1 इकुनियुमोमेहें एहेलोहो ओवो के ते यहुदीइ आराधनालयोमेहें आरी आरी गोया, आन एहें कोइत गोठी कोअयी के यहुदी आन युनानी बेनुमेहें रोत डाहटे जोएं विश्वास कोअयू. 2 पोन विश्वास ने कोअनारा यहुदी माअहूं बिगर यहुदीइ मोने भटकाड़ीत कोइत विश्वासी पाव्हीइलाआं विरुद्दाम खिजवी देदे. 3 प्रेशितहों जाअखिलाहा दिही जाआं तिहीं रोया, आन प्रभुउ बाप्तिमेहें हिमते वाअहीं गोठी कोअताते; आन जो तियांआं आथे समत्कार आन वोडे वोडे कामे कोआडीत कोइत तियाआ मेरवानीइं वसनो पोअ साक्शी आपतुतो. 4 पोन होयरोमेर्‍याअ माअहूंमेहें भाग पोड़ीत गोयाते, यावाअहीं केतेहे तेबी यहुदीइ वोगेहे आन केतेहे प्रेशितोअ वोगेहे ओत गोये.

5 पोन जेहेलाम बिगर यहुदी आन यहुदी तियांआं अपमान कोइलो आन तियांहां डोणाटीइलोअ काजे तियांआं आधिकार्‍योंअरी तियांअहें गुगदीत आवये, 6 जाहां प्रेशितोहों ए गोठी मुंदू गोयी तेहेलाम आन लुकावनियाआ लुस्रा आन दिरबे होयरोमेहें, आन आहने-पाहनेए मुलखोमेहें नाहीत गोया. 7 आन तिहीं हाजी बातमी कोतापा वोल्या.

8 लुस्रामेहें एक माहुंउं ओतो, जो गुडाम पांगलो ओतो. तो जल्मार्‍योअज लेंगड़ो ओतो आन केदिहींज ने साल्योतो. 9 तों पौलुसोअ गोठी उनाअया कोअतोतो. पौलुसे तियाअहें एक नजरेज पाल्यो के तियाहा हुदरीत जाअलोअ विश्वास होये, 10 आन आअड़ीत कोयो, "ताआ गुडाअ ताकते वाअहीं उठीत उबू रो." ताहां तो उब्बोज उसल्योन सालो वोल्यो. 11 माअहें पौलुसोअ ओं काम पालीत कोइत लुकावनिया बाशामेहें आअड़ीत कोइत कोयो, "देवे माहें बोणीत आपाअ जागे उतरीत आयेहे." 12 तियां बरनबासोहो ज्यूस, आन पौलुसोहो कांय हेरमेस कोयो, काहाके तो गोठी कोइलोमेहें मुख्य ओतू. 13 ज्यूसोअ तिया मंदिरोअ माहराज जो तियांआं होयरोअ सामने ओतो, बोलोद आन फुलोअ हार नेहें गेटोपोअ लेतावीत माअहोंअरी गाराहा आपुहूं कोअतुतो.

14 पोन बरनबास आन पौलुस जेहेलाम ओं उनाअया, ताहां तियांआं आंगड़े फाड्ये आन गर्दीम फोहयान आअड़ीत कोइत कोना वोल्या, 15 "माअहूं, तुमू ओं की कोअतेहे? आमू बी तोम तुमाआं होसूज माअहें होय, आन तुमुहूं हाजी बातमी कोतापताहा के यीं फालतू वस्तुअहें रोत मोन वालित कोइत जिवता देवोअहें फिरा, जिये होरगो आन धरती आन दोर्‍या आन जो किबी तियांमेहें होय बोणायो. 16 गोल्या दिहोमेहें तिये आखी जातीइ माअहोंहों जिवज्योअ वाटे सालुहूं देदे. 17 तेबी तो तुमाआं काजे हाजी हाजी गोठी कोअतू रोयू, ओ तियाआ पुरावू होये के तो होये. तो तुमुहूं जुगोम रोत वोर्‍हात पाड़त्लू, बोराबर वेलेपोअ ओन पाकाड़त्लू; तो तुमुहूं रोटू आपत्लू आन तुमाआं मोनोहों खुस कोअत्लू."

18 ओं कोत कोइत बी बरनबास आन पौलुसे माअहुंहूं वोडी जिगरी वाअहीं रुक्ये के तियांआं काजे गाराहा ने कोअहूं जोवे.

19 पोन थोड़ेक यहुदी माअहें अंताकिया आन इकुनियुम रोत आवित कोइत माअहुंहूं तियांआं वोग वालित लेदे, आन पौलुसोहो डोणाट्यू, आन मोल्यू समजीत कोइत तियाहा गांवोंअ बारथे ओडीत कोइत टाकीत आये. 20 पोन जेहेलाम सेला तियाआ मेरे मेरे आवित उबा रोया, ताहां तो उठीत कोइत गांवोम गोयू आन बिहरे दिही बरनबासोअरी दिरबे जातू रोयू.

21 पौलुस आन बरनबास तिया गांवोंअ माअहुंहूं हाजी बातमी उनाड़ीत कोइत, आन वारुज सेला बोणावीत कोइत, लुस्रा आन इकुनियुम आन पिसिदियाअ अंताकियाम वापिस आवता रोया, 22 आन सेलाआ मोनोहो मजबुत कोअता रोया आन ओं सिकाड़ताते के विश्वासोम पाक्का रोवा; आन कोताते, "आपुहूं वोडु तारास कोअतेज देवोअ राज्याम जाअहूं पोड़े." 23 आन तियां बादी मंडड़ीमेहें तियांआं काजे पुडारी ठरवी देदा, आन उपासोअरी प्रार्थना कोइत तियांहां प्रभुउ आथोम होप्या जियापोअ तियां विश्वास कोअयुतो.

24 ताहराअ पिसिदियाअहें ओवताज ते पंफूलियाम पोत्या; 25 ताहराअ पिरगामेहें वसन कोतापीत कोइत अत्तलियाम आया. 26 आन तिहीं रोत ते जाहाजीम बोहीत अंताकिया गोया, जिहीं तियां कामोंअ सुरुवात कोअयीते, जों तियां देवोअ मेरवानीमेहें होपाइत ओमे पुरो कोअयोतो.

27 तिहीं पोतीत कोइत तियां मंडड़ीही टोलू कोअयी आन कोताप्यो के देवे तियांअरी रोत कोइत केहेलेहे बाहरी बाहरी कामें कोअये, आन बिगर यहुदीइ काजे विश्वासोअ बाअणो उगाड़ी देदो. 28 आन ते सेलांअरी वारुज दिही जाआं रोया.