1 Yeso osam onse bviil li Dzeliko, bu atsiil lɔ. 2 Ŋ'esa oŋɔ̃, onse bviil olɔ, éli ye mbuul wɛn nkuũ Dzatswe. Ndɛ áli mfam a asal b'atwal mpal, bvool áli ɔ̃pfel. 3 Dzatswe ákebii k'amwɛn mbuul nga-nkuũ Yeso onse baal bueel obɔ, kɛn a ndɛ k'ákekoo k'amwɛn ndɛ wɛ, me ndɔɔ embuul, ke ngwel wɛ ndɛ áli ɔ̃pfi-ɔ̃pfi. 4 Obobɔ, ndɛ otsuu ntiin oyɛn nkwel, bvool owueel ɔ̃ti, me ndɔɔ yi amwɛn Yeso, ke ngwel wɛ ndɛ ákebwel m'olɔ.
5 Ŋ'etɔ Yeso ke mboo yi éli Dzatswe, ndɛ oseel mviil nkal a ndɛ, bu alieel ndɛ ndiri: «Dzatswe, sool tswa-a-tswa! Ke ngwel wɛ, nonɔ̃ ŋã, lɔɔ e mɛ̃ èkal ke nzɔ a yɛ!» 6 Dzatswe bu asool bam wa-a-wa, bu ayɔɔ Yeso y'esɛ. 7 Ŋ'emwɛn baal bueel ãndɔɔ omɔ̃, bɔ abvi Yeso ofiɛɛn ndiri: «K'amwɛn obɔ, Yeso oyɛn oyesam lɔɔ ola mbuul a ãbi!»
8 Kɛn a Dzatswe otɛɛn ke nkwel a Mfam, bvool olieel ndɛ bubu: «Mfam, mɛ̃ èwa aywal epie ki opfel o mɛ̃. Okɛɛn mɛ̃ ewel nzi y'ɔ̃nduul ola mbuul, mɛ̃ èbveel ndɛ ɔ̃bvɛn wu asa ondɛ nsa nã.» 9 Obobɔ, Yeso oyɛɛn me ndɔɔ a ndɛ wu Dzatswe ndiri: «Nonɔ̃ ŋã, obvuul osam onse nzɔ yi, ke ngwel wɛ mbuul wu hɛ̃ oli ngɔmɔ̃ onse yam li Abalayam. 10 Ke ngwel wɛ, Muaan a mbuul oyebii bvool oyebvuul b'ádziɔɔn.»
11 Onge bɛn baal ákeyoo ãyɛɛn ã Yeso, ndɛ bvool oti mboo. Baal áketsam kwɛn Okwɛn o Nziã ol'omɔɔn tswa-a-tswa oŋɔ̃, me ndɔɔ yɛn Yeso al'oyii tsotsoo ye Yelusalem. 12 Mboo yi éti Yeso éli bubu: «Mbuul ngɔmɔ̃ onse yam li okwɛn oyɛn oyebviaal mpu k'ɔ̃kiri wa lela, ke mbee oŋɔ̃ ndɛ àyebvool, me ndɔɔ yi akal ɔ̃kwɛn a nsie a ndɛ. 13 Kɛn a ye k'ekeyi ndɛ, ndɛ oti baal kuun mbel onse asal a ndɛ, bu awi bɔ nzi yi ãbvieel kuun. Ke mbee oŋɔ̃ ndɛ olieel bɔ ndiri: "Eta obɔɔ̃ me nzi yi tiil k'èyebvool mɛ̃!" 14 Kɛn a baal b'ɔ̃kiri a ndɛ ákebyal ndɛ. Obobɔ, bɔ ayuɔɔl baal ke mbee a ndɛ, kwɛn bɔ ayeyɛɛn ndiri: "Bee k'edzii kwɛn mbuul ondɛ akal ɔ̃kwɛn a bee wɛ!" 15 Onkyam obobɔ, ndɛ obvieel mpu, bu ayekɔɔl.»
«Ŋ'etɔ ndɛ, ndɛ oti asal b'éwi ndɛ nzi yi obɔɔ̃ mbel. Ndɛ ákedzii k'ayɛɛ ɔ̃ndɔɔl wu ébɔɔ bɔ. 16 Ɔ̃sal wu ɛ̃kwel oyi, bu ayɛɛn ndiri: "Mfam, mɛ̃ mbɔɔ ɔ̃ndɔɔl wa nzii yi ãbvieel kuun." 17 Mfam obveel ndɛ ndiri: "Ngesɛ, yɛ ɔ̃sal wa ngesɛ li! Yɛ ŋ'esuo kwɛn yɛ li dzu me ndɔɔ yam yi nsi-nsiri. Obobɔ, mɛ̃ nsuul yɛ mfam nkal ãbviil kuun." 18 Ɔ̃sal wa buaal oyi, bu ayɛɛn ndiri: "Mfam, mɛ̃ mbɔɔ ɔ̃ndɔɔl wa nzi yi ãbvieel ãtaan." 19 Mfam obveel ndɛ ndiri: "Ee! Emfa kiki, mɛ̃ nsuul yɛ mfam nkal ãbviil ãtaan."»
20 «Ɔ̃sal wukyɛ bvool oyi hɛ̃, bu ayɛɛn ndiri: "Mfam, tal nzii e yɛ yɔ bu. Mɛ̃ ekwee yɔ m'otsɔɔn onse ekɔ. 21 Ke ngwel wɛ, mɛ̃ eli ye buɔ o yɛ, yɛ li mbuul wa mviil mpɛn, yɛ abewal eluɔ bvɛn k'eli bvi yɛ wɛ, yɛ abeka bvɛn yɛ k'akwɛn wɛ." 22 Mfam obveel ndɛ bubu: "Ɔ̃sal wu empwɛɛn! Yɛ bu àbva kɛn a m'ãyɛɛn ã yam obɔ. Yɛ ayɛɛ kwɛn mɛ̃ ndi mbuul wa mviil mpɛn, mɛ̃ wu ebewal eluɔ bvɛn k'eli bvi mɛ̃ wɛ, mɛ̃ wu ebeka bvɛn mɛ̃ k'ekwɛn wɛ, 23 ke yɛ abee nzii e mɛ̃ ke nzɔ yi abekwɛɛ nzi oyesuul emã? Yɛ okɛɛn asi obobɔ, ŋe yemvool mɛ̃ ŋã, kɛn mɛ̃ ekeewal yɔ y'ɔ̃ndɔɔl!"»
24 «Oŋɔ̃ obɔ, mfam otam baal b'áli oŋɔ̃ ndiri: "Ewɛɛl ndɛ nzi yi ãbvieel oyɔ, ewa yɔ wu oli ye nzi kuun!" 25 Kɛn a baal obɔ abveel ndɛ ndiri: "Mfam, ndɛ mpii tsɔɔn oli ye yɔ kuun!" 26 Mfam obveel bɔ bubu: "Mɛ̃ eyɛɛn byɛ wɛn: Mbuul wu oli ndyam y'elu-luɔ, àlweel ndɛ bvikyɛ. Kɛn a wɛn kyam pyɛ, àmbaal onkyam k'emã-mã ki esiil ye ndɛ."»
27 «Me b'otal ataal a mɛ̃ bɛn k'ákedzii kwɛn mɛ̃ nkal ɔ̃kwɛn a bɔ wɛ, eya mɛ̃ ye bɔ ŋã, kwɛn atiɛɛn bɔ ãbwel ke nkwel a mɛ̃.»
28 Ke mbee a ŋ'eyɛɛn Yeso ãndɔɔ omɔ̃, ndɛ obvi nkwel e mbuul e baal, bu atwel nkuul yi eyi tiil Yelusalem. 29 Onge bɛn ndɛ al'ayii atɔ tsotsoo ola bo Betefadze ye bo Betani, nku-a-nku a nkio yi ata me nkio a ɛ̃ti mi Olibve, ndɛ otam ayio a ndɛ buaal, 30 ndiri: «Eyi onse ola b'otaal ke nkwel a byɛ ba. Me lio li esam byɛ onse bɔ, byɛ èmwɛn muaan-ane wu akuru me swɛ, wɛn mbuul mwɛn-éndɛɛl kɛn anɔɔn nkal a ndɛ wɛ. Enyiɔɔn ndɛ, eya ye ndɛ ŋã. 31 Okɛɛn mbuul ofuul byɛ ndiri: "Otsɛn omã b'enyiɔɔn byɛ ndɛ?", byɛ èbveel kɛn a ndɛ wɛn: "Mfam oli ye kɔɔ e ndɛ."»
32 B'étam Yeso ayɛn, amwɛn ãndɔɔ kɛn a m'emfa ki eyɛɛn ndɛ bɔ. 33 Me lio li eyii nyiɔɔn bɔ muaan-ane ondɛ, anga-ndɛ afuul bɔ ndiri: «Otsɛn omã b'enyiɔɔn byɛ muaan-ane ondɛ?» 34 Bɔ abveel bɔ ndiri: «Mfam oli ye kɔɔ e ndɛ.» 35 Bɔ abiri ndɛ ola Yeso. Bɔ bu ayel ekɔ e bɔ nkal ɔ̃nguo a ane, bvool bu asuul Yeso anɔɔn nkal a ndɛ. 36 Ŋ'ékebwel ndɛ, baal ákeyal ekɔ e bɔ nkal a kuul. 37 Ŋ'eyii ekwɛɛn bɔ sua Yelusalem, me li nkuul yi efa nkio a ɛ̃ti mi Olibve, embuul ki ayio eluul m'esɛ. Bɔ bu abvi Nziã olweel me nki yi kokɔ, me ndɔɔ emvieel bvam bvieel bvi émwɛn bɔ. 38 Bɔ ákeyɛɛn bubu:
«Yɔɔl kwɛn ɔ̃kwɛn wu aya me nkuũ a Mfam Nziã akal y'ondɔɔl o kuɔɔl!
Bia-byɛ elweel Nziã wa ke ywel!
Yɔɔl kwɛn opi okal mpɛ̃-a-mpɛ̃ a Nziã ye baal a ndɛ!»
39 Onse embuul okɔ, éli y'Afalisaye ke kwɛ. Bɔ ayɛɛn Yeso ndiri: «Ɔ̃tee, pɛɛn ayio a yɛ akal pi!» 40 Yeso obveel bɔ bubu: «Okɛɛn bɔ akal pi, ãnkɔɔn ã̀kuaal ɛ̃sɔɔl!»
41 Ŋ'etɔ Yeso bam kɛn a tsotsoo a Yelusalem bvool ŋ'emwɛn ndɛ bviil olɔ, Yeso olel me ndɔɔ a lɔ, 42 ndɛ bu ayɛɛn ndiri: «Yɛɛl! Yelusalem, yɛ nonɔ̃ k'abɔɔ otsɛn b'ãndɔɔ m'ãwa yɛ opi wɛ! Kɛn a meba ŋã, alwɔɔn yɛ opi obɔ! 43 Kɛn ãtsoo mã fool ã̀yeya me ndɔɔ a yɛ: Ataal a yɛ àdzii yɛ, me ndɔɔ yi adzɔɔ yɛ eta m'epie e yɛ bvam bvieel. 44 Bɔ àtsal yɛ, yɛ ye baal a yɛ, bɔ k'àsiil onkyam nkɔɔn ke ywel a yinkyɛ wɛ. Ke ngwel wɛ, yɛ k'áyɛɛ lio li éyi Nziã yɛ owuaal wɛ!»
45 Yeso osam onse Nzɔ a Nziã, bu abvi b'áketiɔ eluɔ onse yɔ otswɛɛl. 46 Ndɛ olieel bɔ ndiri onse ɔ̃nkaan wu ɔ̃nsensal, Nziã ayɛɛn bubu: «Nzɔ a mɛ̃ èkal nzɔ a ãbuɛɛn. Kɛn a byɛ emeesuul yɔ eyii mboo yi edziɔɔn baal a pfuul!»
47 Yeso ákeyiool ãtsoo mam mbueel onse Nzɔ a Nziã. Amfam b'angaa-a-Nziã, y'ayiool b'ãngel, y'akuul-kuul b'ola, ákebii ndɛ wu abam. 48 Kɛn a bɔ k'áyɛɛ emfa ki esa bɔ wɛ, ke ngwel wɛ baal bam bueel ákeyoo ndɛ owuun bam wɛ.
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)