1 Yɔɔl kwɛn mbuul bwɛn a mbuul akal ye lweel li amfam b’asuul ke nkwel, ke ngwel wɛ k’eli y’omfam bɛn k’ofi ola Nziã wɛ wɛ, bvool b’ali m’omfam, wu áwi bɔ ompu Nziã. 2 Obɔ otsɛn bɛn, wu obee k’alweel mfam, ŋ’abee k’alweel ɔ̃yɛɛl a Nziã. B’abee olweel abii etumbu e bam. 3 Ngwanywã, ŋ’esa mbuul obvɛ, ndɛ k’ali ye buɔ b’amfam wɛ, kɛn a ŋ’esa ndɛ obi, ebvaan ndɛ akal ye buɔ o bɔ. Yɛ dzii k’abee ye buɔ o mfam okal, oŋɔ̃ sa obvɛ, m’emfa okyɛ, ndɛ àtuɛɛn yɛ. 4 Ke ngwel wɛ, mfam abesa ɔ̃sal a Nziã me ndɔɔ obvɛ o yɛ. Kɛn a yɛ asa obi, kal ye buɔ, nzal-a-ŋɛn epwel ki esiin ndɛ ke ki ngwel wɛ. Ŋ’ebewa ndɛ baal etumbu, ndɛ ŋ’abesa ɔ̃sal a Nziã, m’osuo o mpuru a ndɛ wu Nziã ola mbuul wu asa obi. 5 Obɔ otsɛn bɛn, ebvaan akal ye lweel: K’eli kɛn a me ndɔɔ yi akal ye buɔ o mpuru a Nziã wɛ, eli hɛ̃ me ndɔɔ yɛn ɔ̃kwal a bia-byɛ asɔɔ obobɔ.

6 Obɔ hɛ̃ otsɛn b’ebefuru byɛ mpal. Ke ngwel wɛ, b’abeyɔɔ mpal oyɔ abesal me ndɔɔ a Nziã m’ɔ̃sal ondɛ. 7 Ewa mbuul bwɛn a mbuul eluɔ kyɛn ebvaan awa ndɛ. Okɛɛn mpal, efuru yɔ ola wɛn ebvaan afuru yɔ, okɛɛn nzi yi atsiil, efuru yɔ ola wɛn ebvaan afuru yɔ, okɛɛn lweel, elweel wu obvaan me lɔ, okɛɛn bvɛɛ, ewa bvɛɛ me wu obvaan me lɔ.

8 Ebee y’ebiin e mbuul okal. Ebiin e byɛ ekal kɛn a ki edzii byɛ bakyɛ. Ke ngwel wɛ, wu adzii wumɔ̃ ŋ’asi m’esɔɔ Ngel. 9 Ke ngwel wɛ, ãndɔɔ m’etam Ngel osa mã: «Oyɛɛ ke dzuu y’ɔ̃kal wuo y’ɔ̃lam a mbuul wɛ, oyɛɛ ke bam mbuul wɛ, oyɛɛ ke turu eluɔ e mbuul wɛ, oyɛɛ ke lɔ eluɔ e mbuul ɔ̃kwal wɛ.» Ãndɔɔ m’etam Ngel osa omɔ̃ mbueel ye m’ãsiil, ãsoo nzuru onse ngel ngamɔ̃ yi eyɛɛn bubu: «Yɛ adzii ngaburu-mbuul onge b’edzii yɛ nzuru a yam.» 10 Mbuul wu oli ye dzii k’asa ngaburu-mbuul obi wɛ. Ŋ’adzii bakyɛ, ŋ’asa m’etam Ngel osa.

11 Ewal ndɔɔ oyɔ y’ɔ̃bvɛn, ke ngwel wɛ, byɛ eyɛɛ lio li eyii bia-byɛ: Lio ŋ’emeekoo li esiool byɛ me twal, ke ngwel wɛ, meba, obvuul oyii bam tsotsoo a bia-byɛ, onduru emfa ki éli bɔ me lio li ékiool bia-byɛ Mãsia. 12 Tsia ŋ’asa abwel bvool bviil ŋ’oyii otsa. Obobɔ, bia-byɛ ebee ãndɔɔ m’empeel bvool elaal ãta mã mwiĩ. 13 Bia-byɛ ekal y’epfuũ bvi ngesɛ, bvi ebvaan m’okal a bvɛ me mwiĩ. Bia-byɛ ebee odza y’onywã b’onduru ɔ̃ndel, ebee y’anga-akal wuo y’anga-alam odzuu, eyɔɔl omwiĩ b’epwa, ebee obebel bvool ebee y’ɔ̃kwal nsɔɔ okal. 14 Kɛn ekal emfa ngemɔ̃ onge Mfam Yeso Mãsia. Ebee nguo okɛɛ me ndɔɔ a nzuru a byɛ m’osa b’ãndɔɔ m’etam yɔ.