1 Ke mbee oŋɔ̃, mɛ̃ mwɛn edzoo ngemɔ̃ kal ke ywel. Nkii yi éyoo mɛ̃ tsɔɔn onge nkii a mvel-a-mvel elieel mɛ̃ bubu: «Nɔɔn kwɛn, mɛ̃ èsuo yɛ m'ã̀ya ke nkwel.» 2 Alili oŋɔ̃, Ɔ̃fel osiin mɛ̃. Mɛ̃ bu mwɛn kiri li okwɛn ngelemɔ̃ éli ke ywel. Mbuul ngɔmɔ̃ áli me nsɛn nkal a lɔ. 3 Mbuul wu áli me nsɛn ákengal onge nkɔɔn yi ɔ̃bvɛn yi ata me Dzasepe ye yi ata me Saadwane. Ɔ̃nkaan-wu-abal wu ákengal onge nkɔɔn yi ɔ̃bvɛn yi ata m'Emelode ádzii kiri olɔ. 4 Ãkiri m'okwɛn ãku-mbuaal y'ãnã (24) ã́dzii kiri li okwɛn olɔ. Nkal ãkiri omɔ̃, ekukwel ãku-mbuaal y'enã (24) éli me nsɛn. Bvɛ élaal ekɔ bvi afuu-fuu. Nkal ɛ̃tswɛ ɛ̃ bvɛ, bvɛ élaal ekɔrɔ bvi ɔɔl. 5 Ɛ̃bɛɛn ɛ̃ mvel, ye nkyal, y'osiaan b'anzyel ékepal onse kiri li okwɛn olɔ. Ke nkwel a kiri li okwɛn olɔ, éli y'ambunda nsiaan b'akaan kokɔ. Ambunda obɔ, eli ɛ̃fel nsiaan ɛ̃ Nziã. 6 Ke nkwel a kiri li okwɛn olɔ, éli y'eluɔ kyɛn onge ãdza m'ɔ̃ngwa mã tsɛɛn onge bvɛɛl li kal-a-kal lɛn onge nkɔɔn yi ɔ̃bvɛn yi ata me Kilisital. Onse mwiĩ a kiri li okwɛn bvool ngwel-a-ngwel a lɔ, éli y'eluɔ bvi mwiĩ enã bvi eluul me mviil nkwel ye mbee. 7 Eluɔ ki mwiĩ ki ɛ̃kwel éli k'emfa onge ebob, ki bviaal k'emfa onge muaan-gwɛmbɛ, ki etyel éli y'osu k'emfa onge mbuul, eluɔ ki enã eli onge ɔ̃lyel wu apɔɔn. 8 Eluɔ enge-enã bvi mwiĩ éli ngemɔ̃-ngemɔ̃ m'ãpab ãsɛɛn. Bvɛ éluul me mviil ngwel-a-ngwel bvool onse mwiĩ. Tsia mwiĩ, bvɛ ékeyɛɛn kɛn oyɛɛn ndiri:

«Ɔ̃nsensal, Ɔ̃nsensal, Ɔ̃nsensal,

eli Mfam Nziã, Nziã-Nga-Waan,

wu áli, wu oli, bvool wu aya!»

9 Bvɛ ékeyam me ndɔɔ a lweel e wu áli me nsɛn nkal a kiri li okwɛn, wu oli mwiĩ ɔ̃bu. Bvɛ ékelweel ndɛ, ékewa ndɛ dzuun bvool ékebveel ndɛ ãtuɛɛn. 10 Me lio alili, ekukwel enge-ãku-mbuaal y'enã (24) ékebva ãbuo ke nkwel a wu áli me nsɛn nkal a kiri li okwɛn, alweel ndɛ wu oli mwiĩ ãlio mbueel, atyal ekɔrɔ e bɔ ke nkwel a kiri li okwɛn, ndiri:

11 «Mfam Nziã a bee, yɛ bvaan kwɛn awa yɛ lweel ye dzuun, ye waan!

Ke ngwel wɛ, yɛ wu ási bvieel,

yɛ ádzii kwɛn bvɛ ekal, bvool ási bvɛ.»