1 Baal bam bueel b'awal mpal ye baal b'ãbi asyel tsotsoo a Yeso me ndɔɔ yi ayoo m'eyɛɛn ndɛ. 2 Afalisaye y'ayiool b'ãngel ayoo nkyee ye Yeso, ɔ̃tswɛ-pa ndiri: «Ndɛ abeyɔɔ baal b'ãbi, bvool abedza ye bɔ!» 3 Yeso bu ati bɔ mboo yi: 4 «Onse byɛ, okɛɛn mbuul oli y'emɛmɛɛ̃ ɔ̃nkam (100), emɛmɛɛ̃ ngemɔ̃ edziɔɔn, ndɛ ol'osuul emɛmɛɛ̃ ɛ̃kuun-bva ye bva (99) bvi esiil onse ɔ̃baan, me ndɔɔ yi ayebii ngemɔ̃ ki edziɔɔn, tiil ye k'ebɔɔ ndɛ kyɛ, mfya? 5 Ŋ'emwɛn ndɛ kyɛ, y'esɛ kyam kieel, ndɛ ol'ondɔɔl kyɛ nkal esɔɔ̃. 6 Ndɛ atɔ nzɔ, ndɛ ol'obvool andoo a ndɛ ye b'akal tsotsoo a ndɛ, me ndɔɔ yi aliaal bɔ ndiri: "Esia mpaa ye mɛ̃, ke ngwel wɛ mɛ̃ mwɛn emɛmɛɛ̃ e mɛ̃ ki edziɔɔn!" 7 Emfa ngemɔ̃, mɛ̃ eyɛɛn byɛ wɛn, esɛ ki eli ke ywel me ndɔɔ a mbuul ãbi ngɔmɔ̃ wu okaal ɔ̃kwal, enduru ki me ndɔɔ a baal ɛ̃kuun-bva ye bva (99) ba dzu bɛn k'ali ye kɔɔ li akaal ɛ̃kwal ɛ̃ bɔ wɛ.»

8 «Kɛn a m'emfa kiki, okɛɛn ɔ̃kaal ngɔmɔ̃ oli ye nzi yi ãbvieel kuun, ŋɛn ndɛ bvieel ngemɔ̃ etswel, ndɛ andɛɛl mbunda, akuɔɔn nzɔ bvool abii lɔ ngesɛ-ngesɛ, tiil ye k'emwɛn ndɛ lɔ. 9 Ndɛ amwɛn lɔ, ndɛ ol'obvool andoo a ndɛ ye b'akal tsotsoo ye ndɛ, me ndɔɔ yi aliaal bɔ ndiri: "Esia mpaa ye mɛ̃, ke ngwel wɛ mɛ̃ mwɛn nzi e mɛ̃ yi edziɔɔn!" 10 Emfa ngemɔ̃, mɛ̃ eyɛɛn byɛ wɛn esɛ bibi ol'ãnzwel ã Nziã me ndɔɔ a mbuul a ãbi ngɔmɔ̃ wu okaal ɔ̃kwal.»

11 Yeso bvool olieel ndiri: «Mbuul ngɔmɔ̃ áli yɛ baan buaal b'abɔɔl. 12 Wu ɔ̃kiɔɔl olieel tal ndiri: "Taal, kab opfel o yɛ, wa boo li e mɛ̃." Obobɔ, tal okab opfel o ndɛ mpɛ̃-a-mpɛ̃ a baan ange-buaal. 13 Ke mbee ãtsoo ãtsi-tsiri, muaan wu ɔ̃kiɔɔl ondɛ otiɔ boo li opfel li ndɛ, otwel nkuul, bu ayɛn ye nzi yi ndɛ k'ɔ̃kiri wa lela. Okɔ ndɛ obɔɔ̃ nzi yi éli a ndɛ m'esɛ bvi ɔ̃kiri. 14 Ke mbee a ŋ'ebɔɔ̃ ndɛ yɔ yam yueel, ɔ̃lɔɔ osam m'ɔ̃kiri ondɛ, ndɛ bu abvi okaan. 15 Ndɛ oyebii ɔ̃sal ola mbuul ngɔmɔ̃ wu ɔ̃kiri ondɛ. Mbuul ondɛ otam ndɛ onse ãnguun ã ndɛ, m'oyebuaal b'anguru. 16 Ŋ'enduru ndɛ nzal, ndɛ oboodzii k'adza eluɔ bvi edza anguru, kɛn a wu owi ndɛ bvɛ pyɛ. 17 Obobɔ, ndɛ obvi otsam, bvool oyɛɛn ndyam-a-ndyam ndiri: "Asal a tal a mɛ̃ bueel abedza onge b'edzii bɔ, bɛn mɛ̃ kwɛn wu ebepɛn ɔ̃la me nzal! 18 Mɛ̃ èbvool ola tal a mɛ̃, bvool èyɛɛn ndɛ bubu: Taal, mɛ̃ nsi obi ke mviil ã Nziã, mɛ̃ hɛ̃ nsi obi ke mviil ã yɛ. 19 Mɛ̃ ke mvaan wɛ kwɛn yɛ bvool wal mɛ̃ onge muaan a yɛ. Wal mɛ̃ onge ngɔmɔ̃ onse asal a yɛ." 20 Obobɔ, ndɛ otwel nkuul, okɔɔl ola tal.

Ŋ'éli ndɛ kɛn lela ye nzɔ, tal otaal ndɛ, nyiĩ a muaan yam ebɔɔ, otsuu ntiin m'oyeyɔɔ o ndɛ, bu abuun ndɛ ke nkii. 21 Muaan olieel ndɛ bubu: "Taal, mɛ̃ nsi obi ke mviil ã Nziã, mɛ̃ hɛ̃ nsi obi ke mviil ã yɛ. Mɛ̃ ke mvaan wɛ kwɛn yɛ bvool wal mɛ̃ onge muaan a yɛ." 22 Kɛn a tal olieel asal a ndɛ bubu: "Eya tswa-a-tswa y'ekɔ ki enduru obvie, bvool elaal ndɛ endaa m'ɔ̃liɛɛn, y'asimpal me ntaã. 23 Eyia muaan-ngwɛmbɛ wu ɔ̃lam wa ye mbaal, bvool ebam ndɛ. Bia-byɛ edza, esia mpaa. 24 Ke ngwel wɛ, muaan a mɛ̃ wu emwɛn byɛ wu ákwi, bvool oyebvool mwiĩ! Ndɛ ádziɔɔn, bvool odzuul!" Obobɔ, bɔ abɛɛn pfuun.

25 Me lio olɔ, muaan wu ɛ̃kwel áli k'ãnguun. Ŋ'eyii ekɔɔl ndɛ, ndɛ atɔ tsotsoo a nzɔ, ndɛ oyoo nkyal e sio y'enkiin ki ãkɛn. 26 Ndɛ oti ɔ̃sal ngɔmɔ̃ mbel, bu afuul ndɛ otsɛn b'ãndɔɔ m'ãbwel. 27 Ɔ̃sal obveel ndɛ ndiri: "Mvɔɔl a yɛ oyebvool nzuru kɛɛ-kɛɛ, obɔ otsɛn bɛn tal a yɛ obam muaan-ngwɛmbɛ wu ɔ̃lam wa ye mbaal."

28 Etɔ oŋɔ̃, muaan wu ɛ̃kwel oyi mpuru, bu abee nzɔ osam. Obobɔ, tal opal oyelɛɛn ndɛ me ndɔɔ yɛn ndɛ asam nzɔ. 29 Kɛn a muaan obveel tal ndiri: "Meyoo, mvel eyii yam bibi yi ebekiɔɔn mɛ̃ ebenzɔɔ me yɛ ɛ̃sal osa, k'eli ye tsoo si ngelemɔ̃ li mbee mɛ̃ ontam o yɛ wɛ. Kɛn a tsoo si ngelemɔ̃ pyɛ li ewi yɛ mɛ̃ onkyam muaan-ntab, kwɛn mɛ̃ mbɛɛl pfuun y'andoo a mɛ̃! 30 Bɛn muaan a yɛ wu ayebvool, ndɛ wu obɔɔ̃ nzi e yɛ yueel m'akaal-nga-esio, me ndɔɔ a ndɛ, yɛ bu bam muaan-ngwɛmbɛ wu ɔ̃lam wa ye mbaal!" 31 Tal obveel ndɛ ndiri: "Muaan a mɛ̃, ãtsoo mbueel yɛ li ye mɛ̃, bvool bvam bvieel bvi ndi a mɛ̃ eli bvi yɛ. 32 Kɛn a bia-byɛ ebvaan ebɛɛl pfuun bvool esia mpaa, ke ngwel wɛ mvɔɔl a yɛ wu ákwi, bvool oyebvool mwiĩ, ndɛ ádziɔɔn, bvool odzuul!"»