1 ଏଚେକାଡ଼୍‌ଦ ସାସନ୍ କାରିୟା ଲାହାଂ ଚିଞ୍ଜେଙ୍ଗ୍ କୁଚ୍‌ଚିସ୍, ହେପାଦ୍‌ନା ମି ମୁମ୍‌ଦ ଇନେର୍ ମାନାର୍, ହେଦାଂ ଜାତୁନ୍‌ତାଂ ବାବିକିୟାଟ୍ । 2 ଏଚେକାଡ଼୍‌ଦ ଏପେଙ୍ଗ୍ କାୱ୍‌ରା ଆନାଦେର୍‌, ଏପେଙ୍ଗ୍ ଜାର୍ ଗାଡେଲ୍‌ତ ଚାକୁ ନିଜେ ଇଟ୍‌ନାଦେର୍‌ । 3 ତାଦି ହାର୍‌ହୱାଦ୍ କାଦିତିଂ ଲବ୍ କିମାଟ୍; ଇନେକିଦେଂକି ହେଦାଂ ବୁଲ୍‌କାୟ୍‌ କିନି କାଦି । 4 ମାଜାନ୍ ଆନି କାଜିଂ ଜାର୍‌ତିଂ ୱାଡ଼଼ାକ୍ ଆମାଟ୍; ଏପେଙ୍ଗ୍ ନିଜ୍ ବୁଦିତାଂ ତାଂନାକା ବନ୍ଦ୍‌ ଆଡ । 5 ଇନାକା ହିଲୁତ୍, ହେଦାଂ ହୁଡ଼୍‌ନି କାଜିଂ ମି କାଣ୍‌କୁତାଂ ଦସ୍‌ କିନାୟ୍‌ କି ଏଚେକାଡ଼୍‌ଦ ଏପେଙ୍ଗ୍ ତା କାଜିଂ ହୁଡ଼୍‌ନାଦେର୍‌ ହେଦାଂ ଡ଼ୁଗ୍‌ନାତ୍‌? ଇନେକିଦେଂକି ହେଦାଂ ରାମାଣ୍‌ ପଟି ଲାକେ ତା ମାରା ହପ୍‌ଚି ଆକାସ୍‌ତ ଉମ୍‌ନାତ୍‌। 6 ବାନ୍ୟା ହୁଡ଼୍‌ନି ମାନାୟ୍‌ତି କାଦି ତିନ୍‌ମାଟ୍, ଆରେ, ତାଦି ହାର୍‌ହୱାଦ୍ କାଦିତିଂ ଲବ୍ କିମାଟ୍; 7 ଇନେକିଦେଂକି ହେୱାନ୍ ଇନେସ୍‌ବାନି ମାନ୍ତ ନିଜେ ବାବିକିନାନ୍, ହେୱାନ୍ ହେ ଲାକେ ଆନାନ୍; ହେୱାନ୍ ତିନାଟ୍ ଉଣାଟ୍ ଇଞ୍ଜି ମିଙ୍ଗେଙ୍ଗ୍ ଇଞ୍ଜ୍‌ନାନ୍ ସତ୍, ମତର୍ ମିତାକେ ତା ମାନ୍ ଆକାୟ୍ । 8 ଏପେଙ୍ଗ୍ ଇମ୍‌ଣି ଅଲପ୍ ଚିଚାଦେର୍ଣ୍ଣା, ହେଦାଂ କାକ୍‌ନାଦେର୍; ଆରେ, ମିଦାଂ ହୱାଦ୍ ବଚନ୍ ପାୟା ଆଉଦେର୍ । 9 ମୁର୍କିୟା କିତୁଲ୍‌ତ କାତା ଇନ୍‌ମାଟ୍, ଇନେକିଦେଂକି ହେୱାନ୍ ମି ବଚନ୍‌ନି ଗିଆନ୍‌ ବାବ୍‌ନାତିଂ ବେକାର୍ କିନାନ୍‌ । 10 ପ୍ଡାନି ହାନ୍ଦି ଗୁଚାୟ୍ କିମାଟ୍, ଆରେ, ଟୁରା ବାଡ଼୍‌ଦ ହଣ୍‌ମାଟ୍‌ । 11 ଇନେକିଦେଂକି ହେୱାର୍‌ତି ମୁକ୍ତିକାରିୟା ବାପୁକାଟାକାନ୍‌; ହେୱାନ୍ ମି ଲାହାଂ ହେୱାର୍‌ତି ଗଣ୍ଡ୍‌ଗଲ୍‌ନି ଲାଗା ଆଦ୍‌ନାର୍ । 12 ହାର୍ଦି ହିକ୍ୟାତ ମି ମାନ୍ ଆରି ଗିୟାନ୍‌ନି ବଚନ୍‌ତ ମି କିତୁଲ୍‌ ୱେନାଟ୍ । 13 କାଡ଼୍‌ଦେଂ ସାସ୍ତି ହିଦେଂ ଏଲା ଆମାଟ୍; ଏପେଙ୍ଗ୍ ତାଙ୍ଗେଙ୍ଗ୍ ବେଡ୍‌ଗାତାଂ ଇଡ଼୍‌ତିସ୍ ନେ ହେୱାନ୍ ହାଉନ୍ । 14 ଏପେଙ୍ଗ୍ ତାଙ୍ଗେଙ୍ଗ୍ ବେଡ୍‌ଗାତାଂ ଇଡ଼୍‌ନାଦେର୍ ଆରି ପାତାଲ୍‌ତାଂ ତା ପାରାଣ୍ ରାକ୍ୟା କିନାତ୍‌ । 15 ଏ ନା ମାଜ଼଼ି, ମି ୱାସ୍କି ଗିଆନ୍ ଆତିସ୍, ନା ବେସି ନା ୱାସ୍କି ୱାରିୟା ଆନାତ୍ । 16 ଆଁ, ମି ୱେଇ ହାତ୍‌ପା ନ୍ୟାୟ୍‌ ଇଚିସ୍, ନା ୱାସ୍କି ୱାରି ଆନାତ୍ । 17 ନି ମାନ୍ ପାପିରିଂ ଡାରା କିମାଟ୍, ଆରେ, ଏପେଙ୍ଗ୍ ସବୁ ନାଜିଂ ନିତ୍ରେମାପ୍ରୁତି କାଜିଂ ପାଣ୍ଡ୍ରୁତାଂ ମାନାଟ୍ । 18 ଇନେକିଦେଂକି ଇନାମ୍ ନିତ୍ରେ ମାନାତ୍ ଆରି ମି ବାର୍ସି ବାଙ୍ଗା ଆଉତ୍ । 19 ଏ ନା ମାଜ଼଼ି, ୱେନା, ଗିଆନି ଆଡ, ଆରେ, ନି ମାନ୍‌ତିଂ ସତ୍‌ହାଜ଼଼ିତ କାଡାୟ୍‌ କିୟା । 20 ଅଙ୍ଗୁର୍‌ରାସ୍ ଆହା ଆରି ପଟବାର୍ତି ଜେଇ ତିନାକାର୍ ଲାହାଂ ମେହା ଆମାଟ୍ । 21 ଇନେକିଦେଂକି ମାତ୍‌ଲି ଆରି କାୱ୍‌ରା କାକୁଲ୍‌ତି ଆନାନ୍ ଆରେ, ଡୁଗ୍‌ନି, ମାନାୟ୍‌ତିଂ କେନ୍‌ଚିଚିଡା ଉସ୍ପିକିନାନ୍‌ । 22 ଏପେଙ୍ଗ୍ ଜଲମ୍‌କିତ୍‌ତି ଆବା କାତା ୱେନାଟ୍‌, ଆରେ, ଆୟା ହାତାନ୍ ଆତିସ୍, ହେୱାରିଂ ଗିଣ୍‌ କିମାଟ୍‌ । 23 ହାତ୍‌ପା କଡ଼ା, ଆରେ, ହେଦାଂ ପ୍ରମାଟ୍‌; ଗିୟାନ୍‌ ହାର୍‌ଦି ହିକ୍ୟା ଆରି ହାର୍‌ବାବ୍‌ନା କଡ଼ାଟ୍‌ । 24 ଦାର୍ମିତି ଆବା ବେସି ୱାରିୟା ଆନାନ୍, ଆରେ, ଗିଆନି ମାଜ଼଼ିନି ଜଲମ୍‌କିତାକାନ୍‌ ହେଦାଂ କାଜିଂ ୱାରିୟା ଆନାନ୍‌ । 25 ମି ଆବା ଆରି ମିଞ୍ଜି ଆୟା ୱାରିୟା ଆଏର୍‌, ମି ଜଲମ୍‌କିତ୍‌ତାକା ୱାରି କିଏତ୍‌ । 26 ଏ ନା ମାଜ଼଼ି, ନି ମାନ୍‌ ନାଙ୍ଗ୍‌ ହିଦା, ଆରେ, ନି କାଣ୍‌କୁ ନା ହାଜ଼଼ିତ ହାଲ୍‌ଜି ୱାରି ଆଏତ୍‌ । 27 ଇନେକିଦେଂକି ଦାରି ଡେଙ୍ଗା କ୍ଡଇ, ଆରେ, ଲକାର୍ ଡକ୍ରି ହାରୁ କୁଇ ଆନାତ୍ । 28 ଆରେ ହେୱାନ୍ ଡାକୁ ଲାକେ ଡ଼ୁଗ୍‌ଜି ମାନାତ୍‌, ଆରେ, ମାନାୟ୍‌ ବିତ୍ରେ ବିସାସ୍ତ ବିସ୍‌ହିନାକାନ୍‌ ଲମର୍ ବାଡାୟ୍‌କିନାତ୍ । 29 ଇନେର୍‌ତି ଦୁକ୍‌ ? ଇନେର୍‌ତି ସୁକ୍‌ହିଲ୍‌କା ? ଇନେର୍ ଗଣ୍ଡ୍‌ଗଲ୍ ଇନେର୍‌ତି ଦାବା ? ଇନେର୍‌ତି ଅକାରଣ୍ ଚିନ୍‌ବିନ୍‌ ? ଇନେର୍‌ତି ନେତେର୍‌ବାନି କାଣ୍‌କୁ ? 30 ଇମ୍‌ଣାକାର୍‌ ଅଙ୍ଗୁର୍‌ରାସ୍ ଉଣିତ ବେସି କାଡ଼୍‌ କୁଚ୍‌ଚିମାନାର୍, ଇମ୍‌ଣାକାର୍‌ ମେହାତି କାଲିଂ ଡେକ୍‌ଚି ବୁଲାନାର୍, 31 ହେୱାର୍‌ତି ଅଙ୍ଗୁର୍‌ରାସ୍ ଗେରୁ ଆତିସ୍, ଗିଲାସ୍‌ତ ଚକ୍‌ମକ୍‌ଆତିସ୍‌ ଗାଡେଲ୍‌ତ ଆଡ଼୍‌ୱା ହଟିସ୍‌, ଏପେଙ୍ଗ୍ ତାଙ୍ଗେଙ୍ଗ୍ ଏରିକିମାଟ୍ । 32 ହାରିହାରା ହେଦାଂ ରାଚ୍ ଲାକେ କାପ୍ତାନାତ୍ ଆରି କାଲାଟ୍‌ ରାଚ୍‌ ଲାକେ ବୁଡାୟ୍ କିଦ୍‌ନାତ୍‌ । 33 ମି କାଣ୍‌କୁ ଉଲ୍‌ଟା ବିସ୍ରେ ହୁଡ଼୍‌ନାତ୍, ମି ମାନ୍ କୁଟ୍ କାତା ଇନାତ୍ । 34 ଆରେ, ଏପେଙ୍ଗ୍ ହାମ୍‌ଦୁର୍ ବିତ୍ରେ ହୁଞ୍ଜ୍‌ନାକାର୍ କି ଜାଜ୍‌ନି ମୁଣ୍ଡା ଜପି ହୁଞ୍ଜ୍‌ନାକାର୍ ଲାକେ ଆନାଦେର୍‌ । 35 ଏପେଙ୍ଗ୍ ଇନାଦେର୍, ହେୱାର୍ ନାଙ୍ଗ୍ ଇଡ଼୍‌ଦାତାର୍, ମତର୍ ଆନ୍ କେତି ପାୟା ଆୱାତାଂନା; ହେୱାର୍ ନାଙ୍ଗ୍ ଟ୍ରାକ୍‌ତାତାର୍, ମତର୍ ଆନ୍ ଇନାକା ପୁନ୍‌ୱାତାଂନା; ଆନ୍ ଏଚେକାଡ଼୍‌ଦ ନିଂନାଙ୍ଗ୍‌ ? ଆରେରଗ ଆନ୍ ହେୱାଙ୍ଗ୍‌ ଡେକ୍‌ନାଙ୍ଗ୍ ।