1 Ke mbee oŋɔ̃, Yeso oluul m'Ɔ̃fel wu Ɔ̃nsensal, bu ambal nzal yi Dzolodɛ̃. Ɔ̃fel obiri ndɛ k'ɔ̃baan wa kɛɛ-kɛɛ. 2 Onse ɔ̃baan okɔ, Ɔ̃pfu ombio ndɛ ãtsoo ãku-ãnã (40). Onse ãtsoo omɔ̃ mam mbueel ndɛ k'ákedza wɛ, ke mbee ãtsoo omɔ̃ ndɛ nzal ewel. 3 Ɔ̃pfu bu alieel ndɛ bubu: «Okɛɛn yɛ li Muaan a Nziã, oŋɔ̃ tam kwɛn nkɔɔn yi ekɔɔl esuɔ*!» 4 Yeso obveel ndɛ bubu: «Akel onse ɔ̃nkaan a Nziã bubu: "Elaã e mbuul k'eli kɛn a m'esuɔ wɛ✝!"»

5 Ke mbee oŋɔ̃, Ɔ̃pfu obiri Yeso nkal ãntɛ, bu asuo ndɛ bam me muaan-lio ãkwɛn mam mbueel m'ɔ̃kiri a nsie. 6 Ɔ̃pfu bu alieel ndɛ bubu: «Mɛ̃ èwa yɛ omfam ye lweel li ãkwɛn mã. Ke ngwel wɛ, áwi mɛ̃ eluɔ obvɛ bvam bvieel, mɛ̃ nkoo k'ewa bvɛ me mbuul wu nzii mɛ̃ bvɛ owa. 7 Ŋɛn yɛ bvi ãbuo ke nkwel a mɛ̃, bu lweel mɛ̃, eluɔ bvi bvam bvieel èkal bvi yɛ.» 8 Yeso bu abveel ndɛ ndiri: «Akel onse ɔ̃nkaan a Nziã bubu: "Yɛ abva ãbuo kɛn a ke nkwel a Mfam Nziã wu Nziã a yɛ, yɛ asal kɛn a me ndɔɔ a ndɛ✝."»

9 Ɔ̃pfu bvool obiri Yeso ke Yelusalem, osuul ndɛ ke ywel a Nzɔ a Nziã, bvool olieel ndɛ bubu: «Okɛɛn yɛ Muaan a Nziã li, tsio fa ywel ŋã tiil nsie ku! 10 Ke ngwel wɛ, ákel ndiri: "Ndɛ àtam ãnzwel ã ndɛ me ndɔɔ a yɛ kwɛn mɔ̃ ãkiaal yɛ. 11 Mɔ̃ ã̀biri yɛ nkal a mviɔɔl ɛ̃ mɔ̃, kwɛn yɛ bee tsa obɛɛl me nkɔɔn✝."» 12 Yeso obveel ndɛ bubu: «Ákel ndiri: "Oyɛɛ ke poo Mfam Nziã a yɛ wɛ✝!"» 13 Ŋ'eman Ɔ̃pfu Yeso ombio m'emfa bvam bvieel, ndɛ wu Ɔ̃pfu oyɛn lela ye ndɛ, me ndɔɔ yi akiaal lio ekyam.

14 Ke mbee oŋɔ̃, Yeso oluul me mpɛn a Ɔ̃fel wu Ɔ̃nsensal, bu akɔɔl nsie yi Ngalile. Nsia a ndɛ etsɔɔn me nsie oyɔ yam yueel. 15 Ndɛ ákeyiool onse ãnzɔ m'ãbuɛɛn m'Ayuda, baal bueel bu abvi ndɛ otuɛɛn.

16 Yeso oyɛn Nadzalet, ke mboo yi ékwel ndɛ. Me tsoo li saba*, ndɛ osam onse nzɔ a ãbuɛɛn, onge b'ékesa ndɛ tsɔɔn. Ndɛ bu atɛɛn, me ndɔɔ yi atsiɔ ɔ̃nkaan a Nziã. 17 Awi ndɛ ɔ̃nkaan wu Edzayi, wu ɔ̃liaal-ɛ̃kiɛɛn a Nziã. Ŋ'edzweel ndɛ ɔ̃nkaan ondɛ, ndɛ omwɛn mboo yi ákel ndiri:

18 «Ɔ̃fel a Mfam Nziã oli onse mɛ̃,

ke ngwel wɛ, ndɛ osueel mɛ̃ me ndɔɔ yi eliaal aywal Nsia yi Ngesɛ.

Ndɛ otam mɛ̃, me ndɔɔ yi eyɛɛn b'ali onse onkyal wɛn onkyal o bɔ ofi,

me ndɔɔ yi esa kwɛn baal bɛn k'afemwɛn wɛ, amwɛn bvool.

Ndɛ hɛ̃ otam mɛ̃, me ndɔɔ yi ebvuul baal b'abetuaal mpal,

19 bvool me ndɔɔ yi eliaal baal wɛn mvel amaakoo wu esio Nziã baal a ndɛ nyiĩ✝.»

20 Ŋ'eman Yeso otsiɔ, ndɛ okuru ɔ̃nkaan, obveel ndɛ ol'ɔ̃sal a nzɔ a ãbuɛɛn, bu abvi nsɛn. Baal bueel onse nzɔ a ãbuɛɛn ayii atal ndɛ yuul. 21 Obobɔ, ndɛ obvi bɔ oliaal bubu: «Ãndɔɔ me nsiɔ mɛ̃ omɔ̃, asi mɔ̃ nonɔ̃ ŋã me ndɔɔ a byɛ b'ebeyoo mɛ̃.» 22 Baal bueel ákelweel ndɛ, bvool ákekam m'ãndɔɔ m'ãbvɛ-ãbvɛ m'ékeyɛɛn ndɛ. Bɔ bu abvi oyɛɛn bam-a-bam bubu: «Ndɛ wu, ke muaan a Dzedzef ali wɛ?»

23 Yeso bu alieel bubu: «Taa-taa bam, byɛ ŋ'eta mɛ̃ mboo yi: "Ɔ̃boo, boo nzuru a yɛ yam!" Byɛ hɛ̃ ŋ'eyɛɛn mɛ̃ wɛn: "Bee eyoo nsia a ãndɔɔ mbueel m'esi yɛ ke Kapelanahum, oŋɔ̃ sa mɔ̃ hɛ̃ k'ola o yam!"» 24 Yeso bu alweel bubu: «Taa-taa bam, mɛ̃ ngyɛɛn byɛ wɛn, k'eli y'ɔ̃liaal-ɛ̃kiɛɛn a Nziã si ngɔmɔ̃ wu abewa dzuun k'ola o ndyam wɛ. 25 Mɛ̃ bvool ngyɛɛn taa-taa wɛn, me lio li Eli wu ɔ̃liaal-ɛ̃kiɛɛn a Mfam Nziã, éli y'akaal b'ápfiil alam bibi ki Isalayel. Me lio olɔ, ési mvel tyel ye nswii sɛɛn yɛn mvel k'ándwɔɔ wɛ, ɔ̃lɔɔ wa kokɔ hɛ̃ áli m'ɔ̃kiri wueel. 26 Kɛn a Nziã k'áyuɔɔl Eli, kwɛn ndɛ ayewuaal ɔ̃kaal wu ɔ̃pfiil wu Isalayel wɛ. Ndɛ áyuɔɔl ndɛ kɛn ol'ɔ̃pfiil ngɔmɔ̃ wu ákekal ke Salepeta, ke nsie yi Sidɔ̃, m'owuual o ndɛ. 27 Me lio li ɔ̃liaal-ɛ̃kiɛɛn a Mfam Nziã Elidze, éli hɛ̃ ye baal bibi b'áli y'ãluu me leba. Elidze k'ábvuul mbuul si ngɔmɔ̃ wu Isalayel wɛ, ndɛ ábvuul kɛn a Naaman wu ɔ̃kiri wa Sili.»

28 Ŋ'eyoo baal b'áli onse nzɔ a ãbuɛɛn ãndɔɔ omɔ̃, bɔ ayoo nkyee bibi. 29 Bɔ atɛɛn, apaal Yeso onse ola, bu abiri ndɛ nkal a nkio yi átuu bviil e bɔ nkal a yɔ, me ndɔɔ yi atsɛɛn ndɛ ke nsɛn a yɔ. 30 Kɛn a ndɛ obwel onse bɔ, bu ayɛn li ndyam.

31 Yeso hɛ̃ oyɛn Kapelanahum, bviil li ke nsie yi Ngalile. Oŋɔ̃, ndɛ obvi baal oyiool me tsoo li saba. 32 Ãtee ã ndɛ ãsi baal ɛ̃kam, ke ngwel wɛ ndɛ ákesuo omfam onse ãyɛɛn ã ndɛ. 33 Ŋ'esa oŋɔ̃, onse nzɔ a ãbuɛɛn oŋɔ̃, éli ye mbuul ngɔmɔ̃ wu áli y'ɔ̃fel wu ɔ̃bi-ɔ̃bi. Mbuul ondɛ obiool bam kokɔ bubu: 34 «Ke-bwɛn-ndoo, Yeso wa Nadzalet, ndɔɔ yi esi bee yɛ mã? Yɛ bee yi obam? Mɛ̃ bam ngyɛɛ kwɛn yɛ li mbuul wu Ɔ̃nsensal wu eyuɔɔl Nziã!» 35 Yeso bu atam ɔ̃fel wu ɔ̃bi-ɔ̃bi ye nkoo yueel ndiri: «Kal pi, bvool pal!» Ɔ̃fel wu ɔ̃bi-ɔ̃bi otyel mbuul ondɛ me nsie ke nkwel a baal bueel, bvool opal onse ndɛ, k'atueel ndɛ mpal wɛ.

36 Baal bueel akam, bvool abvi bam-a-bam oyɛɛn bubu: «Ayɛɛn mã ndɛ mã, mã bwɛn-a-bwɛn! Ndɛ ayɛɛn y'ɛ̃fel mi ɛ̃bi-ɛ̃bi ye nkoo yueel y'omfam, myɛ̃ hɛ̃ ɛ̃pal?» 37 Obobɔ, nsia a Yeso etsɔɔn m'etswi e nsie kieel.

38 Yeso ombal nzɔ a ãbuɛɛn, oyɛn nzɔ a Simɔ̃. Ŋ'esa oŋɔ̃, okɔ o ndɛ wu Simɔ̃ wu ɔ̃kaal áli ye baa li bibi. Baal b'áli oŋɔ̃ aluɔɔn ola Yeso ndiri aboo ndɛ. 39 Yeso bu apfɔɔn nkal a ndɛ, bvool bu ayɛɛn ye baa ye nkoo yueel, ndɛ baa bu efi. Ndɛ bu abvi osal me ndɔɔ a bɔ kɛn a me lio olɔ.

40 Ŋ'edziin tal, abiri baal bam bueel b'áli y'ãluu m'emfa bwɛn emfa ola Yeso. Ndɛ ondɔɔl mbuul m'ɔ̃mɔ̃-ɔ̃mɔ̃ onse bɔ kuɔɔl, ãluu ã bɔ bam bueel bu ãfi. 41 Ɛ̃fel mi ɛ̃bi-ɛ̃bi ɛ̃pal onse anga-ãluu, ɛ̃luɔɔl kokɔ ndiri: «Yɛ li Muaan a Nziã.» Kɛn a Yeso ákeyiaan myɛ̃, bvool ákeluo myɛ̃ oyɛɛn, ke ngwel wɛ myɛ̃ ɛ̃yɛɛ kwɛn ndɛ oli Mãsia.

42 Ŋ'etsi bviil, Yeso opal onse bviil, bu ayɛn nkal ɔ̃baan. Baal bibi abvi ndɛ obii. Ŋ'emwɛn bɔ ndɛ, bɔ ayɛɛn ndɛ ndiri akal ye bɔ mboo mɔ̃. 43 Kɛn a Yeso obveel bɔ bubu: «Ebvaan kwɛn mɛ̃ eyetsal Nsia yi Ngesɛ yi Okwɛn o Nziã k'ãbviil mãkyɛ, ke ngwel wɛ obɔ otsɛn b'etam Nziã mɛ̃.» 44 Ndɛ áketee onse ãnzɔ m'ãbuɛɛn mã Yude.