Onyiɔɔn o bwel li nsiaan
1 Ŋ’enyiɔɔn Muaan-emɛmɛɛ̃ bwel li nsiaan, ɔ̃lii obvi ke ywel wu osi ab’etswel e lio. 2 Mɛ̃ mwɛn ãnzwel nsiaan m’ãbetɛɛn ke nkwel a Nziã. Awi mɔ̃ amvel-a-mvel nsiaan. 3 Ãnzwel ngãmɔ̃ ãkyam ãyetɛɛn ke nkiin yi atsoo ɔ̃ywiri. Mɔ̃ ã́siin saan li ɔɔl li abetsoo ɔ̃ywiri. Awi ãnzwel omɔ̃ ɛ̃ywiri bibi, kwɛn mɔ̃ ãwa myɛ̃ kab y’ãbuɛɛn ã ba ngel nkal a nkiin ã kab yi ɔɔl, ke nkwel a kiri li okwɛn. 4 Yoo li ɔ̃ywiri eyɛn ywel ke nkwel a Nziã fa kuɔɔl ki ãnzwel. Ãbuɛɛn ã ba ngel ãyɛn ywel hɛ̃. 5 Ãnzwel ãwel saan li atsoo ɔ̃ywiri olɔ, bu ãluul lɔ m’ãkal ã mbaa m’ãli nkal a nkiin a ãkab. Mɔ̃ ãtyel lɔ me nsie. Anzyel asiaan, ayoo nkyal, amvel abɛɛn, bvool nsie enziool nzuru.
Obel b’amvel-a-mvel asɛɛn b’ɛ̃kwel
6 Obobɔ, ãnzwel ãnge-nsiaan m’ã́siin amvel-a-mvel ãwel ɔ̃yɛɛl, me ndɔɔ yi afel bɔ.
7 Ãnzwel m’ɛ̃kwel ãfel mvel-a-mvel. Mvel a ãkyal ye mbaa bvoo y’ãkel oyiool me nsie. Etswi e nsie ki etyel edzio mbaa esii kal, etswi ki etyel ki ɛ̃ti edzio mbaa esii kal, bvool bviĩ bvieel bvi ebee hɛ̃ edzio mbaa esii kal.
8 Ãnzwel mã mbuaal ãfel mvel-a-mvel. Eluɔ kyɛn onge nkio yi enɛn yi ekedzio mbaa eyeyiool onse ãdza m’ɔ̃ngwa. Etswi ki etyel ki ãdza m’ɔ̃ngwa ekɔɔl ãkel. 9 Boo li atyel li eluɔ bvi ési Nziã, bvi eli onse ãdza m’ɔ̃ngwa, bvi éli y’ɔ̃fiaal, ekwii, bvool epie ki etyel ki ãswa eyɛn-nkel.
10 Ãnzwel m’ãtyel ãfel mvel-a-mvel. Ngam-a-ngam wu ɔ̃nɛn ofi ywel obvi, ndɛ akekaan mbaa onge mbunda. Ndɛ obvi nkal etswi ki etyel ki ãnzal ye ki ɛ̃tswɛ mi amvieel. 11 Nkuũ a ngam-a-ngam ondɛ Abisinte8.11 Abisinte ŋ’ayɛɛn ndiri «nkaa».. Etswi ki etyel ki ãdza eyii ye nkaa. Baal bibi bu akwi me ndɔɔ a ãdza ã nkaa omɔ̃.
12 Ãnzwel m’ãnã ãfel mvel-a-mvel. Epie e tal ki etyel, ye ki nswii, ye ki angam-a-ngam ebii, m’emfa kyɛn epie e bvɛ bvi etyel ekɔɔl empeel. M’epie ki etyel ki mwiĩ, tal k’ebengal wɛ. M’epie ki etyel ki tsia hɛ̃, nswii k’abengal wɛ.
13 Mɛ̃ bvool ntal, bu ngyoo ɔ̃lyel ngɔmɔ̃ wu ákepɔɔn nkal ɔ̃ntɛ. Ndɛ ákeyɛɛn me nkii yi kokɔ ndiri: «Fool, fool, fool me baal a nsie, ŋ’èbel amvel-a-mvel ange-atyel b’efel ãnzwel ãnge-ãtyel m’ãsiil!»
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)