Lucas 21

Kab li ewi ɔ̃kaal wu ɔ̃pfiil

1 Ŋ'éli Yeso kɛn onse Nzɔ a Nziã, ndɛ atyal mviil nku-a-nku a ndɛ, ndɛ omwɛn apfel b'ákelɔ ãkab onse nkab yi alɔ mɔ̃. 2 Ndɛ omwɛn hɛ̃ ɔ̃kaal ngɔmɔ̃ wu ɔ̃pfiil wu ɔ̃ywal. Ɔ̃kaal ondɛ oyelɔ enzi-nzi bvi ãbvieel bviaal. 3 Ndɛ bu ayɛɛn bubu: «Taa-taa bam, mɛ̃ eyɛɛn byɛ wɛn, ɔ̃pfiil wu ɔ̃ywal wu olɔ nzi yi enduru yi baal bam bueel. 4 Ke ngwel wɛ, baal bam bueel awi kab li nzi yɛn bɔ k'ali ye kɔɔ e yɔ wɛ, kɛn a ndɛ, onkyam ŋɛn ndɛ oli ɔ̃ywal, ndɛ owi nzi yi ekeedza ndɛ me yɔ.»

Yeso oyɛɛn ndiri Nzɔ a Nziã ekieel etsɔɔn

5 Baal bakyɛ ákeyɛɛn me ndɔɔ a Nzɔ a Nziã ndiri yɔ eli y'ompal, m'ãnkɔɔn m'ãbvɛ-ãbvɛ m'áliɛɛn yɔ, y'eluɔ bvi áwi Nziã ãkab. Kɛn a Yeso oyɛɛn ndiri: 6 «Ãtsoo ãya ke nkwel mɛn eluɔ bvieel bvi emwɛn byɛ bvi ekieel etsɔɔn: Nkɔɔn si ngamɔ̃ k'ekieel esiil nkal a yinkyɛ wɛ.»

Ãndɔɔ m'ãkieel ãya ye k'efa ɔ̃kiri

7 Obobɔ, bɔ afuul Yeso ndiri: «Ɔ̃tee, lio emã li ekieel eya ãndɔɔ omɔ̃? Eliĩ emã ki ekieel esuo baal kwɛn lio li ãndɔɔ omɔ̃ ekoo?» 8 Ndɛ bu abveel bɔ bubu: «Ekal y'onkyab, kwɛn abee byɛ opfuru. Ke ngwel wɛ, baal bibi akieel aya me nkuũ a mɛ̃, ndiri: "Mɛ̃ ndyam ndi Mãsia!", bvool ndiri: "Lio lam emeekoo!"» Yeso olweel bubu: «Ebee bɔ oluɛɛn! 9 Ŋ'ekieel eyoo byɛ ɔ̃sam wu ãmvel, ye tsungaa wu ebii baal amfam a bɔ ombaal, ebee ye buɔ okal, ke ngwel wɛ, ebvaan kwɛn ãndɔɔ omɔ̃ tsɔɔn ãbwel ŋ'ɛ̃kwel. Kɛn ɔ̃kiri kieel k'afa alili oŋɔ̃ wɛ.»

10 Yeso bvool olieel bɔ ndiri: «Ãyam ã baal ãkieel ãdzwaan ye mãkyɛ, okwɛn ngɔmɔ̃ okieel odzwaan ye bokyɛ hɛ̃. 11 Nsie ekieel enziool nzuru kokɔ, m'ãmboo m'ãmboo, ekieel ekal y'ɛ̃lɔɔ y'eywiri. Ãndɔɔ m'ongɛɛ ãkieel ãbwel, eliĩ bvi enɛn hɛ̃ ekieel epal ke ywel.»

12 «Kɛn a ye k'ebwel ãndɔɔ omɔ̃ mbueel, akieel asiin byɛ, akieel atuaal byɛ fool. Akieel awa byɛ me mviɔɔl mi amfam b'ãnzɔ m'ãbuɛɛn, kwɛn atsiil ãndɔɔ ã byɛ, akieel atyal byɛ m'ãbwal. Me ndɔɔ a mɛ̃, akieel abiri byɛ k'ãmbal ol'akwɛn y'amfam. 13 Ãndɔɔ omɔ̃ ãkieel ãya onse byɛ, kwɛn byɛ eyɛɛn me ndɔɔ a mɛ̃. 14 Eyɛɛ bam ngesɛ bubu: Byɛ kieel k'etsam me ndɔɔ emfa ki ekieel etsuun byɛ k'ãmbal wɛ. 15 Ke ngwel wɛ, myam wu ekieel ewa byɛ ãyɛɛn y'ãyal m'ãsa kwɛn ataal a byɛ k'akieel akoo m'obee o mɔ̃ wɛ, bɔ hɛ̃ k'àbɔɔ ãyɛɛn m'abveel byɛ wɛ.»

16 «Onkyam atal a byɛ, y'angoo a byɛ, ye baan-ngoo a byɛ, y'eburu e byɛ, y'anga-ndoo a byɛ, bɔ akieel atiɔ byɛ, bɔ hɛ̃ akieel asa kwɛn abam baal bibi onse byɛ. 17 Baal bueel akieel abyal byɛ me ndɔɔ a mɛ̃. 18 Kɛn efu li ɛ̃tswɛ ɛ̃ byɛ si ngemɔ̃ k'ekieel epiool wɛ. 19 Ekal y'osɛ-mwiĩ, obobɔ byɛ ebɔɔ elaã!»

Otsal o Yelusalem

20 «Ŋ'ekieel emwɛn byɛ kwɛn ekel li ambwel-mbwel edzii Yelusalem, eyɛɛ kwɛn otsɔɔn o bviil olɔ ŋ'oyii tsotsoo. 21 Obobɔ, me lio olɔ, yɔɔl kwɛn baal a nsie yi Yude abal onse ãnkio. B'akieel akiɔɔl ke Yelusalem, apal onse oŋɔ̃. B'akieel akiɔɔl k'ãnguun, abee bviil obekɔɔl. 22 Ke ngwel wɛ, ãtsoo omɔ̃ ãkieel ãkal m'ewa Nziã baal etumbu, me ndɔɔ yi asa mbueel m'eyɛɛn Endɔɔ e Nziã. 23 M'ãtsoo omɔ̃, ãwua ol'akaal b'ãyam, ye b'awa baan ãbiaal! Taa-taa bam, ekieel ekal ye fool lam bibi onse ɔ̃kiri wu, Nziã akieel asuo mpuru a ndɛ nkal a baal ba. 24 Akieel abam bakyɛ m'epwel, akieel ayebiri bakyɛ me mpɛn k'ɛ̃kiri mvieel. Baal bɛn k'ayɛɛ Nziã wɛ akieel akyɛɛl Yelusalem bvool anyam ndɛ, tiil ŋ'ekieel ekoo lio li awi bɔ.»

Oya o Muaan a mbuul

25 «Ekieel ekal y'eliĩ bvi emwã onse tal, ye nswii, y'angam-a-ngam. Me nsie, ãyam ã baal ãkieel ãkal y'ãwua ye buɔ, me ndɔɔ a nkyal yi kokɔ yi efa k'ãdza m'ɔ̃ngwa y'epoo e mɔ̃. 26 Ŋ'ekieel etsam baal m'ãndɔɔ m'ãkieel ãya, bɔ akieel akwa m'ongɛɛ o mɔ̃, ke ngwel wɛ eluɔ bvieel bvi ke ywel ekieel etiɔɔl. 27 Obobɔ, akieel amwɛn k'eya Muaan a mbuul onse epɛn y'omfam ye waan lueel. 28 Ŋ'ekieel ebɛɛn ãndɔɔ omɔ̃ obwel, etɛɛn, eseel mviil ke ywel, ke ngwel wɛ obvuul o byɛ ŋ'òsa oya.»

Mboo yi ɔ̃ti wa fig

29 Ke mbee oŋɔ̃, Yeso oti bɔ mboo yi: «Etal ɔ̃ti wa fig wuo ɛ̃ti myam mvieel. 30 Ŋ'emwɛn byɛ kwɛn ɔ̃ti obvi onyuɔɔn, oŋɔ̃ byɛ eyɛɛ me byam wɛn ɔ̃bvu wa ngesɛ wu atsam eluɔ ŋ'ayii atɔ. 31 M'emfa kiki, ŋ'ekieel emwɛn byɛ kwɛn ãndɔɔ omɔ̃ ãbvi obwel, eyɛɛ kwɛn Okwɛn o Nziã oyii tsotsoo. 32 Taa-taa bam, mɛ̃ eyɛɛn byɛ wɛn baal ba lio li kieel k'akwa wɛ, ye k'èya ãndɔɔ omɔ̃. 33 Ywel ye nsie ekieel ebwel, kɛn ãyɛɛn ã mɛ̃ k'ãkoo k'ãbwel mam wɛ.»

Okal y'onkyab

34 «Ekal y'onkyab! Efua bvi enduru ɔ̃ndel, obɔɔ o mbal, ãtsam me ndɔɔ eluɔ bvi ɔ̃kiri, eluɔ obvɛ ebee ɛ̃kwal ɛ̃ byɛ olyam owa! M'emfa okyɛ, tsoo olɔ kieel k'ebva enseel me ndɔɔ a byɛ wɛ. 35 Onge b'esiin okii answi enseel, emfa kiki hɛ̃, tsoo olɔ ekieel ebva enseel me baal b'ɔ̃kiri ndyam wueel. 36 Oŋɔ̃ ekal y'onkyab, ebuɛɛn ãlio mbueel, kwɛn Nziã awa byɛ mpɛn yi ebvuul me mbueel m'ãya, bvool yi etɛɛn ke nkwel a Muaan a mbuul.»

37 Me mwiĩ, Yeso ákeyiool onse Nzɔ a Nziã, m'ãnkunkwal, ndɛ ákeyi nkio a ɛ̃ti mi Olibve, tsia ákebwel ndɛ okɔ. 38 Obobɔ, ŋ'éketsa bviil, baal bueel ákeya Nzɔ a Nziã, me ndɔɔ yi ayoo ndɛ.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?