Apocalipse 21

Ywel li nyiɔɔn ye nsie yi nyiɔɔn

1 Ke mbee oŋɔ̃, mɛ̃ mwɛn ywel li nyiɔɔn ye nsie yi nyiɔɔn. Ywel li ɛ̃kwel ye nsie yi ɛ̃kwel édziɔɔn, bvool ãdza m'ɔ̃ngwa k'ãbekal wɛ. 2 Mɛ̃ bvool mwɛn Bviil li Ngel, Yelusalem wu ɔ̃nyiɔɔn ofi ywel ola Nziã, asool. Bviil olɔ éli onge ɔ̃kaal wu amaawal ɔ̃yɛɛl a bal, wu oti ompal me ndɔɔ yi ayemwɛɛn y'ɔ̃lam. 3 Mɛ̃ ngyoo nkii yi nɛn efi ke kiri li okwɛn, yɔ ékeyɛɛn bubu: «Meba mboo yi ekal Nziã eyii onse baal. Ndɛ akieel akal ye bɔ, bvool bɔ akieel akal baal a ndɛ. Nziã ndyam akieel akal ye bɔ, ndɛ akieel akal Nziã a bɔ. 4 Ndɛ akieel akiɔɔn ãnsia mbueel me mviil ã bɔ. Epfu kieel k'ebekal bvool wɛ, ndwɔɔ k'ebekal wɛ, onkyam olel, onkyam mpal, ke ngwel wɛ ãndɔɔ mã tsɔɔn ŋ'ãbwel.»

5 Obobɔ, wu ábvi nsɛn nkal a kiri li okwɛn olieel bubu: «Tal, mɛ̃ ŋensi ãndɔɔ mbueel m'ãnyiɔɔn.» Ndɛ bvool olieel ndiri: «Kel ãyɛɛn mã, ke ngwel wɛ mɔ̃ ãli mã taa-taa bvool ãbvaan m'okiool.»

6 Ndɛ olieel mɛ̃ bvool bubu: «Ŋ'asi ãndɔɔ mbueel! Wu oli Alafa y'Omega mɛ̃, obɛɛn y'osɛɛl. Wu oli ye nzuaal, mɛ̃ èwa ndɛ ãdza mã ngwel m'ãfa k'ɔ̃tswɛ a mvieel wu elaã. 7 Mbuul wueel wu akieel abvel mpɛn àbɔɔ ebvakab okyɛ ola mɛ̃. Mɛ̃ èkal Nziã ndɛ, ndɛ àkal muaan a mɛ̃. 8 Kɛn ɛ̃bu-buɔ, ye bɛn k'akuru nzuru me Nziã wɛ, ye b'asa ãndɔɔ m'ebyal Nziã, y'abam a baal, y'anga-esio, y'anga-ebel, ye b'abuɛɛn etiɔ, ye baal a mfya bueel, mboo yi bɔ kieel ekal yɛɛ e mbaa y'ɔ̃fel a sofolo. Olɔ epfu li yuaal.»

Yelusalem wu ɔ̃nyiɔɔn

9 Ke mbee oŋɔ̃, ngãmɔ̃ onse ãnzwel ãnge-nsiaan m'ã́kesiin asaan nsiaan m'ã́luul ntɔ m'eywiri enge-nsiaan bvi ntɔ, ãyeyɛɛn mɛ̃ bubu: «Ya, mɛ̃ èsuo yɛ ɔ̃kal wu ábaal, ɔ̃kal a Muaan-emɛmɛɛ̃.»

10 Ãnzwel omɔ̃ bu ãbiri mɛ̃ m'Ɔ̃fel nkal a nkio yi nɛn bvool yi nda. Mɔ̃ ãsuo mɛ̃ Yelusalem, Bviil li Ngel, wu ofi ywel ola Nziã asool. 11 Bviil olɔ eluul me lweel e Nziã. Lɔ ékengal onge nkɔɔn yi ɔ̃bvɛn, onge nkɔɔn yi ɔ̃bvɛn yi Dzasepe yi kɛɛn onge Kilisital. 12 Lɔ éli y'ebɔɔ ki y'ɔ̃biɔɔn bvool ki y'ɔ̃tɔɔl. Lɔ éli y'ɛ̃nywã kuun ye mviaal. Ɔ̃nywã bwɛn ɔ̃nywã áli y'ãnzwel ngãmɔ̃ m'ã́kekiaal kyɛ. Ákel ãnkuun nkal edzoo obvɛ, ãnkuun omɔ̃ m'ãyam kuun ye mbuaal m'Isalayel. 13 K'etswi ki epal tal, éli y'edzoo etyel, k'etswi ki nkio edzoo etyel, ke nsɛn edzoo etyel, k'etswi ki edziin tal edzoo etyel. 14 Átuu ebɔɔ e bviil olɔ nkal ãnkɔɔn kuun ye mbuaal. Nkal ãnkɔɔn omɔ̃, ákel ãnkuũ m'antam kuun ye buaal a Muaan-emɛmɛɛ̃.

15 Ãnzwel m'ã́keyɛɛn ye mɛ̃ áli y'ɔ̃mpaã wa ɔɔl, me ndɔɔ yi awal emvɛɛl e bviil, li edzoo ye li ebɔɔ e lɔ. 16 Etswi e bviil enge-enã éli nsiil m'ola y'okuun. Ãnzwel ãwel emvɛɛl e bviil m'ɔ̃mpaã. Lɔ epal akilometele amiil buaal y'ɛ̃kam mviaal (2.200) m'ola, m'okuun, bvool m'ɔ̃tyal. 17 Mɔ̃ ãmvɛɛl ɔ̃biɔɔn wu ebɔɔ. Ndɛ opal ametele ɛ̃kuun-nsiaan ye buaal (72). Ãnzwel ãwel emvɛɛl m'efa ki ebesa baal. 18 Ebɔɔ átuu m'ãnkɔɔn mã Dzasepe. Bviil éli me ɔɔl li tsɛtsɛ li kɛɛn onge bvɛɛl li kɛɛn. 19 Ãnkɔɔn m'átuu ebɔɔ e bviil nkal a mɔ̃, áfaal mɔ̃ m'ãnkɔɔn m'ɔ̃bvɛn m'emfa bwɛn emfa. Ãnkɔɔn m'ɛ̃kwel m'átuu ebɔɔ ã́li ãnkɔɔn m'ɔ̃bvɛn mã Dzasepe, mã mbuaal ã́li mã Safiil, m'ãtyel ã́li mã Kalesedwane, m'ãnã ã́li m'Emelode. 20 M'ãtaan ã́li mã Salidonikse, m'ãsɛɛn ã́li mã Saadwane, mã nsiaan ã́li Kilidzolite, mã mpuɔ ã́li mã Belile, mã bva ã́li mã Topadze, mã kuun ã́li mã Kilidzopaladze, mã kuun y'ɔ̃mɔ̃ ã́li mã Dzasɛnte, mã kuun ye mbuaal ã́li m'Emetisite. 21 Edzoo enge-kuun ye bviaal eli m'ãnkɔɔn m'ɔ̃bvɛn kuun ye buaal, edzoo bwɛn a edzoo, ási kyɛ me nkɔɔn y'ɔ̃bvɛn ngamɔ̃. Bal-bal a bviil wu ɔ̃nɛn, ási ndɛ me ɔɔl li tsɛtsɛ, onge bvɛɛl li kɛɛn.

22 Mɛ̃ ke mwɛn mboo a Nziã yi ɔ̃nsensal wɛ, ke ngwel wɛ mboo a lɔ yi ɔ̃nsensal eli Mfam Nziã wu Nziã-Nga-Waan, ye Muaan-emɛmɛɛ̃. 23 Bviil k'eli ye kɔɔ, ekal li tal, ekal li nswii wɛ, me ndɔɔ yi ayɛɛl lɔ, ke ngwel wɛ mbaa a lweel e Mfam Nziã eyɛɛl lɔ bvool mbunda a lɔ, Muaan-emɛmɛɛ̃. 24 Ɛ̃kiri ɛ̃kieel ɛ̃dzuu me mbaa a ndɛ, bvool akwɛn a nsie akieel ayewa lɔ opfel o bɔ. 25 Edzoo e bviil olɔ, k'akieel akuru bvɛ me mwiĩ bam wɛ, ke ngwel wɛ, okɔ, k'ekal ye tsia wɛ. 26 Akieel abiri lweel ye dzuun li ɛ̃kiri ke bviil olɔ. 27 Eluɔ ngemɔ̃ ki mbiin kieel k'esam bam onse lɔ wɛ, ekal b'asa ãndɔɔ m'opfuru wuo mã mfya. B'akieel asam onse lɔ, kɛn a bɛn ãnkuũ ã bɔ ákel onse ɔ̃nkaan wu elaã wa Muaan-emɛmɛɛ̃.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?