1 "Aide kingnei lulo, cingkumedung!

Kingnei sünne gailo, Israelme!

Kingneilu, hegwang kelak ga kelungme!

Kedanemene nnui pelane reu ga tutiak gwang zie.

Nnui Mizpah ga hetak ge dida

nah Tabor deutu reu ga helang zangra ge dida. 2 Mlaikelame mide daptset sütla dida,

dede Ih penui pelane de saja peu zie,

3 Ih Ephraim de cibam,

nah Israel au adade mbai bamma.

Ephraim, nang cu au helipui ge nzwa dida;

Israel hera dida.

4 Penui batadung penuide peu Tinggwang da nreugwang lak,

kemmha lungcet de penui da bam kecune,

nah penui RAMPAUBE de ci ma.

5 Israel ngang kelade pecu mmaula;

Cine Israel penai Ephraim penai mau gade kau dizie;

nah Judah de penai de ngngwa kau dizie.

6 Penui penui gu meuründung nah kauhaudung de ngngwa RAMPAUBE de peei kera mie zie,

dede penui pecu peei gailak,

kedanemene pa penui da la mede kecune.

7 Penui RAMPAUBE dade masang luma,

penui hekaknadung mna kebeune.

Keici ngyidung penui luh si eh penuide tuityei luzie.

8 Gibeah gade hereu teki kwa gailo,

nah Ramah gade telui kwa gailo.

Beth Aven nam ga hereu sah gailo:

‘Benjamin! Anui nnui caisui luzie.’

9 Saja kepeu tingba benai Ephraim mrwa dizie.

Israel leuhmedung kakgade teigwangbi kerabe Ih ndu lia dida.

10 Judah ga muiteumedung au herai tsu pwa mlai kelame nzwa lie.

Ih dui nzwa eh penui reu gage a lunghop ruigai zie.

11 Ephraim de teikecai dida;

pecu kemmau gade teikecai dida,

kedanemene pa neungga eh mamiedung caisiu kedine.

12 Cine Ih Ephraim ziemne taklei ge nzwa zie,

nah Judah kelak zimene ntu nzwa zie.

13 Ephraim pe mateei ngau keludau,

nah Judah pe zam ngau keludau,

cidau Ephraim Assyria ga mie,

nah Judah samgwame de hegwang kedibe dage kengha kie kera langgai.

Dede pa au nnuide teingkei beulu tadi

mede nnui zam tei mmi lu tadi.

14 Cine Ih au Ephraim dade hingho ge nzwa zie,

nah Judah kelak ziemne hinghona ge nzwa zie.

Ih, Ih kecangde, teurakdi eh pak dizie;

Ih penuide pungtet dizie,

nah penuide kelilu kera migede gah dizie.

15 Ih tet zie da delwe a bam ga cailigwang dizie,

penui penui mau petlu eh acu peei kemaktane,

penui keherei eh acu lungsang tei pei kemaktane."