1 Mɛ̃ bu mwɛn nyam ngɔmɔ̃ opal onse ãdza m'ɔ̃ngwa. Ndɛ áli y'ãnsiɛɛn kuun y'ɛ̃tswɛ nsiaan. Nkal ãnsiɛɛn ã ndɛ, éli y'ekɔrɔ bvi okwɛn kuun. Nkal ɛ̃tswɛ ɛ̃ ndɛ, ákel ãnkuũ m'ãsiaan Nziã. 2 Nyam wu émwɛn mɛ̃ áli k'emfa onge ngɔ, mviil ɛ̃ ndɛ ɛ̃́li onge nyam a mpuru wu ata me uuse, ɔ̃nywã a ndɛ onge wu ebob. Dalagɔ̃ owi ndɛ waan e ndɛ, ye kiri e ndɛ li okwɛn, y'okwɛn b'onɛn. 3 Onse ɛ̃tswɛ ɛ̃ ndɛ, ngɔmɔ̃ áli onge wu áli ye bwɔɔ lam li nɛn, kɛn aboo bwɔɔ li ékeebiri ndɛ k'epfu olɔ. Nsie yueel ekam, bu ebvi nyam oluɛɛn. 4 Baal ákebuɛɛn dalagɔ̃, me ndɔɔ yɛn ndɛ áwi nyam waan. Baal abvi hɛ̃ nyam ondɛ obuɛɛn, y'ãyɛɛn m'ɔ̃nywã ndiri: «Wu oli onge nyam nã, bvool wu okoo k'adzwaan yɛ ndɛ nã?»

5 Awi nyam ɔ̃nywã wu apaal ãyɛɛn m'ondɛɛl o nzuru y'osiaan o Nziã. Awi ndɛ waan li asa ãndɔɔ nswii ãku-ãnã ye yuaal (42). 6 Nyam odzweel ɔ̃nywã m'osiaan o Nziã, m'osiaan o nkuũ a ndɛ ye mboo yi ekal ndɛ, bvool m'osiaan o baal bueel b'akal ke ywel. 7 Awi ndɛ nkuul yi adzwaan ye ba ngel, bvool abvel bɔ mpɛn. Awi ndɛ waan nkal a yam lueel, nkal a baal bueel, nkal ɔ̃nywã wueel, bvool nkal ɔ̃kiri wueel. 8 Baal b'ɔ̃kiri wueel abvi ndɛ olweel. Baal obɔ bɛn fa k'ési Nziã ɔ̃kiri, ãnkuũ ã bɔ k'ákel onse ɔ̃nkaan wu elaã wa Muaan-emɛmɛɛ̃ wu ábam wɛ.

9 Okɛɛn mbuul oli y'ãtswi, yɔɔl kwɛn ndɛ ayoo! 10 Okɛɛn mbuul obvaan k'ayi bwal, ndɛ àyi bwal. Okɛɛn ebvaan abam mbuul m'epwel, àbam ndɛ m'epwel. Obɔ otsɛn bɛn ba ngel abvaan akal y'osɛ-mwiĩ y'okiool.

11 Mɛ̃ bu mwɛn nyam ɔ̃kyam opal onse nsie. Ndɛ áli y'ãnsiɛɛn mbuaal mɛn onge mã muaan-emɛmɛɛ̃, bvool ákeyɛɛn onge dalagɔ̃. 12 Ndɛ ákesuo waan li nyam wu ɛ̃kwel, ke nkwel a nyam ondɛ, bvool ákesa kwɛn nsie ye baal a yɔ abuɛɛn nyam wu ɛ̃kwel ondɛ, wɛn áboo ndɛ bwɔɔ li ékeebiri ndɛ k'epfu. 13 Nyam wa buaal ondɛ osi emvieel bvi enɛn, tiil k'asa kwɛn mbaa efa ywel esool me nsie, ke mviil ã baal. 14 M'emfa okyɛ, ndɛ abepfuru baal a nsie m'emvieel bvi áwi ndɛ nkuul yi asa ke nkwel a nyam wu ɛ̃kwel. Ndɛ atam baal a nsie k'asa etiɔ e nyam wu átɛn m'epwel, kɛn a ndɛ oli kɛn mwiĩ. 15 Awi nyam wa buaal waan li asa kwɛn etiɔ e nyam wu ɛ̃kwel ekal y'ɔ̃fiaal, kwɛn kyɛ ekoo k'eyɛɛn, bvool ekoo k'ebam bɛn k'adzii k'abuɛɛn ndɛ wɛ. 16 Nyam wa buaal ondɛ bvool osi kwɛn aywɛɛn baal bueel, ekal akiɔɔl y'akuul, ekal apfel y'aywal, ekal ankyal ye ba ndii, k'akal y'eliĩ e nyam me kuɔɔl ki elam wuo me mbwii. 17 M'emfa okyɛ, okɛɛn mbuul k'ali y'eliĩ okyɛ wɛ, ekal ki nkuũ a nyam, ekal ki ɔ̃bvɛn wu oli nsiil ye nkuũ a ndɛ, ndɛ k'akoo m'osuun wuo m'otiɔ b'eluɔ wɛ.

18 Yi mboo yɛn ebvaan akal y'ɔ̃nyiã. Yɔɔl kwɛn wa y'ãyal, asiɔɔl ɔ̃bvɛn a nyam. Ke ngwel wɛ, ɔ̃bvɛn ondɛ wa baal. Ndɛ oli ɛ̃nkam ɛ̃sɛɛn y'ãku-ãsɛɛn y'asɛɛn (666).