1 Ephraim au tingkai tyei eh lunghla

nah naimiak kepetle tingkai caisui la.

Pa au kenret nah zaisiet teingkiee jüja bamla.

Penui Assyria de ngngwa samkakkelu ge teilu

nah olive ca Egypt gage pung gaila.

2 RAMPAUBE au Judah de de hetutu kera ge la

nah Jacob tei kegaide ziemne saja peu laibam;

pa batadung ziemne saja peu zie.

3 Jacob henabam gade pe sinabe pideu heraklu,

nah pa ngkieng cuh luge Tinggwang de renia.

4 Pa tinggimgwabe de renia eh ngkienglu.

Pa hap nah pe nggia kiedi.

Pa Tinggwang de Bethel gade redau lu;

cikade Tinggwang pecu mpau.

5 Aide reugwame reu RAMPAUBE;

pe zi "RAMPAUBE" de qu eh lazie.

6 Cine n Tinggwang da cailigwang lu.

Kesamkkak kelu kesamsang de nah kemzuibe de kaizeu lu,

nah n Tinggwang de kwa jüja lalu.

7 Heliketeime penui badung ga kenret riangteukwak bam,

penui mide cwa neula.

8 Ephraim rangdi, "Ih mahei süt lu kesangda;

Ih a ziemne mahei pei luda.

A bata leune ga penui a mau gede ngau gailak,

kemau keheibe liede."✝

9 "Ih nnui Tinggwang RAMPAUBE Egypt deu gade nnuide ngngwa mpet kebeube,

Ih nnuide peu paikidung ga lungh daizie,

hengyi riempwa kebam tingbadung dau nzwa.

10 Ih caihakecime dage mpaugai,

nah Ih penuide nnui ziemne marengei kekie ge peu gai.

Caihakecime ba gade Ih samgwadung peu gai."

11 Gilead ga kenlienta la liecai,

minadung au pemi gah kesang da.

Gilgal ga penui hetumseudung ratak teigai;

penui recabamdung au renaam ga hetaluh puh lwe tangtsukangdung kebau kenzeu nzwa zie.*

12 Jacob au Aram deu gage pak gaidi;

Israel henau ge pei lu kerane meurün haudung kwa.

13 RAMPAUBE caihakecibe dade Israel de Egypt gade ngngwa mpetlu,

delwe caihakecibe ne penui mapielu.

14 Ephraim RAMPAUBE rata teisüt dida.

Cine pe Rampaube pe reu gage pe jai teilwa gaizie

nah pe ngam de pe reu gage kai caili beuzie.