Engungwel 18

Obva o Babilɔn

1 Ke mbee oŋɔ̃, mɛ̃ mwɛn ãnzwel ngãmɔ̃ ãkyam ãfi ywel ãsool. Mɔ̃ áli ye waan li nɛn, bvool nsie yueel éyɔɔl me mbaa a lweel e mɔ̃. 2 Mɔ̃ ãbiool bubu: «Lɔ ebvi, lɔ ebvi, bviil li nɛn li Babilon! Lɔ eyii lɔɔ li ɛ̃fel mi ɛ̃bi-ɛ̃bi, mboo yi edziɔɔn ɔ̃fel wueel wa mbiin, mboo yi edziɔɔn anywɛn a mbiin bueel, mboo yi edziɔɔn anyam a mbiin bueel b’ebyal baal. 3 Ke ngwel wɛ, ɛ̃kiri mvieel ɛ̃nywĩ mbal ã mpuru a esio e lɔ. Akwɛn a nsie asi esio ye lɔ bvool baal b’ata obɔɔ̃ me nsie ayii y’opfel me nkuul opfel o lɔ b’onduru ɔ̃ndel.»

4 Ke mbee ɔŋɔ̃, mɛ̃ ngyoo nkii nkyam fa ywel, yɔ ékeyɛɛn ndiri: «Baal a mɛ̃, epal onse bviil olɔ, kwɛn byɛ ebee obvɔɔn y’ãbi ã lɔ, bvool kwɛn byɛ ebee fool li eywiri e lɔ omwɛn. 5 Ke ngwel wɛ, ãbi ã lɔ ãyii mam bibi ãnɔɔn tiil ywel. Nziã oyeel hɛ̃ ɛ̃sal ɛ̃ lɔ mi ɛ̃bi-ɛ̃bi. 6 Esa lɔ onge b’esi lɔ bakyɛ, bvool ebveel lɔ m’esi lɔ nsa yuaal. Onse mbiɔ yiyi yi etwɛɛl ndɛ bakyɛ mbal, etwɛɛl ndɛ m’ãnduru mpuru nsa yuaal. 7 Emfa ngemɔ̃ ki éli lɔ y’ondɛɛl o nzuru bvool ésuo opfel o lɔ, emfa kiki hɛ̃ etuaal lɔ mpal, bvool esuul lɔ ekal y’ãwua. Ke ngwel wɛ, bviil olɔ eyɛɛn ndiri: "Mɛ̃ bvi nsɛn onge ɔ̃kwɛn wu ɔ̃kaal, mɛ̃ ke ndi ɔ̃kaal wu opfiil wɛ, mɛ̃ kieel k’elaal mpiri bam wɛ." 8 Obobɔ, eywiri bvi áyɛɛl me ndɔɔ a lɔ ekieel eya nkal a lɔ kɛn a tsoo ngelemɔ̃. Eywiri obvɛ bvɛ bvi: Epfu, mpiri, y’ɔ̃lɔɔ. M’emfa okyɛ, akieel atyal lɔ onse mbaa. Ke ngwel wɛ, Mfam Nziã wu owi lɔ etumbu oli nga-mpɛn.»

9 Akwɛn a nsie b’ási esio ye lɔ bvool ásuo opfel ye lɔ, akieel alel bvool aluɔɔl me ndɔɔ a lɔ, ŋ’ekieel emwɛn bɔ yoo li ekieel esii lɔ kal. 10 Bɔ akieel atɛɛn lala ye lɔ, me buɔ b’ãmpal ã lɔ mã kokɔ. Bɔ akieel ayɛɛn bubu: «Li fool li bwɛn! Li fool li bwɛn! Babilon, bviil li nɛn, Babilon, bviil li mpɛn! Etumbu e yɛ eyi kɛn a me lio etsi-tsiri!»

11 Emfa kiki hɛ̃, baal b’ata obɔɔ̃ me nsie alel bvool alaal mpiri me ndɔɔ a bviil olɔ, ke ngwel wɛ mbuul si ngɔmɔ̃ k’abesuun eluɔ e bɔ bvi obɔɔ̃ wɛ. 12 Eluɔ obvɛ eli ɔɔl, aadzã, ãnkɔɔn m’ɔ̃bvɛn, ãlie m’ɔ̃bvɛn, ekɔ bvi ebvɛ-ebvɛ, ekɔ bvi ɔ̃bvɛn bvi bɛ, ekɔ bvi swa, y’eluɔ bvikyɛ bvi emfa bwɛn emfa bvi asi m’ɛ̃ti mi nswel yi mvɛ ye mi ɔ̃bvɛn, ye bvi asi m’ansiɛɛn m’anzɔɔ, ye bvieel li bolonze ye li fɛɛl, ye nkɔɔn yi ɔ̃bvɛn yi maabele. 13 Eluɔ bvi emfa bwɛn emfa bvi ewa bvi-odza ãkiin, miil, ɔ̃ywiri, ãnasi, bvine, mbaal, faline, bele, angwɛmbɛ, emɛmɛɛ̃, aswebval, aswaal, ebiĩ y’ɛ̃fel ɛ̃ baal. 14 Bɔ b’ata obɔɔ̃ obɔ akieel ayɛɛn ye Babilɔ̃ ndiri: «Nsia yi emeebie yi eli yɛ y’ɔ̃tio me yɔ esyel lala ye yɛ. Eluɔ obvɛ bvieel bvi ɔ̃bvɛn bvool bvi ebvɛ-ebvɛ, yɛ ywɛn a bvɛ, bvool k’àbebɔɔ bvɛ bvool bam wɛ.» 15 Baal b’ata obɔɔ̃ b’ayii y’opfel me ndɔɔ a lɔ akieel atɛɛn lala me buɔ o fool e ndɛ. Bɔ akieel alel bvool alaal mpiri, 16 y’ãyɛɛn m’ɔ̃nywã ndiri:

«Li fool li bwɛn! Li fool li bwɛn! Bviil li nɛn,

li elaal ekɔ e lɛ̃ bvi ebvɛ-ebvɛ, li elaal ekɔ bvi ɔ̃bvɛn bvi bɛ.

Lɔ éluul me ɔɔl, m’ãnkɔɔn m’ɔ̃bvɛn bvool m’ãlie m’ɔ̃bvɛn! 17 Kɛn a me lio etsi-tsiri, opfel bo boo-boo bubu oyɛn nkel!»

Adzoo b’ãsua bueel, b’ayi dzwɛ li ãsua, b’asal k’ãdza onse ãsua, ye b’ata obɔɔ̃ bo me nzal, atɛɛn lala ye lɔ. 18 Ŋ’ékemwɛn bɔ yoo li ekesii bviil olɔ kal, bɔ ákebiool bubu: «Wu áli onge bviil li nɛn nã?» 19 Bɔ áketyal ɔ̃fel nkal ɛ̃tswɛ, ákelel, ákelaal mpiri, bvool ákebiool ndiri:

«Li fool li bwɛn!

Li fool li bwɛn!

Bviil li nɛn li lɛn opfel o lɔ ósi kwɛn bueel b’áli y’ãsua k’ãdza m’ɔ̃ngwa ayii apfel, bu eyɛn nkel kɛn a me lio ngelemɔ̃!»

20 Yɛ wu ywel, sia mpaa me ndɔɔ a bviil olɔ! Byɛ ba ngel, y’antam y’aliaal-ɛ̃kiɛɛn a Nziã, esia mpaa hɛ̃! Ke ngwel wɛ, Nziã osi ndɔɔ yi dzu, ŋ’ewi ndɛ lɔ etumbu.

21 Ãnzwel ngãmɔ̃ mã ye waan ãwel nkɔɔn yɛn onge ãsin m’ãnɛn m’ãkyɛɛl nsia, bu atyel yɔ k’ãdza m’ɔ̃ngwa, y’ãyɛɛn m’ɔ̃nywã ndiri: «Bviil li nɛn li Babilon, okyɛ emfa ki akieel atyal lɔ ye kɔɔ-kɔɔ ke nsɛn, bvool kieel k’abemwɛn lɔ bam wɛ. 22 Ola yɛ, kieel k’abeyoo esingi ki abɛɛl b’ãnguɔ̃ bam wɛ, k’abeyoo b’asio mpaa bam wɛ, ekal b’afel ãnsiɛɛn, ekal b’afel amvel-a-mvel bam wɛ. Kieel k’abebɔɔ mbuul wu asa ɔ̃sal a mviɔɔl si ngɔmɔ̃ bam wɛ. Ola yɛ, k’abeyoo nkyal yi ãsin m’ãkyɛɛl nsia bam wɛ. 23 Mbaa a mbunda kieel k’ebengal ola yɛ bam wɛ, k’abeyoo nkii a ɔ̃baal wu bɔɔl ye wu ɔ̃kaal ola yɛ bam wɛ. Ke ngwel wɛ, baal a yɛ b’ata obɔɔ̃ áli amfam a nsie, yɛ ápfuru ɛ̃kiri mvieel m’ebel e yɛ.»

24 Ke bviil olɔ, amwɛn ãkel m’aliaal-ɛ̃kiɛɛn a Nziã, mã ba ngel, ye mã baal bueel b’ábam me nsie.