Apocalipse 14

Muaan-emɛmɛɛ̃ ye b'ébvuul ndɛ

1 Ke mbee oŋɔ̃, mɛ̃ mwɛn Muaan-emɛmɛɛ̃ otɛɛn nkal a nkio yi Siɔ̃. Ndɛ áli ye baal amiil ɔ̃nkam ngɔmɔ̃ y'ãku-ãnã y'anã (144.000), bɛn ákel bɔ nkuũ a ndɛ ye yi Tal nkal ãbwii ã bɔ. 2 Mɛ̃ ngyoo nkii efi ywel onge nkyal yi etsio ãdza mã bibi, onge nkyal yi osiaan o nzyel bo kokɔ. Esingi ki ngyoo mɛ̃ éli onge ki ãnguɔ̃ ŋ'ekwel baal a sio mɔ̃. 3 Baal obɔ ayam nziĩ yi enyiɔɔn ke nkwel a kiri li okwɛn, ke nkwel eluɔ bvi mwiĩ enge-enã bvool ke nkwel akuul-kuul. Mbuul si ngɔmɔ̃ k'ákoo k'ayio nziĩ oyɔ wɛ, b'áyio yɔ kɛn a baal amiil ɔ̃nkam ngɔmɔ̃ y'ãku-ãnã y'ãnã (144.000) b'ábvuul me nsie.

4 Bɔ obɔ bɛn k'abiil nzuru a bɔ m'akaal wɛ, bɔ ali onge ãnsam m'akaal mɛn kɛn ayɛɛ abɔɔl wɛ. Bɔ abeluɛɛn a Muaan-emɛmɛɛ̃ ãmboo mbueel m'eyi ndɛ. Ábvuul bɔ onse baal, me ndɔɔ yi awa bɔ ola Nziã bvool ola Muaan-emɛmɛɛ̃ onge kab li ɛ̃kwel. 5 Bvool onse ɛ̃nywã ɛ̃ bɔ, mfya pyɛ, bɔ hɛ̃ elyal pyɛ.

Ãnzwel ãtyel

6 Mɛ̃ bvool mwɛn ãnzwel ngãmɔ̃ ãkyam nkal m'ã́kekɛɛn ãntɛ ke ywel. Mɔ̃ áli ye Nsia yi Ngesɛ yi ɔ̃bu nkal ɔ̃bu yi atsal ola baal a nsie, ol'ɛ̃kiri mvieel, ol'ãyam mbueel, ol'ɛ̃nywã mvieel, bvool ol'ãsel mbueel. 7 Mɔ̃ ãkeyɛɛn kokɔ ndiri: «Ebal Nziã, bvool elweel ndɛ, ke ngwel wɛ lio li etsiil ndɛ ãndɔɔ emeekoo. Ebuɛɛn ndɛ wu ási ywel, ye nsie, y'ãdza m'ɔ̃ngwa, y'ɛ̃tswɛ mi amvieel!»

8 Ãnzwel ãkyam ãyi, omɔ̃ mã mbuaal. Mɔ̃ ã́keyɛɛn bubu: «Lɔ ebvi, lɔ ebvi, Bviil li enɛn li Babilon. Lɔ li énzwiil ɛ̃kiri mvieel bvine li mpuru a esio e ndɛ!»

9 Ãnzwel ãkyam ãyi, omɔ̃ m'ãtyel. Mɔ̃ ãnɔɔn m'ãnge-mbuaal m'ɛ̃kwel omɔ̃. Mɔ̃ ã́keyɛɛn kokɔ bubu: «Okɛɛn mbuul obuɛɛn nyam y'etiɔ e ndɛ, bvool obɔɔ eliĩ me mbwii wuo me kuɔɔl, 10 ndɛ hɛ̃ ànywã mbal ã bvine mã mpuru a Nziã. Mbal omɔ̃ ã̀kal m'ãywɛn a ɔ̃mfee. Àkaal ndɛ mɔ̃ onse mbiɔ a mpuru a Nziã. Mbuul ondɛ akieel amwɛn fool onse mbaa y'ɔ̃fel wa sofolo, ke nkwel ãnzwel mã ngel, bvool ke nkwel a Muaan-emɛmɛɛ̃. 11 Yoo e mbaa yi etuaal bɔ mpal eyi ywel kɛn oyi. Baal b'abuɛɛn nyam y'etiɔ e ndɛ, b'abɔɔ eliĩ e nkuũ a ndɛ, k'awuun wɛ, ekal me tsia, ekal me mwiĩ.»

12 Li lio lɛn ba ngel, b'asa ãndɔɔ m'etam Ngel a Nziã osa, bvool ali y'okiool me Yeso, abvaan akal y'osɛ-mwiĩ.

13 Mɛ̃ ngyoo nkii efi ywel, elieel mɛ̃ bubu: «Swɛn bubu: "Esɛ ngamfɛn ola bɔ meba, bɔ b'akwa onse bvoo ye Mfam. Ngwanywã, Ɔ̃fel wu Ɔ̃nsensal olieel ndiri: Yɔɔl kwɛn bɔ awuun m'ɛ̃sal ɛ̃ bɔ, ke ngwel wɛ ɛ̃sal ɛ̃ bɔ ɛ̃luɛɛn a bɔ."»

Oka o nsia e nsie

14 Mɛ̃ mwɛn epɛn ki fuu, nkal a kyɛ, éli ye mbuul me nsɛn, wɛn k'emfa onge Muaan a mbuul. Ndɛ álaal nkal yi ɔɔl nkal ɔ̃tswɛ, ásiin mbieel yi ɔ̃yiin-a-ɔ̃yiin yi ápɛɛl me kuɔɔl. 15 Ãnzwel ãkyam ãpal onse mboo a Nziã yi ɔ̃nsensal, ãbiool m'ã́bvi nsɛn nkal epɛn ndiri: «Naan mbieel a yɛ yi ɔ̃yiin-a-yiin, bvool ka nsia! Ke ngwel wɛ, lio emeekoo li aka nsia, nsia e nsie emeebie.» 16 Wu áli me nsɛn nkal epɛn onaan mbieel a ndɛ yi ɔ̃yiin-a-yiin me nsie, bu aki nsia e yɔ.

17 Ãnzwel ãkyam ãpal onse mboo a Nziã yi ɔ̃nsensal yike ywel. Mɔ̃ hɛ̃ ã́siin mbieel yi ɔ̃yiin-a-yiin yi ápɛɛl.

18 Ãnzwel ãkyam, m'ã́li ye waan nkal a mbaa ãpal ke nkiin yi awa Nziã ãkab, bvool ãbiool m'ã́li ye mbieel yi ɔ̃yiin-a-yiin yi ápɛɛl ndiri: «Naan mbieel a yɛ yi ɔ̃yiin-ayiin yi ápɛɛl, bvool ka ensɔɔ̃ e bvine li eli me nsie, ke ngwel wɛ nsia e lɔ emeebie.» 19 Ãnzwel bu ãtyel mbieel a mɔ̃ yi ɔ̃yiin-ayiin me nsie. Mɔ̃ ãki bvine li nsie, bvool ãtyel lɔ onse saan li nɛn li abekyɛɛl nsia onse lɔ li mpuru a Nziã. 20 Anyiĩ nsia e bvine onse saan li nɛn lɔ. Saan olɔ k'éli onse bviil wɛ. Ãkel ãpal onse saan olɔ. Mɔ̃ ãtsɔɔn m'akilometele ɛ̃nkam ɛ̃tyel (300), bu ãluul tiil k'ɛ̃mpaã mi alɔ onse ɛ̃nywã mi aswebval.

Bíblia Online

Veja também

Oração para pedir a Deus que aumente a fé quando o coração está cheio de dúvida

Como o amor de Deus cura as dores de relações passadas?