1 RAMPAUBE sam kingneilu, nnui Israelmedung.

RAMPAUBE au kideube ga kelunghme de kemmau hetuketu ge bam,

kedanemene cika makesang mede samkakkelu samsang, mede kideube ga Tinggwang de keci bamta kedine.✝

2 Cika reset, kenret, teiketset kerega nah kemmha bam,

minadung herietdung pelane gikah dida, nah hejai teilwa kecu cai teilwa bam dida.

3 Cine kideube canghdi zeuda,

nah cika kelunghme leune riemdi zeuda;

renaam ga makaunedung nah tingkam ga nruinedung,

jaaidi ga heka kecang de, keugi di zeuda. 4 Dede mige de de peu hetutu kera teugwang so;

migede de peu kedage de mmau so.

Kedanemene Ih mmau kelame au nnui, cingkumedung lu.

5 Nnui cingkumedung tingna kau dizie,

caihakecime de nnuide ngngwa tingmui kau dizie,

nah Ih nnui puide ngkap dizie.

6 A minadung de ngkap dida macilu kemakne.

Nnui cingkumedung maci gi kedine,

Ih de a cingkume ketei gade nnuide gi dizie.

Ih nnui Tinggwang liede, nnui a zai nsungta kedine,

Ih de nnui namedung de nsungta dizie.

7 Cingkume kiee reuge,

penui adage kemau teigai kieeki.

Cine Ih nnui gu hetwa de teu hengam tei dizie.

8 Penui a minadung kemau ketei gade tyeinggei lula;

penui au penui kenlienta kieeki lu kera hengim la.

9 Minadung de nzwa cingkume dede saja peuzie:

Penui tadung pelane ziemne Ih penuide saja peu zie;

Ih penui batadung ziemne rui beu zie.

10 Penui tyei zie dede tyeiset lak;

penui helili zie dede kieesi gailak,

kedanemene penui RAMPAUBE dade ndei sütla kedine.

11 Penui au kemmha, zau, nah zauci penui suila, cidene penui peusui keugi dida.

12 A minadung penui gu tsing mamiedung de keteu la,

nah penui tuitiedung ne caiha rang beula.

Kedanemene kemmha kecet ne penui peusui tei mangla kedine,

nah penui helipuidung ta teila dida penui Tinggwang dade samsang mene.

13 Penui lamlwatudung twangdung gage ratak tei gaila

nah kideutudung gage kehengui ru gaila,

mhubang, poplarbang nah terebinth gage,

cidung pehum yi kecune.

Cine n napuidung kemmha ta teila,

nah n na naumedung hangngwata teila.

14 Ih n napuidung de saja peulak penui kemmhata tei kera tiak keludau,

mede n na naumedung hangngwata ketei dau.

Kedanemene mipeidung de penuide helipuidung de peula,

nah penui ratakdung tei beula iciu eh penui kerecaki helipui de ngngwa kemmhata teilu kerane.

Hangkiasam rang kela nzwa, Heleuh ge cilu maige ngkap dizie.

15 Nang Israel, kemmha ta tei dilu de,

peu Judah de mau di selo.

Gilgal ga mieso, nnui minadung;

Beth Aven ga hangso,

nah, "RAMPAUBE ringkela nzwa," de rang eh reset so.

16 Israel tumleina lungtak nzwa pelungtak kedine.

Dainzwa eh RAMPAUBE tseheiziu ga meurünnadung de nzwa penuide tseheiziu ga ngngwa gwang lu laino?

17 Ephraim mamiedung de ngngwa ket tei luda;

pecu püt dilu.

18 Penui zau kengkieng de gah dide,

penui au kemmha ta tei bamla;

penui reu kedime penui ngamta de hungla.

19 Tingkai ne pecu pe hesiudung gage kezui luzie;

nah penui nlum kemak ratakdung ziemne penui ngngam dizie.