1,2 Ke mbee oŋɔ̃, Yeso oyɛn onse bviil bwɛn a bviil, y'ola bwɛn ola. Okɔ, ndɛ áketee bvool áketsal Nsia yi Ngesɛ yi Okwɛn o Nziã. Antam ange-kuun ye buaal, y'akaal ke kwɛ áli ye ndɛ. Akaal obɔ bɛn tsɔɔn Yeso ábvuul bɔ m'ɛ̃fel mi ɛ̃bi-ɛ̃bi y'ãluu. Ãnkuũ ã bɔ mɔ̃ bu: Mali wu abeta me Mali wa Magadala, wu épaal Yeso ɛ̃fel mi ɛ̃bi-ɛ̃bi nsiaan onse ndɛ, 3 ye Dzane wu ɔ̃kal a Swudza, ngɔmɔ̃ onse asal b'áketal ãndɔɔ ã nzɔ a Elode, ye Sidzaã, y'akaal akyam boo-boo. Bɔ ákewuaal a Yeso y'ayio a ndɛ m'opfel o bɔ.

4 Baal afi m'ãbviil m'ãbviil, bu ayi ola Yeso. Onge bɛn embuul e baal bibi ébvɔɔn, ndɛ oti mboo yi: 5 «Mbuul ngɔmɔ̃ oyɛn oyekwɛn nsia onse ãnguun ã ndɛ. Me lio li ékeyiri ndɛ yɔ, yinkyɛ ebvi nkal a nkuul. Baal adzieel yɔ, bvool anywɛn ayedza yɔ. 6 Nsia yinkyɛ ebvi onse nsie yi eli y'ãnkɔɔn. Yɔ emɛn, kɛn a yɔ k'eyiil m'okɛɛ wɛ, nzal-a-ŋɛn nsie k'éli ye bwal wɛ. 7 Nsia yinkyɛ bvool ebvi onse ɛ̃ti mi ãnsiɛɛn. Yɔ emɛn nkuul ngamɔ̃ y'ɛ̃ti omyɛ̃. Myɛ̃ bu ɛ̃foo ekwɛn obvɛ. 8 Kɛn a nsia yinkyɛ bvool ebvi nkal a nsie yi ngesɛ. Yɔ emɛn, bvool eburu. Ekwɛn ɔ̃mɔ̃-ɔ̃mɔ̃ eburu nsia ɔ̃nkam.» Ke mbee oŋɔ̃, Yeso obiool ndiri: «Yɔɔl kwɛn wa y'ãtswi m'ayoo, ayoo!»

9 Ayio a Yeso afuul ndɛ bubu: «Otsɛn o mboo oyɔ omã?» 10 Ndɛ obveel bɔ ndiri: «Nziã osi kwɛn byɛ eyɛɛ ãndɔɔ m'ãli m'elwɔɔn, m'ãtal Okwɛn o Nziã. Kɛn ola baal bakyɛ, bɔ ayoo mɔ̃ m'ãmboo me ndɔɔ yɛn:

"Bɔ atal, ki amwɛn pyɛ,

bɔ ayoo, otsɛn okwaal wɛ✝."»

11 «Otsɛn o mboo oyɔ bɔ bu: Ekwɛn eli Endɔɔ e Nziã. 12 Ndɔɔ a nsia yi ebvi nkal a nkuul, esuo baal bɛn, ŋ'eyoo bɔ Endɔɔ e Nziã, ke mbee oŋɔ̃ Ɔ̃pfu oyi, bu ambaal lɔ onse ɛ̃kwal ɛ̃ bɔ, me ndɔɔ yi asa kwɛn bɔ abee lɔ okiool, kwɛn oŋɔ̃ bɔ hɛ̃ abee obvuul. 13 Ndɔɔ a nsia yi ebvi nkal nsie y'eli y'ãnkɔɔn, esuo baal bɛn, ŋ'eyoo bɔ Endɔɔ e Nziã, bɔ akiool lɔ y'esɛ. Kɛn a bɔ k'ayɔɔl lɔ elɔ ɛ̃dza wɛ, bɔ akiool lɔ kɛn a me lio etsi-tsiri. Me lio li eyi ãmpal onse bɔ, bɔ k'abekiool lɔ wɛ. 14 Ndɔɔ a nsia yi ebvi onse ɛ̃ti mi ãnsiɛɛn, esuo baal bɛn, ŋ'eyoo bɔ Endɔɔ e Nziã, lɔ k'eburu nsia yi eyel onse bɔ wɛ, me ndɔɔ ãtsam, y'opfel, y'efua bvi ɔ̃kiri, bvi efoo lɔ. 15 Ndɔɔ a nsia yi ebvi me nsie yi ngesɛ, esuo baal bɛn, ŋ'eyoo bɔ Endɔɔ e Nziã, ayɔɔ lɔ onse ɛ̃kwal mi ngesɛ, bvool mi kal-a-kal. Bɔ akwee lɔ y'osɛ-mwiĩ bueel, bu aburu nsia.»

16 «Mbuul andɛɛl mbunda, k'akoo k'apfeel ndɛ kantin wɛ, wuo k'akoo k'asuul ndɛ ke nsɛn a ntal wɛ. Kɛn a ndɛ andɔɔl ndɛ ke ywel a misa, kwɛn baal b'asam onse nzɔ amwɛn kal-a-kal. 17 Ke ngwel wɛ, ãndɔɔ mbueel m'ãli m'odziɔɔn ã̀mɔɔn. Ãndɔɔ mbueel mɛn baal k'ayɛɛ wɛ, àyɛɛ mɔ̃, bvool ã̀pal kal-a-kal. 18 Ekal y'onkyab m'emfa ki eyoo byɛ! Ke ngwel wɛ, mbuul wu oli y'eluɔ, àlweel ndɛ bvikyɛ. Kɛn a wu oywɛn eluɔ, àwɛɛl ndɛ onkyam ki etsi-tsiri ki ebetsam ndɛ ndiri ndɛ amaabɔɔ.*»

19 Ngoo ye baan-ngoo a Yeso ayi ola ndɛ. Kɛn a bɔ k'akoo k'amwɛɛn ye ndɛ wɛ, me ndɔɔ embuul. 20 Obobɔ, ayɛɛn Yeso ndiri: «Ngoo ye baan-ngoo a yɛ ali onkwel-a-nzi: Bɔ adzii k'amwɛn yɛ.» 21 Kɛn a ndɛ obveel bɔ ndiri: «Ngoo ye baan-ngoo a mɛ̃ ali baal b'ayoo Endɔɔ a Nziã, bvool alweel lɔ.»

22 Tsoo ngelemɔ̃, Yeso osam onse ebɛɛ y'ayio a ndɛ. Ndɛ olieel bɔ bubu: «Ebwel ongwel a nzal!» Bɔ bu ayɛn. 23 Me lio li eyii etsiil bɔ, Yeso olaal twal. Enseel oŋɔ̃, mfel ndyam wa kokɔ obvi opob me nzal. Ebɛɛ ebɛɛn oluul m'ãdza, bvool esiil etsi-tsiri kwɛn bɔ adziin.

24 Ayio asyel tsotsoo a Yeso, aseel ndɛ ndiri: «Mfam, Mfam, siool, bia-byɛ olɔ ekwii!» Ndɛ osiool, opɛɛn mfel y'epoo, ndiri: «Ebva mfyɛ!» Obobɔ, mfel ofi, empoo hɛ̃ efi, ɔ̃lii bu abvi. 25 Ndɛ bu alieel ayio ndiri: «Okiool o byɛ abɔ?» Buɔ obɔɔ bɔ, ɛ̃kam hɛ̃ ɛ̃si bɔ. Bɔ bu abvi ofuul bam-a-bam ndiri: «Wu mbuul wa bwɛn-a-bwɛn? Ndɛ apɛɛn mfel yi ãdza! Ãdza ãyoo ndɛ, mfel hɛ̃ oyoo ndɛ!»

26 Yeso y'ayio a ndɛ atɔ ongwel a nzal k'ɔ̃kiri wu eli bviil li Ngelesa, wu oli nsɔɔ̃-a-nsɔɔ̃ a nsie yi Ngalile. 27 Ŋ'epal Yeso onse ebɛɛ, mbuul ngɔmɔ̃ wu áli onse bviil olɔ oyemwɛɛn ye ndɛ. Mbuul ondɛ áli y'ɛ̃fel mi ɛ̃bi-ɛ̃bi. Etel émeeyiil ki éyii ebekal ndɛ kɛn odzuũ, bvool k'ákekal hɛ̃ onse nzɔ wɛ, ndɛ ákekal kɛn onse ãmpiɛɛn. 28 Ŋ'emwɛn ndɛ Yeso, ndɛ obvi ãbuo ke nkwel a ndɛ, bvool obvi ɛ̃sɔɔl okuaal ndiri: «Yeso, Muaan a Nziã-a-Mpuu, yɛ ye mɛ̃ ndɔɔ mã? Mɛ̃ nduɔɔn yɛ, bee mɛ̃ mpal otuaal!» 29 Ndɛ oyɛɛn obobɔ me ndɔɔ yɛn Yeso átam ɔ̃fel wu ɔ̃bi-ɔ̃bi k'apal onse ndɛ. Ãlio bibi, ɔ̃fel ondɛ ákesiin ndɛ. Obobɔ, baal ákekuru ndɛ mviɔɔl ye mviil m'ãmpaa, me ndɔɔ yɛn ndɛ abee obal. Kɛn a ndɛ áketsiil mɔ̃, bvool ɔ̃fel ondɛ ákebiri ndɛ onse ɔ̃baan.

30 Yeso ofuul mbuul ondɛ ndiri: «Nkuũ a yɛ nã?» Ndɛ obveel ndiri: «Nkuũ a mɛ̃ "Booboo".» Ndɛ oyɛɛn obobɔ, me ndɔɔ yɛn ɛ̃fel mi ɛ̃bi-ɛ̃bi ɛ̃́li bibi onse ndɛ. 31 Ɛ̃fel omyɛ̃ ɛ̃lɛɛn Yeso ndiri: «Mebee bee onse ywɛn e mbaa oyuɔɔl ndoo!»

32 Ŋ'esa oŋɔ̃, éli y'ɔ̃kel wu anguru wu ákedza tsotsoo oŋɔ̃, ke ywel a nkio. Ɛ̃fel mi ɛ̃bi-ɛ̃bi ɛ̃lɛɛn Yeso ndiri: «Meyɔɔl bee emesam onse anguru ba!» Yeso bu awi myɛ̃ nkuul yi ayesam onse anguru. 33 Myɛ̃ bu ɛ̃pal onse mbuul ondɛ, ɛ̃yesam onse anguru. Obobɔ, anguru bam bueel akuul nzuru nkal a nkio, ayeyiool onse nzal, bu adziin onse yɔ.

34 Ŋ'emwɛn baal b'ákebuaal anguru emfa ki ebwel ãndɔɔ omɔ̃, bɔ buɔ obɔɔ, bu abal. Bɔ ayɛn ayetsal nsia oyɔ onse bviil li Ngelesa y'ãla mã nku-a-nku a lɔ. 35 Baal bu ayi ayetal ãndɔɔ m'ãbwel. Ŋ'etɔ bɔ tsotsoo a Yeso, bɔ ayebɔɔ mbuul wu epal ɛ̃fel mi ɛ̃bi-ɛ̃bi onse ndɛ abvi nsɛn ke nkwel a ndɛ wu Yeso, alaal ekɔ, amaabvool bam m'ombuul o ndɛ. Baal buɔ bu obɔɔ. 36 Baal b'ámwɛn mbueel m'ã́bwel alieel bɔ emfa ki ábvuul mbuul wu áli y'ɛ̃fel mi ɛ̃bi-ɛ̃bi. 37 Obɔ otsɛn bɛn, baal bam bueel ba nsie yi eli bviil li Ngelesa ayɛɛn Yeso ndiri apal onse nsie a bɔ, ayi lela, ke ngwel wɛ bɔ ayoo buɔ bam bibi. Obobɔ, Yeso osam onse ebɛɛ, bu abvool ongwel a nzal. 38 Mbuul wu épal ɛ̃fel mi ɛ̃bi-ɛ̃bi onse ndɛ oluɔɔn Yeso kwɛn oŋɔ̃ ndɛ ayi ye ndɛ. Kɛn a Yeso obveel ndɛ ndiri: 39 «Bvool ola o yɛ, bvool liaal baal ãndɔɔ mam mbueel m'esi Nziã yɛ!» Obobɔ, mbuul ondɛ oyebiool onse bviil lam lueel, ãndɔɔ m'esi Yeso ndɛ.

40 Ŋ'ekɔɔl Yeso ongwel a nzal, embuul eyɔɔ ndɛ, ke ngwel wɛ baal bam bueel ákekiaal ndɛ. 41 Obobɔ, mbuul ngɔmɔ̃ wɛn nkuũ Yayilus oyi ola ndɛ. Ndɛ áli mfam a nzɔ a ãbuɛɛn. Ndɛ obvi ãbuo ke nkwel a Yeso, bvool oluɔɔn kwɛn ndɛ wu Yeso ayi nzɔ a ndɛ, 42 ke ngwel wɛ ɔ̃ndɛɛl a ndɛ muaan ngɔmɔ̃ wu ɔ̃kaal, wu áli me mvel nku-a-nku a kuun ye yuaal, ákekɔɔ ye lepfu.

Ŋ'ékeyi Yeso okɔ, ɔ̃bɔbɔ a baal ádzii ndɛ, bvool mbuul bwɛn a mbuul ákeywɛn ndɛ. 43 Onse oŋɔ̃, éli y'ɔ̃kaal ngɔmɔ̃ wu áli y'ãluu m'ékepal ãkel. Ãluu omɔ̃ ál'ãmaãyiil ye ndɛ mvel kuun ye yuaal. Ndɛ ál'amaatsal nzi yueel, me ndɔɔ yi ákeyi nzuru oboo ol'aboo. Kɛn a mbuul wu ákoo m'otɛɛl b'ãkel omɔ̃ k'áli wɛ.* 44 Ndɛ oyi ke mbee a Yeso, bvool onywɛn me nswɛɛ a ekɔ e ndɛ. Kɛn a me lio alili, ndɛ ãkel omɔ̃ ãtɛɛn. 45 Yeso ofuul baal ndiri: «Wu onywɛn me mɛ̃ nã?» Baal bam bueel atwɛn ndiri bɔ k'anywɛn me ndɛ wɛ. Piɛɛl bu alieel Yeso ndiri: «Mfam, embuul mpii edzii yɛ bvool ebeywɛn yɛ!» 46 Kɛn a Yeso obveel ndɛ ndiri: «Taa-taa bam, mbuul onywɛn me mɛ̃. Ke ngwel wɛ, mpɛn ngamɔ̃ epal onse mɛ̃.»

47 Ɔ̃kaal ondɛ omwɛn kwɛn amaayɛɛ ndɔɔ yi esi ndɛ. Y'etiɔɔl lam lueel, ndɛ oyebva ãbuo ke nkwel a Yeso. Ndɛ bu alieel Yeso ke nkwel a baal bam bueel otsɛn b'enywɛn ndɛ me ndɛ, y'emfa ki ebvuul ndɛ kɛn a me lio alili. 48 Yeso olieel ndɛ ndiri: «Muaan a mɛ̃, okiool o yɛ obvuul yɛ, yi ngesɛ!»

49 Kɛn a ŋ'ékeyɛɛn Yeso oŋɔ̃, mbuul ngɔmɔ̃ ofi nzɔ a Yayilus, oyewa ndɛ nsia ndiri: «Muaan a yɛ mpii amaakwa, bee kɛn a Ɔ̃tee mpal yi ngwel obetuaal!» 50 Ŋ'eyoo Yeso obobɔ, ndɛ olieel ndɛ ndiri: «Oyɛɛ ke kal ye buɔ wɛ, kal kɛn a y'okiool, muaan a yɛ àbvuul!»

51 Ŋ'etɔ Yeso ke nzɔ a ndɛ wu Yayilus, ndɛ k'akiool kwɛn mbuul si ngɔmɔ̃ asam onse nzɔ ye ndɛ wɛ. Wu ekiool ndɛ k'asam kɛn a Piɛɛl, ye Dzaã, ye Dzak, ye tal bwɛn a ngoo a muaan. 52 Baal bam bueel ákebool elel ki kokɔ, bvool áluul m'ãwua me ndɔɔ a muaan. Yeso bu ayɛɛn bɔ ndiri: «Ebee obelel! Ndɛ k'akwi wɛ, ndɛ kɛn a twal alaal.» 53 Kɛn a baal abvi ndɛ osyob, ke ngwel wɛ bɔ ayɛɛ kwɛn muaan amaakwa. 54 Kɛn a Yeso osiin kuɔɔl e muaan, bvool oyɛɛn bam kokɔ ndiri: «Muaan, siool!» 55 Kɛn a me lio alili, ndɛ ɔ̃fiaal okɔɔl, bu atɛɛn ɔ̃kiri. Yeso bu atam kwɛn awa ndɛ bvi-odza. 56 Tal ye ngoo a ndɛ ɛ̃kam ɛ̃bɔɔ bɔ. Kɛn a Yeso oluo bɔ k'ata mbuul si ngɔmɔ̃ ɔ̃sam a ndɔɔ yi ebwel.