Lucas 5

Ayio a Yeso b'ɛ̃kwel

1 Tsoo ngelemɔ̃, Yeso áketee nku-a-nku a nzal yi Dzenasalet. Baal bibi ákeywɛn bakyɛ tsotsoo a ndɛ, me ndɔɔ yi ayoo Endɔɔ e Nziã. 2 Ndɛ omwɛn ãbvuaal mbuaal k'esiɛɛn e nzal oyɔ. Aswal b'answi apal onse mɔ̃, bu ayii asuɔɔl ãkii ã bɔ. 3 Ndɛ osam onse bvuaal ngɔmɔ̃, b'óli bo Simɔ̃. Ndɛ bu alieel ndɛ wu Simɔ̃ ndiri: «Siaal bvuaal muaan lela y'ekwel.» Yeso obvi nsɛn onse bvuaal, bu abvi baal otee.

4 Ŋ'eman ndɛ oyɛɛn, ndɛ olieel Simɔ̃ bubu: «Syal ke mboo yi ye dzio, bvool etyal ãkii ã byɛ, m'oswal b'answi.» 5 Simɔ̃ obveel bubu: «Taal, bee emwɛn fool m'oswal tsatsa, ki ebɔɔ pyɛ. Kɛn onge bɛn yɛ lieel mɛ̃ wɛn ntyal ãkii, mɛ̃ hɛ̃ ètyal mɔ̃.» 6 Ŋ'etyel bɔ ãkii, bɔ abɔɔ answi bam bibi. Ãkii ã bɔ ãyii ãsɔɔ okɔɔl. 7 Bɔ apyel anga-ndoo a bɔ b'áli onse bvuaal bokyɛ, kwɛn bɔ ayewuaal a bɔ. Bɔ ayi, abvɔɔn ye bakyɛ, bu aluul ãbvuaal m'answi bam bibi. Ãbvuaal ãluul mam tɔ, bvool bu ãyii ãbii odziin.

8 Ŋ'emwɛn Simɔ̃ Piɛɛl ãndɔɔ omɔ̃, ndɛ obvi ãbuo ke nkwel a Yeso, bu ayɛɛn bubu: «Mfam, syal lela ye mɛ̃, ke ngwel wɛ mɛ̃ ndi mbuul ãbi.» 9 Taa-taa bam, Simɔ̃ Piɛɛl ye baal bueel b'áli ye ndɛ ebangɛɛ ébɔɔ bɔ, me ndɔɔ olɔɔ b'answi b'ébɔɔ bɔ. 10 Andoo a ndɛ b'áli onse bvuaal bokyɛ: Dzak ye Dzaã, b'áli baan a Dzebede hɛ̃, akam bibi. Obobɔ, Yeso olieel Simɔ̃ bubu: «Bee buɔ obal, ke ngwel wɛ bɛɛn nonɔ̃ ŋã, yɛ yii baal aswal.» 11 Ke mbee oŋɔ̃, bɔ asiɛɛn ãbvuaal, asiil eluɔ bvieel, bu aluɛɛn a Yeso.

Yeso oboo mbuul wa y'ãluu me leba

12 Tsoo ngelemɔ̃, Yeso áli onse bviil ngelemɔ̃. Mbuul wa y'ãluu me leba oyi oŋɔ̃. Ŋ'emwɛn mbuul ondɛ Yeso, ndɛ obvi ãbuo mbwii me nsie ke nkwel a ndɛ, bu aluɔɔn ola ndɛ ndiri: «Mfam, okɛɛn yɛ dzii, mbaal mɛ̃ oluu ba, kwɛn mɛ̃ nkal tsɛtsɛ!» 13 Yeso ondɔɔl ndɛ kuɔɔl, onywɛn me ndɛ, bu ayɛɛn ndɛ ndiri: «Mɛ̃ nzii obobɔ, oluu o yɛ ofi!» Bam kɛn alili oŋɔ̃, leba e ndɛ efi.

14 Yeso otam ndɛ bubu osa: «Bee mbuul si ngɔmɔ̃ oyɛɛn, yi y'asuo nzuru a yɛ ola ngaa-a-Nziã, kwɛn ndɛ atal yɛ ngesɛ. Wa kab hɛ̃, m'emfa ki ekel Moyize onse ɔ̃nkaan wu ãngel, m'emfa okyɛ baal bueel àyɛɛ kwɛn yɛ oluu ofi.» 15 Kɛn a nsia a Yeso éketsɔɔn kɛn otsɔɔn. Baal bibi abvɔɔn, me ndɔɔ yi ayoo ndɛ, bvool kwɛn bɔ abvuul m'ãluu ã bɔ. 16 Kɛn a Yeso ákeyi nkal ɔ̃baan, me ndɔɔ yi abuɛɛn.

Yeso oboo ekal

17 Tsoo ngelemɔ̃, Yeso ákeyiool. Afalisaye y'ayiool b'ãngel ábvi nsɛn tsotsoo a ndɛ. Bɔ áfi ãla mam mbueel mã Ngalile, ye mã Yude, ye bviil li Yelusalem. Waan e Mfam Nziã éli ye Yeso, kwɛn ndɛ aboo baal ba y'ãluu. 18 Enseel oŋɔ̃, baal ayi y'ekal ki ebiri bɔ nkal a ekal. Bɔ ákebii ãyal m'aswɛɛl mbuul ondɛ onse nzɔ, bvool asuul ndɛ ke nkwel a Yeso. 19 Kɛn a bɔ k'ákekoo k'aswɛɛl ndɛ wɛ, nzal-a-ŋɛn embuul énduru olɔɔ. Obobɔ, bɔ anɔɔn ke ywel a sɛɛ, ayɛɛl ãnzanza, bu aswɛɛl ekal okyɛ ke nkwel a Yeso, ke mviil ã baal bueel. 20 Ŋ'emwɛn Yeso okiool o bɔ, ndɛ olieel mbuul ondɛ bubu: «Ndoo a mɛ̃, mɛ̃ eyɛɛn yɛ wɛn, adzeel ãbi ã yɛ.»

21 Ayiool b'ãngel y'Afalisaye bu abvi oyɛɛn bam-a-bam bubu: «Mbuul wu ndyam nã ali? Ndɛ asiaan Nziã! Ndɛ k'ayɛɛ kwɛn wu abedzeel ãbi kɛn a Nziã ndyam wɛ?» 22 Kɛn onge bɛn Yeso otaal ãtsam m'ɛ̃kwal ɛ̃ bɔ, ndɛ olieel bɔ bubu: «Ndɔɔ mã yi etsam byɛ obobɔ? 23 Ayɛɛn ndiri: "Adzeel ãbi ã yɛ", oyɔ k'eli ndɔɔ yi mpal m'oyɛɛn wɛ, kɛn ayɛɛn ndiri: "Tɛɛn yi", oyɔ ndɔɔ yi enduru mpal m'oyɛɛn! 24 Ngesɛ, ebvaan byɛ eyɛɛ kwɛn Muaan a mbuul oli y'omfam b'adzeel ãbi me nsie yi.» Obobɔ, ndɛ wu Yeso olieel mbuul ondɛ ndiri: «Tɛɛn, wal ekal e yɛ, bvool yi nzɔ!»

25 Bam kɛn a me lio olɔ, mbuul ondɛ hɛ̃ otɛɛn ke nkwel a baal bueel, owel ekal ki éli ndɛ bɔ nkal a kyɛ, bu ayɛn nzɔ, bvool ayi atuɛɛn Nziã me nkuul a nkuul. 26 Baal bueel b'áli oŋɔ̃ ɛ̃kam bu ɛ̃si bɔ, bvool ayoo buɔ. Bɔ alweel Nziã, bvool ayɛɛn ndiri: «Bee nonɔ̃ emwɛn ãndɔɔ m'emwã!»

Osuaal o Lebvi

27 Ke mbee oŋɔ̃, Yeso opal, bvool omwɛn mbuul wu awal mpal wɛn nkuũ Lebvi. Ndɛ áli me nsɛn ke mboo a ndɛ yi ɔ̃sal. Yeso olieel ndɛ ndiri: «Luɛɛn a mɛ̃.» 28 Lebvi otɛɛn, osiil eluɔ bvieel, bu aluɛɛn a ndɛ.

29 Tsoo ngelemɔ̃, Lebvi obɛɛl pfuun me ndɔɔ a Yeso, ke nzɔ a ndɛ. Baal b'awal mpal akyam, ye baal bakyɛ hɛ̃ ákedza ye bɔ. 30 Afalisaye y'ayiool b'ãngel b'áli nkel ngamɔ̃ ye bɔ, abvi bɔ okwee. Bɔ bu alieel ayio a Yeso bubu: «Ndɔɔ mã yi edza byɛ ye baal b'awal mpal, ye baal b'ãbi ba?» 31 Yeso obveel bɔ ndiri: «Baal ba kɛɛ-kɛɛ k'ali ye kɔɔ li ɔ̃boo wɛ, kɛn abieel b'ali ye kɔɔ e ndɛ. 32 M'emfa kiki, mɛ̃ ke ngyi me ndɔɔ yi eta baal ba dzu mbel wɛ, be yenta mɛ̃ mbel baal b'ãbi, kwɛn bɔ akaal ɛ̃kwal ɛ̃ bɔ.»

Ndɔɔ yi etal ãbuɛɛn mã me nzal

33 Baal bakyɛ alieel Yeso bubu: «Ayio a Dzaã ye b'Afalisaye abekal me nzal bvool abebuɛɛn, kɛn a ba yɛ abedza bvool abenywã.» 34 Yeso obveel bɔ bubu: «Me lio li asa bal, ɔ̃baal k'asuul anga-ndoo a ndɛ me nzal wɛ, ŋ'eli ndɛ kɛn ye bɔ. 35 Kɛn ãtsoo ãkieel ãya m'ambaal ɔ̃baal onse bɔ. Obobɔ, bɔ akieel abee odza m'ãlio omɔ̃.»

36 Yeso hɛ̃ oti bɔ mboo yi: «K'eli ye mbuul wu ambaal mpɛɛl ekɔ ki enyiɔɔn wɛ, me ndɔɔ yi abaan ekɔ ki tsɔɔn. Ndɛ asa obobɔ, ndɛ ol'obiil ekɔ ki enyiɔɔn, mpɛɛl ekɔ ki enyiɔɔn yi etsiil ndɛ hɛ̃ olɔ k'ebvaan y'ekɔ ki tsɔɔn wɛ. 37 M'emfa kiki, mbuul hɛ̃ k'abekaal mbal m'ãlili onse ãmfel m'ãmaãyiil wɛ. Ndɛ asa obobɔ, mbal m'ãlili ol'ãbwel ãmfel omɔ̃: Ãmfel ol'ãbool, mbal bu ãtsɔɔn me nsie. 38 Mbal m'ãlili, ebvaan alɔ mɔ̃ kɛn onse ãmfel m'ãlili. 39 Mbuul k'abedzii mbal m'ãlili, ke mbee a ŋ'enywi ndɛ mbal m'ãmaãyiil wɛ. Ke ngwel wɛ, abeyɛɛn ndiri: "Mbal m'ãmaãyiil ãnduru obvie."»

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?