1 Me tsoo li eyenge m'epal-epal kwɔɔl, akaal ayɛn mpiɛɛn. Bɔ abiri mbaal y'ãnasi m'éyɛɛl bɔ. 2 Bɔ amwɛn kwɛn ákeel nkɔɔn yi ádzool ɔ̃nywã a mpiɛɛn me pyɛ. 3 Bɔ asam onse mwiĩ a yɔ, kɛn a bɔ k'amwɛn ebiĩ e Mfam Yeso wɛ.

4 Kwɛn ŋɛn bɔ ebɔɔ e nsie emeedziɔɔn, abɔɔl buaal apal tsotsoo a bɔ m'ekɔ bvi enyɛɛn bibi. 5 Akaal buɔ obɔɔ bɔ bibi, bɔ bu apfeel ãsu. Baal obɔ alieel bɔ ndiri: «Otsɛn omã b'ebii byɛ mbuul wa mwiĩ onse b'ákwi-ákwi? 6 Ndɛ bvool k'ali ŋã wɛ, ndɛ amaasiool. Eyeel ãndɔɔ m'ékeyɛɛn ndɛ byɛ me lio li éli ndɛ kɛn ke Ngalile, 7 ndiri: "Ebvaan kwɛn atiɔ Muaan a mbuul me mviɔɔl ɛ̃ baal b'ãbi, abɛɛl ndɛ m'enkulusu. Ndɛ àsiool me tsoo li ãtyel."» 8 Obobɔ bɔ ayeel ãyɛɛn ã Yeso.

9 Akaal ambal mpiɛɛn, ayeliaal mam mbueel m'ãbwel ol'antam ange-kuun y'ɔ̃mɔ̃, y'ayio bakyɛ. 10 Akaal obɔ áli bɔ ba: Mali wu ola bo Magadala, ye Dzane, ye Mali wu ngoo a Dzak. Akaal bakyɛ b'áli ye bɔ ke mpiɛɛn alieel hɛ̃ nsia oyɔ ol'antam. 11 Kɛn antam amwɛn ãndɔɔ m'eyɛɛn akaal omɔ̃ ngwel, obobɔ bɔ k'akiool mɔ̃ wɛ. 12 Kɛn a Piɛɛl otɛɛn otsuu ntiin ke mpiɛɛn. Ndɛ opfɔɔn, omwɛn kɛn ɛ̃pa mi ekɔ mi ádzii ebiĩ, ndɛ bu akɔɔl nzɔ y'ɛ̃kam bibi me m'ãbwel.

13 Kɛn a me tsoo alili olɔ, ayio a ndɛ buaal ákeyi ola b'ata m'Emahus. Ola obɔ ye Yelusalem oli m'akilometele abekuun ye buaal. 14 Ayio obɔ áketa ɔ̃sam wu ãndɔɔ mbueel m'ã́bwel. 15 Ŋ'éketa bɔ ɔ̃sam bvool áketsuun, Yeso ndyam otɔ, bu abvool nkuul ye bɔ. 16 Ayio ákemwɛn ndɛ, kɛn a mviil ã bɔ ã́li m'ofoo: Bɔ k'ákekoo k'ayɛɛ ndɛ wɛ.

17 Ndɛ bu afuul bɔ ndiri: «Byɛ eyi etsuun, ke ndɔɔ yam mã?» Ayio bu atɛɛn y'ãwua mbueel. 18 Ngɔmɔ̃ onse bɔ wu ata me Kelopas obveel ndɛ ndiri: «Mbuul kɛn a yɛ onse Yelusalem ŋã, wɛn k'ayɛɛ ãndɔɔ m'ãbwel m'ãtsoo mã wɛ!»

19 Yeso obveel ndiri: «Omɔ̃ ãndɔɔ ãmã?» Bɔ abveel ndɛ bubu: «Ãndɔɔ m'ãtal Yeso wa Nadzalet. Ndɛ áli ɔ̃liaal-ɛ̃kiɛɛn a Nziã wu ɔ̃nɛn m'ãyɛɛn y'ɛ̃sal ɛ̃ ndɛ ke mviil ã Nziã ye mã baal bueel. 20 Kɛn amfam b'angaa-a-Nziã y'amfam a bia-byɛ bakyɛ atiɔ ndɛ, kwɛn awa ndɛ etumbu ki epfu, bvool abɛɛl ndɛ m'enkulusu. 21 Bee éketa kaã wɛn owɛɛl ndɛ mbuul wu akaapaal Isalayel m'onkyal. Kɛn a nonɔ̃ bu eyii tsoo li ãtyel ke mbee a ŋ'ebwel ãndɔɔ omɔ̃. 22 Kɛn akaal ke kwɛ ba nkel a bee, asuul bee ebɔɔ e nsie edziɔɔn. Bɔ ayɛn mpiɛɛn epal-epal kwɔɔl, 23 bɔ k'amwɛn ebiĩ e ndɛ wɛ. Ŋ'eyebvool bɔ, bɔ alieel bee ndiri bɔ amwɛn ãnzwel ã Nziã ãpal ola bɔ, bu ãlieel bɔ ndiri Yeso oli mwiĩ. 24 Obobɔ, baal ke kwɛ onse nkel a bee ayɛn mpiɛɛn hɛ̃, bɔ amwɛn ãndɔɔ mbueel kɛn a m'emfa ki eyɛɛn akaal. Kɛn a ndyam wu Yeso, bɔ k'amwɛn ndɛ wɛ.»

25 Yeso bu alieel bɔ bubu: «Yɛɛ-ndɔɔ, baal b'aywɛn ãyal! Eli ye fool kwɛn byɛ ekiool m'eyɛɛn aliaal-ɛ̃kiɛɛn a Nziã! 26 Mãsia ale k'akaamwɛn fool li obobɔ wɛ, m'osam o ndɛ onse omfam o ndɛ?» 27 Oŋɔ̃ obɔ, Yeso otsɛɛl bɔ ãndɔɔ m'áyɛɛn me ndɔɔ a ndɛ onse Ɔ̃nkaan a Nziã wueel. Ndɛ obɛɛn m'ɛ̃nkaan ɛ̃ Moyize, bu ayɛn tiil onse ɛ̃nkaan mvieel mi Aliaal-ɛ̃kiɛɛn a Nziã.

28 Ŋ'etɔ bɔ tsotsoo ola b'ékeyi bɔ, Yeso osi empa onge mbuul wu ayi lela. 29 Kɛn a ayio ange-buaal atɛɛl ndɛ y'ɔ̃tɛɛ̃ wueel ndiri: «Kal kɛn ye bee ŋã! Ke ngwel wɛ, tal emeeyel, tsia oboobva.» Yeso bu asam onse nzɔ me ndɔɔ yi akal ye bɔ. 30 Ŋ'ewel ndɛ mboo m'odza ye bɔ, ndɛ owel mampa, bu abveel Nziã ãtuɛɛn, ke mbee oŋɔ̃ ndɛ otsiil ndɛ, bu awi bɔ. 31 M'emfa okyɛ, ayio mviil ãyɔɔl, bɔ bu ayeyɛɛ kwɛn eli Yeso. Kɛn a ndɛ odziɔɔn ke nkwel a bɔ.

32 Bɔ bu abvi oyɛɛn bam-a-bam ndiri: «Bvoo-mwɛn, esɛ ekeluul ɛ̃kwal ɛ̃ bia-yɛ, ŋ'ekeyɛɛn ndɛ ye bia-yɛ me nkuul, bvool akesɛɛl bia-yɛ Ɔ̃nkaan a Nziã!»

33 Bɔ atɛɛn bam nyã kɛn a me lio olɔ, bu akɔɔl Yelusalem. Bɔ ayebɔɔ antam ange-kuun y'ɔ̃mɔ̃ ye bakyɛ bam bueel abvɔɔn mboo ngamɔ̃. 34 Baal bueel b'ábvɔɔn obɔ ayeyɔɔ ayio ange-buaal y'ãyɛɛn m'ɔ̃nywã ndiri: «Taa-taa bam Mfam amaasiool m'epfu! Ndɛ opal ola Simɔ̃!» 35 Ayio ange-buaal hɛ̃ abvi bɔ m'emwɛn bɔ me nkuul oliaal, y'emfa ki eyɛɛ bɔ Yeso me lio li etsiil ndɛ mampa ye bɔ.

36 Ŋ'ebeta bɔ ɔ̃sam ondɛ, Yeso ndyam opal onse bɔ, bu abio bɔ bubu: «Yɔɔl opi okal ye byɛ!» 37 Ayio ongɛɛ y'etiɔɔl ebɔɔ bɔ bibi. Bɔ áketsam ndiri bɔ ɔ̃kwii ákemwɛn. 38 Yeso ofuul bɔ ndiri: «Ki etiɔɔl byɛ me buɔ emã? M'emã ɛ̃kwal ɛ̃ byɛ ɛ̃luul m'enkyam? 39 Etal mviɔɔl ye ntaã e mɛ̃, wu mpii mɛ̃ ndyam! Ebiɛɛn mɛ̃, bvool etal! Ɔ̃kwii lɔɔ-okal oli ye tuo y'ɛ̃ywee onge b'emwɛn byɛ mɛ̃ ye myɛ̃?»

40 Ŋ'ebeyɛɛn ndɛ obobɔ, ndɛ osuo bɔ mviɔɔl ye ntaã e ndɛ. 41 Onge bɛn ayio k'ákekoo k'akiool kɛn wɛ, me ndɔɔ yɛn bɔ áluul m'esɛ, bvool áli y'ɛ̃kam bibi, Yeso ofuul bɔ ndiri: «Byɛ ŋ'eli ye ki-odza?» 42 Bɔ awi ndɛ etswel e nswi ki amaabɛɛl. 43 Yeso owel etswel e nswi okyɛ, bu adzi kyɛ ke mviil ã bɔ.

44 Ke mbee oŋɔ̃, ndɛ oyɛɛn bɔ bubu: «Ŋ'éli mɛ̃ kɛn ye byɛ, mɛ̃ mpii éyɛɛn byɛ wɛn: Ãndɔɔ mam mbueel m'ákel me ndɔɔ a mɛ̃ onse ɛ̃nkaan mi ngel a Moyize, onse ɛ̃nkaan mi Aliaal-ɛ̃kiɛɛn a Nziã, y'ɛ̃nkaan mi Ãnziĩ, ebvaan asa mɔ̃.»

45 Etɔ oŋɔ̃, Yeso odzweel ãyal ã bɔ kwɛn bɔ abɔɔ otsɛn b'ãndɔɔ m'eyɛɛn Ɔ̃nkaan a Nziã. 46 Ndɛ bvool olieel bɔ bubu: «Etal m'ákel: Mãsia ebvaan amwɛn fool, kɛn a ndɛ akieel asiool onse b'ákwi-ákwi me tsoo li ãtyel. 47 Me nkuũ a ndɛ, akieel atee onse ã yam mam mbueel, fa Yelusalem ndiri: Ebvaan kwɛn byɛ ekaal ɛ̃kwal ɛ̃ byɛ, me ndɔɔ yi ebɔɔ odzeel b'ãbi ã byɛ. 48 Byɛ eli baal b'amwɛn ãndɔɔ omɔ̃, bvool èyɛɛn me ndɔɔ a mɔ̃.»

49 «Me b'otal mɛ̃, mɛ̃ èyuɔɔl byɛ Ɔ̃fel wu Ɔ̃nsensal wu éwi Taal lɔɔ. Kɛn a me b'otal byɛ, ekal kɛn a ŋã onse bviil li, tiil ye k'eluul byɛ me mpɛn yi efa ola Nziã.»

50 Ke mbee oŋɔ̃, Yeso obiri ayio sua ola bo Betani. Ndɛ ondɛɛl mviɔɔl ke ywel, bvool ondɔɔl bɔ kuɔɔl. 51 Me lio li ékendɔɔl ndɛ bɔ kuɔɔl, ndɛ osiil bɔ, bu andɛɛl ndɛ ayɛn ywel ola Nziã. 52 Kɛn ayio, ke mbee ŋ'ebvi bɔ ãbuo m'olweel o ndɛ, bɔ akɔɔl Yelusalem, ɛ̃kwal ɛ̃ bɔ ɛ̃luul m'esɛ. 53 Tsoo bwɛn a tsoo, bɔ áli onse Nzɔ a Nziã m'olweel o Nziã.