1 Ke mbee oŋɔ̃, mɛ̃ mwɛn ãnzwel ãkyam mã ye waan m'ãfi ywel. Epɛn édzii mɔ̃, ɔ̃nkaan-wu-abaa áli nkal ɔ̃tswɛ a ndɛ. Osu o mɔ̃ óli onge tal, ɛ̃mpal ɛ̃ mɔ̃ onge ãkwii ã mbaa. 2 Mɔ̃ ã́kesiin muaan-ɔ̃nkaan wu áli kal me kuɔɔl. Mɔ̃ ãndɔɔl kuul ki elam nkal ãdza m'ɔ̃ngwa, ki ekal nkal a nsie. 3 Mɔ̃ bu ãbvi obiool onge b'eta ebob ɛ̃baan. Mɔ̃ ãbiool, oŋɔ̃ anzyel nsiaan asiaan. 4 Ŋ'esiaan anzyel ange-nsiaan, mɛ̃ boombii k'eswɛn m'eyɛɛn bɔ, kɛn a mɛ̃ ngyoo nkii ngamɔ̃ fa ywel elieel mɛ̃ ndiri: «Suul ãndɔɔ m'eyɛɛn anzyel ange-nsiaan ãkal m'edziɔɔn, oyɛɛ ke swɛn mɔ̃ wɛ.»

5 Obobɔ, ãnzwel m'emwɛn mɛ̃ tɛ nkal ãdza m'ɔ̃ngwa bvool nkal a nsie ãndɛɛl kuɔɔl ki elam ke ywel. 6 Mɔ̃ bu ãlab ɔ̃kyel me nkuũ a wu eli y'elaã ɔ̃bu, wu ási ywel ye bvi eli ke lɔ, nsie ye bvi eli me yɔ, ãdza m'ɔ̃ngwa ye bvi eli onse mɔ̃. Mɔ̃ ãlieel bubu: «Meba, lio li akiaal k'ebekal wɛ! 7 Kɛn a m'ãtsoo m'èfel ãnzwel mã nsiaan mvel-a-mvel, Nziã àsa ɔ̃yɛɛl a ndɛ wa m'edziɔɔn. Ɔ̃yɛɛl ondɛ oli m'emfa ki Nsia yi Ngesɛ yi élieel ndɛ asal a ndɛ b'aliaal-ɛ̃kiɛɛn a Nziã.»

8 Nkii yi éyoo mɛ̃ éfi ywel eyɛɛn ye mɛ̃ bvool. Yɔ elieel mɛ̃ bubu: «Yi y'awal muaan-ɔ̃nkaan wu oli kal me kuɔɔl ki ãnzwel m'ãli tɛ nkal ãdza m'ɔ̃ngwa bvool nkal a nsie.»

9 Mɛ̃ ngyɛn ol'ãnzwel, bu ngyɛɛn mɔ̃ ndiri ãwa mɛ̃ muaan-ɔ̃nkaan. Mɔ̃ alieel mɛ̃ ndiri: «Wal ndɛ, bvool mɛn ndɛ. Ndɛ akieel aluul ɔ̃la a yɛ me nkaa, kɛn onse ɔ̃nywã a yɛ, ndɛ akieel akal y'opɛɛn onge mbaal ã nzoo.»

10 Mɛ̃ ngwel muaan-ɔ̃nkaan me kuɔɔl ki ãnzwel, bu mɛn ndɛ. Onse ɔ̃nywã a mɛ̃, ndɛ áli y'opɛɛn onge mbaal ã nzoo, kɛn a ŋe mɛn mɛ̃ ndɛ, ɔ̃la a mɛ̃ oluul me nkaa.

11 Obobɔ, alieel mɛ̃ ndiri: «Ebvaan kwɛn yɛ bvool ayɛɛn ãndɔɔ m'ãfi ola Nziã m'ãyam bibi, m'ɛ̃kiri bibi, m'ɛ̃nywã bibi, m'akwɛn bibi.»