Engungwel 17

Bviil li nɛn li esio ye nyam wa bɛ

1 Ke mbee oŋɔ̃, ngãmɔ̃ onse ãnzwel nsiaan m’ã́kesiin asaan nsiaan ãyeyɛɛn ye mɛ̃. Mɔ̃ ayɛɛn ye mɛ̃ ndiri: «Ya, mɛ̃ èsuo yɛ etumbu e bviil li nɛn li esio. Bviil olɔ, li átuu nku-a-nku amvieel bibi. 2 Akwɛn a nsie asi esio ye lɔ, bvool baal a nsie mbal m’esio ã lɔ ãbɔɔ.»

3 Ãnzwel ãbiri mɛ̃ m’Ɔ̃fel onse ɔ̃baan wa kɛɛ-kɛɛ. Mɛ̃ bu mwɛn ɔ̃kaal ngɔmɔ̃ me nsɛn nkal a nyam wa bɛ. Nkal a nzuru a nyam ondɛ yueel, ápwɛɛ ãnkuũ m’ãsiaan Nziã. Ndɛ áli y’ɛ̃tswɛ nsiaan y’ãnsiɛɛn kuun. 4 Ɔ̃kaal ondɛ álaal ekɔ ki ɔ̃bvɛn ki bɛ. Ndɛ álaal hɛ̃ ɛ̃luu mi ɔɔl, ãnkɔɔn m’ɔ̃bvɛn y’ãlie m’ɔ̃bvɛn. Onse kuɔɔl e ndɛ, ndɛ ásiin saan li ɔɔl. Saan olɔ éluul m’ãndɔɔ mɛn Nziã k’adzii wɛ, ye mbiin yi esio e ndɛ. 5 Nkal a mbwii a ndɛ, áswɛn nkuũ ngamɔ̃ yɛn otsɛn oli m’edziɔɔn. Nkuun oyɔ yɔ bu: «Bviil li nɛn li Babilon, ngoo a anga-esio ye wu ãndɔɔ mɛn Nziã k’adzii wɛ mã nsie.» 6 Mɛ̃ mwɛn ɔ̃kaal ondɛ amaanywa ãkel m’ãmaabɔɔ ndɛ onge mbal. Ãkel omɔ̃ ãli ãkel ã baal ba ngel ye m’atsweel a Yeso. Ŋe mwɛn mɛ̃ ndɛ, esi mɛ̃ ɛ̃kam myam bibi. 7 Ãnzwel ãlieel mɛ̃ bubu: «Ki ekam yɛ emã? Mɛ̃ ndyam èwa yɛ otsɛn bo m’edziɔɔn b’ɔ̃kaal ye nyam wu obiri ndɛ, nyam wu oli y’ɛ̃tswɛ nsiaan y’ãnsiɛɛn kuun. 8 Nyam wu emwɛn yɛ áli tsɔɔn mwiĩ, kɛn a meba, ndɛ k’abekal wɛ. Ndɛ àpal onse ywɛn li ela li ke nsɛn a nsie, bvool àyi nkel. Baal a nsie bɛn ãnkuũ k’áswɛn onse ɔ̃nkaan wu elaã fa ŋ’ési Nziã ɔ̃kiri wɛ, akieel akam ŋ’ekieel emwɛn bɔ nyam. Ke ngwel wɛ, ndɛ tsɔɔn áli mwiĩ, meba ndɛ k’abekal wɛ. Kɛn a ndɛ akieel apal bvool.

9 Yi mboo yɛn ebvaan akal y’ãyal y’ɔ̃nyiã. Ɛ̃tswɛ nsiaan ɛ̃li ãnkio nsiaan m’eli ɔ̃kaal me nsɛn nkal a mɔ̃. Eli hɛ̃ akwɛn nsiaan. 10 Akwɛn ataan abvi, wu asɛɛn kɛn oli m’ompu, wa nsiaan kɛn ayi wɛ. Ŋ’ekieel eya ndɛ, ndɛ àkal m’ompu lio etsi-etsiri. 11 Me b’otal nyam wɛn tsɔɔn áli mwiĩ, bvool wɛn k’abekal wɛ, ndyam oli ɔ̃kwɛn wa mpuɔ̃. Ndɛ oli hɛ̃ ngɔmɔ̃ onse anyam nsiaan, ndɛ àyi nkel.

12 Ãnsiɛɛn kuun m’emwɛn yɛ ãli akwɛn kuun, bɛn kɛn abɔɔ mpu wɛ. Kɛn a bɔ àbɔɔ okwɛn b’akal m’ompu ye nyam lio etsi-tsiri. 13 Akwɛn obɔ ange-kuun ali y’ãtsam ngãmɔ̃. Ãtsam omɔ̃ m’ewa bɔ nyam waan ye mpu a bɔ. 14 Bɔ akieel adzɔɔ Muaan-emɛmɛɛ̃ eta, kɛn a Muaan-emɛmɛɛ̃ akieel abvel bɔ mpɛn, ke ngwel wɛ ndɛ oli Mfam wu onduru amfam bueel, bvool oli Ɔ̃kwɛn wu onduru akwɛn bueel. Ndɛ akieel abvel bɔ mpɛn, ndɛ ye b’éti Nziã mbel, b’ésueel ndɛ, b’ákuru nzuru me ndɛ.»

15 Ãnzwel bvool ãlieel mɛ̃ bubu: «Ãdza m’emwɛn yɛ, m’eli nga-esio me nsɛn nkal a mɔ̃, eli ãsel ã baal, embuul e baal, ɛ̃kiri y’ɛ̃nywã. 16 Me b’otal ãnsiɛɛn kuun m’emwɛn yɛ, ye nyam, eluɔ obvɛ ekieel ebyal nga-esio, embaal ndɛ bvieel bvi eli a ndɛ, bvool esiil ndɛ odzuũ-odzuũ. Bvɛ ekieel edza tuo e ndɛ, bvool ekieel etsoo bvi esiil bvieel mbaa. 17 Ke ngwel wɛ, Nziã olɔ onse ɛ̃kwal ɛ̃ bvɛ ãtsam m’asa m’éwɛɛ ndɛ, m’akal m’ɔ̃dzi me ndɔɔ yi awa nyam waan e bvɛ, tiil k’asa m’éyɛɛn Nziã.

18 Ɔ̃kaal wu emwɛn yɛ, eli bviil li nɛn li eli y’okwɛn nkal akwɛn a nsie.»