1 Ke mbee oŋɔ̃, eliĩ ngemɔ̃ ki enɛn epal ke ywel: Éli ɔ̃kaal ngɔmɔ̃. Ndɛ álaal tal, nswii áli ke nsɛn a ntaã e ndɛ, ekɔrɔ ki awa wu obvel mpɛn ki y'angam-a-ngam kuun ye buaal éli nkal ɔ̃tswɛ a ndɛ. 2 Ɔ̃kaal ondɛ áli ye yam, bvool áketa ɛ̃baan mi mpuru ye fool li aburu.

3 Eliĩ ekyam epal ke ywel: Éli nyam wu ata me dalagɔ̃ wu áli wu ɔ̃nɛn, bvool áli bɛ onge mbaa. Ndɛ áli m'ɛ̃tswɛ nsiaan y'ãnsiɛɛn kuun. Ɔ̃tswɛ bwɛn ɔ̃tswɛ álaal ekɔrɔ ki awa wu obvel mpɛn. 4 Ɔ̃kel a dalagɔ̃ ondɛ ákekuɔɔn boo ngemɔ onse ãboo ãtyel m'ɔ̃bvɛn wu angam-a-ngam ba ywel, bvool átyel bɔ me nsie. Dalagɔ̃ oyebva edzel ke nkwel ɔ̃kaal wu al'oyii asɔɔ oburu, me ndɔɔ yi awool ndɛ muaan a kɛn a ŋ'eburu ndɛ ndɛ oŋɔ̃. 5 Ɔ̃kaal ondɛ oburu muaan wu bɔɔl, wu akieel abiri ɛ̃kiri mvieel ye nkoo yueel. Kɛn andɛɛl ndɛ ywel ola Nziã ke kiri e ndɛ li okwɛn. 6 Me b'otal ɔ̃kaal ondɛ, ndɛ obal onse ɔ̃baan wa kɛɛ-kɛɛ. Okɔ, Nziã áfaal ndɛ mboo yi aliil ndɛ ãtsoo miil ngɔmɔ̃ y'ɛ̃nkam mviaal y'ãku-ãsɛɛn (1.260).

7 Mvel bu ebvi ke ywel: Miswel y'ãnzwel ã ndɛ ãdzwaan ye dalagɔ̃. Dalagɔ hɛ̃ y'ãnzwel mã ndɛ adzwaan ye bɔ. 8 Kɛn a dalagɔ̃ k'abvel mpɛn wɛ, obobɔ ndɛ ye nkel a ndɛ k'abekal ye mboo ke ywel wɛ. 9 Atsueel dalagɔ̃ wu ɔ̃nɛn me nsie. Ndɛ ondɛ ntaal wa tsɔɔn-tsɔɔn, wu ata m'ɔ̃pfu bvool me Satana, wu abepfuru baal b'ɔ̃kiri a nsie bueel. Atsueel ndɛ me nsie, atsueel ãnzwel ã ndɛ hɛ̃ ye ndɛ.

10 Mɛ̃ bu ngyoo nkii ngamɔ̃ yi kokɔ ke ywel yi ékeyɛɛn ndiri: «Meba ŋã, lio ekoo me ndɔɔ obvuul, waan, ompu o Nziã a bia-byɛ, ye waan e Mãsia a ndɛ. Ke ngwel wɛ, wu ákefɛn andoo a bia-byɛ ke nkwel a Nziã, atyel ndɛ onkwel-a-nzi, ndɛ wu ákefɛn bɔ tsia mwiĩ. 11 Kɛn a bɔ, bɔ abvel ndɛ mpɛn me ndɔɔ ãkel ã Muaan-emɛmɛɛ̃, bvool me ndɔɔ otsweel b'etsweel bɔ Endɔɔ e Nziã. Bɔ akiool k'awa omwiĩ o bɔ, k'abal epfu wɛ. 12 Obobɔ, ywel ye byɛ b'ekal ke lɔ, esia mpaa. Kɛn ãwua mam ola byɛ, nsie y'ãdza m'ɔ̃ngwa, ke ngwel wɛ ɔ̃pfu osool ola byɛ afuru fa me mpuru, me ndɔɔ yɛn ndɛ oyɛɛ wɛn esiil ndɛ lio etsi-tsiri!»

13 Ŋ'emwɛn dalagɔ̃ kwɛn atsueel ndɛ me nsie, ndɛ obiɔɔn ɔ̃kaal wu áburu muaan wu bɔɔl. 14 Obobɔ, awi ɔ̃kaal ãpab mbuaal m'ɔ̃lyel wu ɔ̃nɛn, kwɛn ndɛ apɔɔn abal onse ɔ̃baan wa kɛɛ-kɛɛ, ke mboo yi àliil ndɛ mvel tyel y'etswel lala ye ntaal. 15 M'ɔ̃nywã a ntaal, ndɛ oloo ãdza mɛn onge nzal ke mbee ɔ̃kaal, kwɛn yɔ ebiri ndɛ. 16 Kɛn a nsie ewueel ɔ̃kaal: Yɔ edzweel ɔ̃nywã, bu emɛn nzal yi éloo dalagɔ̃ m'ɔ̃nywã a ndɛ. 17 Onge bɛn dalagɔ̃ oyi mpuru y'ɔ̃kaal, ndɛ oyedzwaan ye yam li ɔ̃kaal, ye b'akiaal ãngel ã Nziã bvool b'akuru nzuru m'otaa-taa b'éyiool Yeso.

18 Ndɛ oyebva edzel hɛ̃ nku-a-nku ãdza m'ɔ̃ngwa.