1 फारस देसोअ राजा कोरेश तियाआ सालतीइ तिसरा वोरह्योमेहें दानियेलोपोअ एक गोठ प्रगट कोअयी, जियाहा बेलेतशेस्सर कोत बी ओलखीइतेते. ते गोठ खोरी ओती के वोडी लड़ायी ओवे. तिये ए गोठी जाईंत लेदी, आन तियाहा ए देखल्यी गोठी समजात गोयी.

2 "तियां दिहोमेहें, आंय दानियेल तिन आठीवड़ा जाआं जास्ती दुखी ओतु. 3 ते तिन आठीवड़ा पुरा ओवे ताअहूं जाआं, आंय ने होवादू रोटू के, माहां के, दाराक्शाआ रोहो माआं सोबीम गोयू, आन ने माआं डिलोपोअ तेल लागाड़्यो.

4 "फाशोअ पेहला मोयनाआ शोविसवा दिहोअ दिही जेहेलाम आंय हिद्देकेल नावोअ नोयीइ मेरे उबु ओतु, 5 ताहां आंय उसे नजर कोइत पाल्यो, ते पेंडीइ हुतोअ आंगड़े पोवित, आन उफाज देसोअ होनाआ पोट्टा वाअहीं कंबर बांदीत एक माटी उबु रोत रोल्यू देख्यू. 6 तियाआ डिल समकीइनारा फिरोजा नावोअ डोणोअ होस, तियाआ मुख विजेए होस, तियाआ डोआ पेटाअत्ली दिवीइ होस, तियाआ आथेन गुडा समकीइनारा तांबाआ होस, तियाआ आवाज माअहोंअ गर्दीइ होस वोडू ओतु.

7 "तियाहा निस्त आंय दानियेले एतोज देख्यो, आन माअरीइ हात्योहों तियाआ किज दर्शन ने ओवो; पोन तेबी जास्तीज कापा वोल्या, आन निकाइलोअ कोअते गुगदा वोल्या. 8 ताहां आंय एखलुज रोत कोइत ओं वोडो दर्शन पालतु रोयू. यावाअहीं माआं सेक्ती कमी पोड़ीत गोयी, आन माआं सोब उगात गोयी; आन जास्ती लुलू पोड़ीत गोयू. 9 ताहां आंय तियाहा गोगत्लाहा उनाअयु, तियाआ आवाज उनाअताम आंय पुयींपोअ उबडू पोड़ीत गोयू आन वोडी निंदेम पोड़ीत रोयू. 10 ताहां कोडे तेबी तियाआ आथो वाअहीं माहूं तोइत उठाड़्यू आन टोसणोन आथोअ जोरो वाअहीं कापत्लाहाज बोहाड़्यू."

11 ताहां तिये माहूं कोयो, "ए दानियेल, देव तापोअ मेर कोअहे, जों वसन आंय ताहूं कोहो, तियाहा समजीत ले, आन हुदू उबू रो, काहाके ओमे आंय ताआ जागे आवयुहू." जेहेलाम तिये माहूं ओं वसन कोयो, तेहेलाम आंय उबू ते रोयू, पोन थुर थुर कापतू रोयु.

12 फाशोअ तिये माहूं कोयो, "ए दानियेल, मा बिही, काहाके पेल्लाआज दिहोम तुमे समजीइलाआ काजे मोन लागाड़्यो आन देवोअ हुंबर सोताहा नम्र ओवू, तेदिहींज देवे ताआ शब्द उनाइत लेदो, आन आंय ताआ प्रार्थना वाअहींज इंहीं आयुहू. 13 फारसोअ राज्याआ मुख्यू एकविस दिही जांआं माअरी लड़ायी कोअतु रोयू; पोन मिखाएल जो मुख्य पुडाऱ्योंमेहें रोत होय, तो माआं मदत कोइलोअ काजे आयु, तियाहा कोत आंय फारसवाला राजाआ जागे रोयु, 14 आन ओमे आंय ताहूं समजाड़ू आयुहू, के सेवट्याआ दिहोमेहें ताआ माअहोंअ कि दशा ओवे, काहाके जों दर्शन तुमे पाल्योहो तों थोड़ाक दिहोमेहें पुरो ओवे.

15 "जेहेलाम तो माटी माहूं ए गोठी कोत आप्यी, ताहां आंय धरतीइ वोल सोब कोअयीन ठावकुज रोयू. 16 ताहां माअहोंअ होस देखाअनारो एक जोंओं माआं सोबीही आथ लागाड़्यू, आन आंय सोब उगाड़ीत कोइत गोगु वोल्यु. जो माआं हुंबर उबु ओतु, तियाहा आंय कोयो: ए माआं मालिख, यीं दर्शनोअ गोठी वाअहीं आंय बियुहू, आन मामेहें किज ताकत नाहां रोयी. 17 तियाहाकोत मालिख, आंय ताआ सेवक, आंय ताअरी केहें कोइत गोठी कोइत सेकहीं? काहाके माआं डिलोमेहें ते सेक्ती ने रोयी, आन माआं दोम रुकाउ वोल्यू."

18 "ताहां माअहोंअ होस कोडे तेबी आथ लागाड़ीत माहूं तोअयु आन फाशीइ माहूं टोणकाय जोड़्यी. 19 आन तिये कोयो, ‘देव तापोअ मेर कोअहे, मा बिही, ताहूं शांती जोड़े; तु मजबुत ओव आन धिर तोअ.’ जेहेलाम तिये ओं कोयो ताहां आंय मजबुत ओवीत कोइत कोयो: ए माआं मालिख, ओमे को, काहाके तुमे माहूं धिर आप्युहू."

20 ताहां तिये कोयो, "केहें तु जाअहें के आंय ताआ जागे काहा आयुहू? ओमे आंय फारसोअ मुख्याअरी लड़ायी कोऊ जाहीं; आन जेहेलाम आंय निहींहीं, ताहां युनानोअ मुख्यू आवे. 21 जो किबी खोरी गोठीवाअहीं पोआला पुस्तकोमेहें लेख्योहो, तों आंय ताहूं कोहो, तियां मुख्याआ विरुद्दाम वातड़ू उबू रोनारु तुमाआं मुख्या मिखाएलोहो सोड़ीत माअरी फाशोअ कोडोज कायनाहां."