1 Coríntios 16

सेवा कोअनाराआ कोअते दान

1 ओमे तिया दानोअ बाप्तिमेहें जों सोका माअहोंअ काजे कोअतेहे, जेहलुहू आदेश आंय गलातीयाआ मंडड़ीही आप्युहू, तेहेलोज तुमू बी कोआ. 2 आठीवड़ाआ पेल्ले दिहे तुमामेर्‍योअ हारेक जोओं तियाहा जों जोड़ेहे तिया दानोअ पुरमाणे थोड़ुक भाग तियाम रोत आलांग कोइत मिकुहूं जोवे, मोन्ज्ये आंय आविहीं तेहेलाम हाटवीइलोअ पाड़ी ने आवुहूं जोवे. 3 आन जेहेलाम आंय आविहीं, ताहां जियांहां तुमू स्विकारतेहे तियांआं आथे सिट्टी आपीत मोकली देहीं, मोन्ज्ये तें तुमाआं दान येरुसालेमोम पोताड़ी देय. 4 जर माआं जाअलोअ ठरीत गोयो, ताहां तें माअरी आवे.

पौलुसोअ प्रवासोअ योजना

5 आंय मकिदुनियाअहें रोत तुमाआं जागे आविहीं, काहाके मकिदुनियाअहें रोत माआं योजना होय. 6 पोन ओत सेके ताहां आंय तुमाआं जागे रुकात जाहीं, आन पुरु हियालू बी तुमाअहींज काडीहीं, तिहीं रोत आगाड़ी जियी वोलेहे माआं जाअलोअ रोय तियी वोलेहे तुमू माहूं वाटे लागाड़ी देजा. 7 काहाके आंय ओमे वाटेमेहें तुमुहूं मिलीइलोअ नाहां कोअतू; पोन माहूं आशा होय के, जर प्रभुउ इश्शा ओय, ताहां थोड़ीक वेल जाआं तुमाअरी रोहीं.

8 पोन आंय पेन्तेकुस्त✝16:8 लेवी 25:15-21; कायदा 16:9-11 ओवे ताअहूं जाआं तिहीं इफिसोमेहें रोहीं. 9 काहाके माआं काजे तिहीं एक वोडो आन कामोअ बाअणो उगड़ीत रोयोहो, आन विरोदी जाअखीलेहे होय.

10 जर तिमथ्यू तुमाअहीं आयु, ताहां तो तुमाआ जागेहे बेफिकर्‍यू केहें कोइत रोय तों पालजा, काहाके तो बी माआं होस प्रभुउ काम कोअहे. 11 याआ कोअते के कोडो तियाहा कमी ने मानुहूं जोवे, आन तियाहा होकेहे माआं जागे पोतीत जाय तेहें मोकली देजा; काहाके तो विश्वासी पायहोंअरी आवे कोत आंय तियाहा वाट जोवोहो.

12 पाही अपुल्लोसोहो तुमाआं जागे पायहोंअरी आवे तेहें काजे आंय जाअखीलीही रावणी कोअयिही; पोन तिये यी वेले आवीइलाआ किज इश्शा ने कोअयी, पोन जेहलाम वेल जोड़े तेहेलाम आवित लागे.

आखरीइ रावणी आन सलाम

13 जागते रोवा, विश्वासोमेहें मजबुत रोवा, हिम्मत मिका, ताकतवान बोणा. 14 जों किबी कोअतेहे तों मेरे वाअहीं कोआ.

15 पाव्हीइला, तुमू स्तिफनासोअ घराणाआ बाप्तिमेहें जांअतेहे के तें अखायाआ पेल्लोअ फल होय, आन सोका माहुंउं सेवाआ काजे तियारीम रोतेहे. 16 तियाहा काजे आंय तुमुहूं रावणी कोअहो के एहेलाआ ताबाम रोवा, आन जें या कामोमेहें मेहेंनत कोअतेहें आन आरी लागीत काम कोअतेहें तियांआं बी ताबाम रोवा.

17 आंय स्तिफनास आन फुरतूनातुस आन अखिकुसोअ आविइला वाअहीं खुस होय, काहाके तियां तुमाआं कमीहीं पुरी कोअयिही. 18 तिये माआं आन तुमाआं आत्माहां आराम आप्युहू, तियाहा काजे एहेला माहुंहूं माना.

19 आसियाआ मंडड़ीम रोत तुमुहूं सलाम; अक्विला आन प्रिस्किल्ला✝16:19 प्रेशित 18:2 आन तियांआं कोर्‍यीइ मंडड़ीही बी प्रभुमेहें सलाम!

20 तुमू आखा पायहोंहों सलाम. सोकु गुउं देत एकमेकाहा सलाम कोआ.

21 आंय पौलुस, मी सोताहा आथोवाअहीं लेखल्यो सलाम.

22 जर कोडो प्रभुहू मेर ने कोए तियाहा हाराप लागे. ए आमाआं प्रभु, आवेए*16:22 ए आमाआं प्रभुमारानाथा!

23 प्रभु ईसुउ मेरवानी तुमापोअ कायम ओवती रोअहूं जोवे.

24 माआं मेर ख्रिस्त ईसुमेहें तुमा आखाअरी रोअहूं जोवे. आमेन.