1 «Kel ãnzwel m'ebvɔɔn li bviil li Saades ɔ̃nkaan bubu:

"Yoo m'eyɛɛn wu oli y'ɛ̃fel ɛ̃ Nziã nsiaan y'angam-a-ngam nsiaan: Mɛ̃ ngyɛɛ ɛ̃sal ɛ̃ yɛ. Mɛ̃ ngyɛɛ bam ngesɛ wɛn nkuũ a yɛ ebeyi nsia ndiri yɛ li mwiĩ, kwɛn ŋɛn yɛ amaakwa. 2 Kal ngɔ-mwiĩ bvool wɛɛl eluɔ bvi esiil onse yɛ bvi eyii esɔɔ okwa. Ke ngwel wɛ, mɛ̃ mwɛn kwɛn ɛ̃sal ɛ̃ yɛ k'ɛ̃li ɔ̃koo ke mviil ã Nziã a mɛ̃ wɛ. 3 Oŋɔ̃ yeel ãtee m'eyɔɔ yɛ y'emfa ki eyoo yɛ mɔ̃. Kwɛɛ mɔ̃, bvool kaal ɔ̃kwal a yɛ! Okɛɛn yɛ ke kal ngɔ-mwiĩ wɛ, mɛ̃ èya ola yɛ onge b'eya mbuul a pfuul: Yɛ k'àyɛɛ bam lio li èpal mɛ̃ ola yɛ enseel wɛ. 4 Kɛn ola yɛ ke Saades, eli ye baal ke kwɛ bɛn k'abiil ekɔ e bɔ wɛ. Bɔ akieel adzuu ye mɛ̃ m'ekɔ bvi afuu-fuu, me ndɔɔ yɛn bɔ abvaan me ndɔɔ oyɔ. 5 M'emfa okyɛ, wu akieel abvel mpɛn, akieel alaal ndɛ ekɔ bvi afuu-fuu. Mɛ̃ ndyam kieel k'edzeel nkuũ a ndɛ onse ɔ̃nkaan wu elaã wɛ. Mɛ̃ ekieel ekiool ke nkwel a Tal a mɛ̃ y'ãnzwel ã ndɛ wɛn ndɛ oli wa mɛ̃.

6 Yɔɔl kwɛn wa y'ãtswi, ayoo m'eyɛɛn Ɔ̃fel ãbvɔɔn!"»

7 «Kel ãnzwel m'ebvɔɔn li bviil li Filadelefi ɔ̃nkaan bubu:

"Yoo m'eyɛɛn mbuul wu Ɔ̃nsensal, wa Taa-taa. Ndɛ osiin ɔ̃wɔɔl wu ɔ̃kwɛn David: Ndɛ adzweel, mbuul k'akoo m'okuru wɛ, ndɛ akuru, mbuul k'akoo m'odzweel wɛ. 8 Mɛ̃ ngyɛɛ ɛ̃sal ɛ̃ yɛ. Tal, mɛ̃ nsuul edzoo kal ke nkwel a yɛ, kyɛn mbuul si ngɔmɔ̃ k'akoo m'okuru wɛ, ke ngwel wɛ yɛ k'eli ye mpɛn bibi wɛ, kɛn a yɛ kwee Endɔɔ e mɛ̃, yɛ ke twɛn wɛ wɛn yɛ ke yɛɛ mɛ̃ wɛ. 9 Yoo, mɛ̃ èwa yɛ nkel a baal a Satana, b'abeyɛɛn ndiri bɔ ali Ayuda, kwɛn ŋɛn bɔ k'ali bɔ wɛ, bɔ abepfuru. Tal, mɛ̃ èsa kwɛn bɔ àyebva ãbuo ke nkwel a yɛ, bvool ayɛɛ kwɛn mɛ̃ ndyam edzii yɛ. 10 Onge bɛn yɛ akwee Endɔɔ e mɛ̃ li etam k'akal y'osɛ-mwiĩ, myam hɛ̃ èkiaal yɛ ŋ'ekieel eya lio li fool m'ɔ̃kiri wueel, me ndɔɔ yi akie ɛ̃kwal ɛ̃ baal a nsie. 11 Mɛ̃ ŋ'esa eya. Sɛn ãnã onse m'eli a yɛ, kwɛn mbuul si ngɔmɔ̃ abee ekɔrɔ e yɛ ki abewa wu obvel mpɛn owal. 12 Wu akieel abvel mpɛn, mɛ̃ èsa kwɛn ndɛ akal kwii onse Nzɔ a Nziã a mɛ̃, ndɛ kieel k'apal onse yɔ bam wɛ. Mɛ̃ èkel nkuũ a Nziã a mɛ̃ ye yi bviil e Nziã a mɛ̃ nkal a ndɛ. Bviil olɔ, eli Yelusalem wu alili, wu ofi ywel ola Nziã a mɛ̃. Mɛ̃ hɛ̃ èkel nkuũ a mɛ̃ yi enyiɔɔn nkal a ndɛ.

13 Yɔɔl kwɛn wa y'ãtswi, ayoo m'eyɛɛn Ɔ̃fel ãbvɔɔn!"»

14 «Kel ãnzwel m'Ebvɔɔn li bviil li Lahodise ɔ̃nkaan bubu:

"Yoo m'eyɛɛn wu oli Amɛn, ɔ̃tsweel wa dzu bvool wa ngwanyã, ndɛ wu obɛɛn o bvieel bvi ési Nziã. 15 Mɛ̃ ngyɛɛ ɛ̃sal ɛ̃ yɛ. Mɛ̃ ngyɛɛ ngesɛ wɛn yɛ ke li mfyɛ wɛ, ke li hɛ̃ ye mbaa wɛ. Yɛ kɛn akaakal ye mfyɛ wuo ye mbaa. 16 Kɛn onge bɛn yɛ ke li ye mfyɛ wɛ, ke li hɛ̃ ye mbaa wɛ, mɛ̃ èloo yɛ m'ɔ̃nywã a mɛ̃. 17 Yɛ atɔ m'oyɛɛn wɛn: Mɛ̃ ndi ɔ̃pfel, mɛ̃ ngyii y'obɔɔ bam, mɛ̃ ke ndi y'ekɔɔ li eluɔ kyam wɛ. Kwɛn ŋɛn yɛ adzɛɛn wɛn, yɛ nga-fool li, nga-ãwua li, ɔ̃ywal li, ɔ̃nkwa-mviil li, bvool odzuũ li. 18 Obɔ otsɛn bɛn, mɛ̃ ngwi yɛ luo li: Suun ɔɔl li emeesuul mbaa tsɛtsɛ ola mɛ̃, kwɛn yɛ kal ɔ̃pfel. Suun ekɔ bvi afuu-fuu, me ndɔɔ yi alaal bvɛ, kwɛn opfuru b'odzuũ o yɛ obee omɔɔn. Suun ɔ̃kyam wu aboo mviil, kwɛn yɛ mwɛn. 19 Bueel be nzii mɛ̃, mɛ̃ ebewa bɔ mbyel, bvool ebeseel bɔ nkuul. Obobɔ, kal y'ɔ̃tio wu ɔ̃sal, bvool kaal ɔ̃kwal. 20 Eyoo: Mɛ̃ ntɛɛn k'edzoo bvool ebebɛɛl kyɛ: Ŋɛn mbuul oyoo nkii a mɛ̃, odzweel nzɔ, mɛ̃ èsam ola ndɛ, èdza ye ndɛ, ndɛ àdza ye mɛ̃. 21 Wu akieel abvel mpɛn, mɛ̃ èmviaal ndɛ nsɛn ye mɛ̃ nkal a kiri e mɛ̃ li okwɛn, onge b'ébvel mɛ̃ bvool ébvi nsɛn ye Tal a mɛ̃ nkal a kiri e ndɛ li okwɛn.

22 Yɔɔl kwɛn wa y'ãtswi, ayoo m'eyɛɛn Ɔ̃fel ãbvɔɔn!"»