1 एय सामरी राज ने मालदार बायकु*, एय सामरी बोयड़ान बायकु! ज्य वचन होमलो; तुमू गेरब्याह अत्याचार, एने गेरब्याह चेंदत्युह, तुमू तुमरा एदम्याह उकुम आपत्युह, न्या लाव, काहाकाय आपु पिहु! 2 बोगवान तान चोखापोणान सुगोण खाएन किथे, "तुमरा ओहला दिह आवती, काय तुमूह काटा केरीन एने तुमरा सोराह, मासान गेली माय एटकाड़ीन ली जाती। 3 तुमरे माय रेन एकेक फाटेल बितड़ा माय रेन हुतरा निकील जाहो, एने हर्मोन बोयड़ा पोर टाकाहो, इह केरीन बोगवान किथे।"

4 बेतेल माय जाएन गुनो किरो, एने गीलगाल माय आवीन जुलूम गुना किरो; तुमू दाड़ीन वेगाच तुमरी बेटीह, एने तुमरा दोहवा ईसाह देर तीसरे दिह लाया किरो। 5 दन्यवाद ने बेट खमीर बेचकीन चेड़ावो, एने सोतान मोर्जीन बेट ने बाराम आखाह किवो; काहाकाय एय इस्राएल देस, तुवाह ज्योस ते पुटेह। इह केरीन बोगवान किथे।

6 "मी तुमरा गावाम काल मोकल्यो; एने तुमरा आखा जागाम खाणान कोमी किऱ्यो, तीबी तुमू मार उगे वोलीन नाह आवा," इह केरीन बोगवान किथे। 7 जेवी मेर काटणेन तीन मोयना बाकी एता, तेवी मी तुमरी केरता पाणी नाह पाड्यो; मी एक गावा माय पाणी पाड्यो, पुण दिहरा गावाह हुकाड़ दिनो, एक खेताम पाणी पोड़नो, एने दिहरो खेत जा माय पाणी नाह पोड़नो, तो हुक गीयो। 8 केरीन माणहे बोटेकतेन पाण्यान होदवाल्या एक जागे रेन दिहरे जागे फिरना, पुण ताह पिणेन केरता जुवे तोलोक पाणी नाह जुड़नो, तीबी तुमू मार उगे नाह वोलना, इह केरीन बोगवान किथे।

9 "मी तुमरा खेताह जाव एने किड़ा केरीन नुकसान किऱ्यो, एने जेवी तुमरा बोगीचा एने अंगुरान मोला, अंजीर एने जेतुनान जाड़े जुलूम एय गीया, तेवी टिड्या ताह खाय गीया; तीबी तुमू मार उगे वोलना नाह।" इह केरीन बोगवान किथे।

10 "मी जीह केरीन मिस्र देसाम मोटली पिड़ा मुकलेल इतो, तीहीच केरीन तुमरी पोर बी मुकल्यो; मी तुमरा गोड़ाह लुटाड़ीन तुमरा जुवान्याह तालवार केरीन माराव दिनो, मी तुमरा पाड़ावान देड़ान खाराब गेंदी केरीन तुमरा नाकाह बोर दिनो, तीबी तुमू मार उगे नाह वोलना।" इह केरीन बोगवान किथे।

11 ✝"जीह केरीन मी सदोम एने अमोरा गावाह नास किऱ्यो, तिहेच केरीन तुमरा थोड़ाक गावाह नास किऱ्यो। आक्ठाम रेन चालोच काड़ेल बोलन्या लाकड़ान गेत तुमरी स्थिती एती, तीबी तुमू मार उगे नाह वोलना।" इह केरीन बोगवान किथे। 12 "केरीन एय इस्राएल, मी तार हिऱ्यो इहीच केरीन केरूह, काहाकाय मी तार हिऱ्यो ज्य काम केरन्यो हे, केरीन एय इस्राएल तारा बोगवानान सामने आवणेन केरता तियार एय जा!"

13 दिखो, बोयड़ाह बाणावणार

एने वाराह बाणावणार,

एने माणहान तान मोनान विचार केणार,

जो उजालो एने आंदाराह बाणावीह,

एने जो देरतीन उचाले जागे चालेह,

तास ने नाव ताकेतवोर बोगवान हे।