1 "Ndaa Ephraim marang kegai dau, mina mbeu dila.

Pa Israel ga pecu teimdi lu,

dede pa Baal mie recakedi ziemne maudi, nah pa tsaidi.

2 Cu penui kemau tei reureu di.

Penui rangkanggeule hegeumiedung teilu,

mamiedung teihemi lu kebuita tei eh,

cidung pelane heciemta keteime ne tei.

Minadung penui ha rang,

‘Mina ratak teibeu kela aidungde hetumnadung de kemam la.’

3 Cine penui au tingcang mwadung nzwa zie,

hezin gah nzetdi kelabe nzwa,

tsiurie hecaipung ge gade tingkai ne guipung di kelabe nzwa,

nah mika minrwangki gade mpetdi kelabe nzwa.

4 Dede Ih RAMPAUBE Tinggwang nnuide Egypt deu gade ngngwa mpet kebeube.

Nnui acu gwale hera keda ha ranglak;

nnui Ih gwale, kelikelube keda gah lie eh rang zie.

5 Ih nnuide hetaideu gade ci luda,

canghking kela deu gade.

6 Nnui ceheiziu bam ge, nnui pui lula;

nah nnui nggei luge, nnui ngang dila.

Cide ziemne nnui acu nsungta dila.

7 Ih penui dade hingho nzwa dizie;

kaudauna nzwa Ih lampui kwa zie.

8 Ih hegumpui pe namedung de süt teu kedibe nzwa penuide ketang zie.

Ih penui hekarak rui dizie,

nah cikade Ih penuide hingho ge nzwa tuityei luzie,

teikuu ge nzwa penuide teurak kecai dizie.

9 Ih nnuide ngkap dizie, Israel;

caune nnuide ngha lulai?

10 Cu au daiga nnui gwangpei lano,

pa nnui namdidung pelane gade nnuide kelilu kera?

Nnui a dage rang kegai, nnui reu kedimedung daiga lano,

‘Acu hegwangpei nah hegwangnadung peulo’?

11 Ih a rata gade nnuide hegwang ge peu,

nah Ih a lunghop gade pecu keu gidi.

12 Ephraim mau kekwapwa bam dida,

pe maudung de kekwa cuh luda.

13 Hena kemna tedteei de pe da gwang zie,

dede pa au maci kemak nage,

kedanemene pecu kemna ting dige, pa henabam gade mpetme kecune.

14 Ih penuide Sheol* ba gade keliu zieni?

Ketsai gade Ih penuide kelilu zieni?

Ketsai, daiga n rapiadung lano?

Sheol, daiga n kengkap lano?

Ngaukenggia au a miak gade kebai dida."*

15 Ephraim au pe sinamedung kakde lungh hing liede,

naimiak kepetle tingkai gwang zie;

RAMPAUBE tingkai de au hetaideu gade guilwet zie.

Ephraim duilet cangh dizie,

nah pe tekwa ga dui bamlak.

Pe ngauraube pe maniaki gade pemi kehungbe leune ngkap dizie.

16 Samaria mau dizie,

pa pe Tinggwang de mlai kedine.

Penui kiengtie gade kau dizie;

penui namedung de kedeu kecai dizie,

nah penui tetlak kela puidung de reupop dizie.