nkaan wu Ãnziĩ ndiri:

"Mfam Nziã oyɛɛn ye Mfam a mɛ̃ bubu:

Y’abva nsɛn ke kuɔɔl e mɛ̃ ki elam,

43 tiil ye k’esa mɛ̃ kwɛn yɛ dziaal ataal a yɛ m’odziaal."

44 Ŋɛn David oti Mãsia me "Mfam a ndɛ", emfa emã kyɛn Mãsia bvool akal muaan a David?*20.44 Muaan ŋã, ŋ’ayɛɛn ndiri ɔ̃tiɔɔl a David wa lela.»

Ebee onge ayiool b’ãngel okal

45 Ŋ’ékeyoo embuul e baal ãyɛɛn ã Yeso, ndɛ oyɛɛn ayio a ndɛ bubu: 46 «Ebee onge ayiool b’ãngel okal! Bɔ adzii k’abedzuu m’ekɔ bvi ela bvi ela bvi esa kwɛn baal abio bɔ ye dzuun m’ãnkuul. Onse ãnzɔ m’ãbuɛɛn, bɔ abewal ãmboo ã dzuun, bvool k’ãpfuun, bɔ abesuaal ãmboo mã nkwel. 47 Bɔ abewal eluɔ kyam kieel ki eli y’akaal b’apfiil, bɔ abesa ãbuɛɛn m’ãla-m’ãla, me ndɔɔ yi asa empa onge bɛn bɔ ali baal ba ngesɛ. M’emfa okyɛ, Nziã akieel awa bɔ etumbu ki enduru ki baal b’asiil mpuru.»